BRONCE PARA MANU OCHOA NA COPA DO MUNDO DE PRAGA

 

    Do 27 ao 29 de xuño disputouse a 3ª Copa do Mundo de Slálom. Nesta ocasión na canle de Troja en Praga, na República Checa. Esta proba marca o ecuador das Copas do Mundo, conformada este ano por cinco competicións. Centos de atletas de tódolos países do mundo acudiron a esta terceira cita da liga mundial de slálom. Nesta ocasión, dous dos doce integrantes do equipo nacional eran galegos, e os dous do Club Deportivo Miño-Teixugos, Manuel Ochoa en caiac cross e Luís Fernández en canoa. 

    Luís comezou a súa participación o xoves na nova modalidade de carreira curtas, no seu caso en C1. Fixo unha boa baixada, pero quedou lonxe dos doce que pasaban a finais, rematou a proba no trixésimo sétimo lugar. 

    O venres volveu baixar Luís, neste caso en C1, e a cousa non discorreu ben, pois unha penalización nunha das portas deixárono na quincuaxésima posición. Este ano modificouse o regulamento e xa non hai unha segunda oportunidade, polo que Luís volveu quedar fóra de finais. 

    O domingo foi o día para o caiac cross, e para o teixugo Manu Ochoa. Comezou coas probas individuais de contra reloxo, Manu fixo unha boa baixada, rematando undécimo e entrando nas loitas, sendo o único español que o logrou. Gañou a serie de octavos, entrou segundo en cuartos, volveu gañar as semifinais e xa na final nunha baixada durísima e moi axustada entrou terceiro na liña de meta, por detrás do neocelandés Finn Butcher e do checo Martín Rudorfer. Medalla de bronce para o tomiñés, a súa segunda medalla nas Copas do Mundo deste ano, un logro impresionante. 

    As competicións internacionais sofren agora un parón ata finais de agosto, quedando polo medio as competicións nacionais. 

 

BRONCE PARA NEREA ÁLVAREZ E GRAN TRABALLO DOS TEIXUGOS NA 2ª COPA DE ESPAÑA DE SLÁLOM “JÓVENES PROMESAS”

     Esta fin de semana disputouse a 2ª Copa de España “Jóvenes Promesas” de Slálom na localidade de San Miguel, en Irún. As augas do río Bidasoa acolleron as futuras promesas do slálom español, concretamente da categoría cadete, infantil de segundo ano ou infantil A e infantil de primeiro ano ou infantil B. Vinte clubs e douscentos cincuenta deportistas procedentes de tódolos puntos da xeografía comezaron o sábado a competir, disputando as eliminatorias para determinar os dez mellores tempos que entrarían nas finais do domingo. O Club Deportivo Miño-Teixugos acudiu cunha representación de oito deportistas que deixaron o pavillón ben alto. 

    O papel máis destacado correspóndelle a Nerea Álvarez na modalidade de C1 Infantil A. Nerea comezou a súa participación o sábado cunha impresionante manga clasificatoria, rematando terceira a menos de medio segundo de gañar a manga. Na final do domingo repetiu posición, gañando por tanto a medalla de bronce. Na mesma categoría tamén participaron Leila Álvarez e Catalina Sánchez, que tamén pasaron á final, rematando quinta e sétima respectivamente. 

 

    Estas mesmas deportistas tamén competiron en K1 Infantil A xunto a Beatriz Sánchez, todas elas pasaron a final do domingo. Leila rozou o podio ao rematar cuarta, Nerea foi quinta, Catalina sétima e Beatriz décima. 

    Rita Olveira competiu en K1 Infantil B, pasou á final e rematou no sexto lugar. 

    Lois Montenegro en K1 Infantil B tamén conseguiu o pase a final onde rematou quinto. 

    En K 1 infantil A, Izan Vicente e Alejandro Barreiro non acadaron o pase á final, rematando finalmente vixésimo terceiro e vixésimo cuarto respectivamente. 

 Impresionantes os teixugos nesta súa primeira competición a nivel nacional da tempada. Na clasificación por equipos o Club Deportivo Miño-Teixugos acadou o quinto posto por detrás dos grandes clubs catalás e vascos. 

POUCA FORTUNA PARA MANU OCHOA NA 2ª COPA DO MUNDO DE CAIAC CROSS

     Segunda cita coa Liga de Copas de Slálom da ICF, nesta ocasión na canle da localidade francesa de Pau. O teixugo Manuel Ochoa acudiu a cita como representante da selección española na modalidade de caiac cross, levando o listón moi alto, tras gañar a anterior. 

    Esta é unha canle na que soen adestrar os equipos españois, ao estar preto da fronteira española, aínda así a sorte non estivo de parte do tomiñés nesta ocasión. Comezou a competición na mañá do domingo coas contra reloxo, nas que se clasificaban para as eliminatorias os 32 mellores dun total de oitenta e dous deportistas de máis de trinta países. Manu fixo unha boa baixada, rematando décimo terceiro, clasificándose para as loitas sen problema. 

    Na súa primeira baixada dos enfrontamentos, tivo un bo comezo, manténdose en segunda posición, aínda que moi axustada, e na última porta foi adiantado polo polaco Polaczyk, entrando terceiro e quedando eliminado en octavos de final. Rematou esta segunda copa do mundo décimo noveno. Destacar que a medalla de ouro foi para o español Pau Etxaniz, que a pesares de non estar entre os favoritos deu gañado a competición. 

    A seguinte Copa do Mundo celebrarase do 27 ao 29 de xuño en Praga, e nesta ocasión serán dous os deportistas do Club Deportivo Miño-Teixugos que formarán parte do equipo de España, Luís Fernández en canoa e Manuel Ochoa en caiac cross. 

O TEIXUGO MANU OCHOA GAÑA A 1ª COPA DO MUNDO DE CAIAC CROSS

 

    Esta semana tivo lugar na canle do Parc Olimpic do Segre, na Seu D´Urgell, a 1ª Copa do Mundo de Slálom. Manuel Ochoa do Club Deportivo Miño-Teixugos forma parte esta tempada do equipo nacional en caiac cross, unha modalidade moi nova que está gañando cada vez máis afeccionados pola súa espectacularidade. 

    A participación de Manu comezou o domingo coas contra reloxos, que determinan en que posto dos enfrontamentos se sae. Setenta e cinco deportistas de todo o mundo, os mellores de cada país, fixeron as súas baixadas para intentar estar entre os 32 primeiros e conseguir entrar nos enfrontamentos. Nesta primeira proba Manu a piques estivo de conseguir medalla ao facer o cuarto mellor tempo, a un segundo do primeiro clasificado, o inglés Jonny Dickson. 

     Na fase de enfrontamentos, catro atletas baixan a un tempo, os dous primeiros pasan de fase e os dous últimos quedan fóra. Manu gañou con claridade a súa serie de octavos pasando a cuartos onde tamén se impuxo moi por diante dos seus contrincantes. Nas semifinais ía tamén en cabeza, pero un tropezo co seu compañeiro de equipo Llorente na última porta fixo que entrara en segundo lugar, por detrás do inglés Dickson. Nunha final de infarto impúxose aos seus tres contrincantes con claridade, gañando unha histórica medalla de ouro. Compartiron podio con el o inglés Dickson, que gañou a prata, e o Suizo Rohrer, que acadou o bronce. 

    Impresionante e histórico comezo desta tempada para o tomiñés. A vindeira semana nova cita co piragüismo internacional na canle francesa de Pau coa celebración da 2ª Copa do Mundo de Slálom.