domingo, 16 de febrero de 2020

1ª COPA DE ESPAÑA, MONDARIZ: 15-16/02/2020

Esta fin de semana celebrouse en Mondariz Balneario, nas augas do río Tea, a 1ª Copa de España de slálom, inaugurando así a Liga Española de Slálom. Case douscentos deportistas de toda España acudiron ao evento. Este ano con nova normativa, pois os dous días de competición tiveron semifinais e finais, e nos dous días houbo entrega de medallas. Tamén se agruparon as categorías cadete, nados en 2004 e 2005, e júnior, nados en 2002 e 2003, nunha única categoría, a xuvenil. A xornada do sábado transcorreu sen incidentes, non así a do domingo, na que o vento fixo estragos en moitos participantes, ao moverlles as portas no momento de ter que pasalas.
O Club Deportivo Miño-Teixugos acudiu con nove deportistas, que deron o mellor de si mesmos nas augas do río Tea.
 A mellor participación foi a de Luís Pereira, que na modalidade C1 sénior, acadou a medalla de ouro tanto no sábado como no domingo. Impresionantes as baixadas do deportista de Salceda que gañou as dúas finais da máxima categoría con varios segundos de diferencia do resto dos finalistas.
Brais Castro, tamén en C1 sénior logrou entrar en finais nos dous días, o sábado rematou en sexto lugar e o domingo, nunha baixada fixo o segundo mellor tempo, por detrás de Luís, acadando a medalla de prata.
Manuel Ochoa, en K1 sénior, superou as clasificatorias sábado e domingo, e aínda que aspiraba a algunha medalla, non foi quen de acadar podio, rematando os dous días en cuarto lugar.
Samuel Castro en C1 xuvenil, o sábado, conseguiu entrar en finais, rematando sétimo. Xa no domingo, non deu superado as clasificatorias, rematando décimo terceiro.
Sergio Rodríguez, en K1 xuvenil, o sábado rematou décimo terceiro, quedando fóra de finais. No domingo, nunha gran baixada, acadou finais co quinto mellor tempo da categoría, rematando sexto na final. Na mesma categoría Alexis Segadaese e Mateo Alvarez, aínda que non fixeron case penalizacións, e fixeron baixadas correctas, non deron acadado finais, Alexis rematou vixésimo segundo o sábado e vixésimo o domingo; e Mateo Álvarez quedou no trixésimo oitavo e trixésimo noveno.
Ainhoa Barreiro e Alba Soutelo dobraron participación en K1 e C1 xuvenil. O sábado Ainhoa acadou finais tanto en caiac como en canoa, rematando novena nas dúas categorías. O domingo so acadou finais en canoa, rematando undécima en K1 e quinta en C1. Pola súa banda Alba entrou en finais en C1 tanto sábado, rematando sexta, como domingo, rematando sétima. Na modalidade K1, rematou undécima e décimo quinta, boas posicións, pero fóra de finais.
Destacar o mérito dos postos das nenas e nenos da categoría xuvenil, pois todos eles están na franxa de idade cadete, dous anos menos que moitos dos seus competidores xa en idade júnior.
 Na clasificación final por equipos, o Club Deportivo Miño, rematou en quinto lugar cun total de 385 puntos.












domingo, 26 de enero de 2020

XI TAÇA IBÉRICA DE SLÁLOM:25-26/01/2020

Esta fin de semana celebrouse XI Taça Ibérica de Slálom, un exemplo de colaboración transfronteiriza. A xa emblemática competición tivo lugar nas augas do río Coura ao seu paso por Azenhas de Pagade, na freguesía de Covas. Organizada polas federacións galega e portuguesa de piragüismo, e polo Club Deportivo Miño, a proba puntuaba tanto na liga portuguesa, como na galega de slálom. Puro espectáculo foi o que deron os máis de cen deportistas participantes, nunhas xornadas nas que acompañou o bo tempo. Ao longo do sábado disputáronse as clasificatorias, nas que moitos piragüistas xa quedaron fóra da competición. E na mañá do domingo foi tempo de finais e semifinais. O Club Deportivo Miño-Teixugos, organizador principal do evento, acudiu a cita con 8 deportistas, que foron quen de acadar catro medallas de ouro, tres de prata e unha bronce. Ainhoa Barreiro, na categoría cadete, alzouse co triunfo tanto en canoa como en kaiak. Na mesma categoría, Alba Soutelo foi medalla de prata, tamén en C1 e K1. Samuel Castro, en C1 cadete, foi o gañador da proba.En K1 cadete,a que tivo a maior participación de "teixugos", Sergio Rodríguez gañou a proba, Alexis Segadaes foi prata, Samuel Castro rematou cuarto e Mateo Rivas sexto. En K1 infantil, Adrián Lluch, rematou en quinto lugar. Brais Castro, en C1 sénior, rematou coa medalla de bronce. Na clasificación final por equipos o Club Deportivo Miño-Teixugos foi o gañador con 270 puntos, compartindo podio co Augas Bravas Clube con 226 e a Associação Desportiva de Amarante con 180.
Para ver máis imaxes do evento preme  AQUÍ 





domingo, 29 de diciembre de 2019

1ª COPA GALEGA DE SLÁLOM, MONDARIZ: 29/12/2019

Este domingo deu comezo a Liga Galega de Slálom en augas do río Tea ao seu paso por Mondariz Balneario. Madrugadora, a poucos días do comezo do novo ano, o Club Tea de Mondariz organizou a 1ª Copa Galega de Slálom, correspondente xa a tempada 2020.
Sesenta deportistas de cinco clubs galegos acudiron ao evento. O Club Deportivo Miño acudiu con sete piragüistas, rematando todos nesta ocasión cunha medalla.
En categoría feminina, Ainhoa Barreiro e Alba Soutelo, baixaron tanto en canoa como en kaiak cadete. Alba acadou o ouro nas dúas modalidades e a súa compañeira Ainhoa foi prata, tamén nas dúas.
En C1 sénior Brais Castro foi o gañador , e seu irmán Samuel tamén gañou en C1 cadete.
Na categoría k1 cadete os teixugos coparon o podio, o ouro foi para Sergio Rodríguez, prata para Alexis Segadaes e bronce para Mateo Rivas.
Non puido ser mellor o resultados para os do Club Deportivo Miño cos cinco ouros, tres pratas e un bronce, acadados. Na clasificación final por equipos os gañadores foron os anfitrións do Tea de Mondariz con 152 puntos, e o Club Deportivo Miño-Teixugos rematou segundo con 139 puntos.







domingo, 22 de diciembre de 2019

GALA DO PIRAGÜISMO GALEGO 2019

Este venres, a Federación Galega de Piragüismo, fixo entrega dos premios aos mellores do ano na súa Gala do Piragüismo Galego. O evento tivo lugar nesta ocasión no edificio da Xunta, en Campolongo, Pontevedra.
O Club Deportivo Miño-Teixugos recibiu nesta ocasión tres galardóns. 

O canoísta Luís Fernández recibiu o premio a mellor deportista masculino sub-23 por o que foi o mellor ano da súa carreira. Este ano formou parte do equipo nacional sub- 23 e absoluto de slálom, na modalidade de canoa. En setembro conseguiu unha medalla de prata por equipos no Campionato do Mundo absoluto celebrado  na Seu D´Urgell, sendo a primeira medalla nun mundial absoluto para o slálom galego. Esta medalla e os bos resultados obtidos en diferentes competicións fixeron que a Federación Galega lle outorgara o premio ao mellor Deportista Galgo sub-23.

Por outra banda o Club Deportivo Miño-Teixugos recibiu o premio ao mellor club galego de slálom, premio que subiu a recoller o presidente Pablo Pousa.

Finalmente Manuel Ochoa recibiu unha mención especial da Federación pola súa medalla de bronce na modalidade de equipos ou patrullas no Campionato do Mundo sub-23, celebrado en xullo en Cracovia.

Inmellorable balance para os Teixugos nesta Gala do Piragüismo Galego cos tres galardóns acadados. Agora toca facer frente a tempada 2020 e intentar mellorar os fantásticos resultados desta.


 

martes, 17 de diciembre de 2019

II TAÇA DE PORTUGAL DE SLÁLOM:14-15/12/2019

A pasada fin de semana celebrouse na localidade portuguesa de Amarante a II Taça de Portugal de Slálom coa participación de piragüistas portugueses e galegos. 
Do Club Deportivo Miño  acudiu ao evento Alexis Segadaes, participando na modalidade de k1  categoría cadete. Despois de superar as clasificatorias a primeira hora do domingo, Alexis fixo unha boa baixada nas finais, marcando o mellor tempo da categoría, pero seis segundos de penalizacion por tres toques, fixeron que rematara en segundo lugar, a apenas vintedúas centésimas de segundo de José Ferreira do Augas Bravas Clube. Medalla de prata, por tanto, para Alexis nesta IITaça Portuguesa de Slálom.



domingo, 29 de septiembre de 2019

CAMPIONATO DO MUNDO, SEU D´URGELL: 25a29/09/2019

Do 25 ao 29 de setembro celebrouse na localidade ilerdense da Seu D`Urgell o Campionato do Mundo de Slálom no que se deron cita os mellores deportistas do mundo da modalidade. O canoísta de Salceda, Luís Fernández, do Club Deportivo Miño Teixugos, foi un dos doce deportistas que integraron a selección española.

O mércores 25, Luís estreouse no mundial na competición por equipos, xunto co vasco Ander Elosegui e o catalá Miquel Travé, cunha baixada rápida e sen penalizacións, fixeron o segundo mellor tempo do mundial na modalidade C1, conquistando a medalla de prata. No día seguinte, Luís comezou a súa participación individual, onde, cun percorrido rápido e perfecto, conseguiu facer o décimo mellor tempo, que o clasificou directamente para semifinais. A primeira hora da mañá do sábado buscou entrar nas finais, pero catro segundos de penalizacións e unha baixada algo lenta deixárono fóra, rematando finalmente na vixésimo oitava posición, que colocan ao teixugo na elite mundial da canoa de slálom.

Outra galega, Ainhoa Lameiro do Piragúismo Penedo, tamén formou parte do equipo feminino de C1, e ao igual que Luís acadou medalla de prata por equipos, e, nas clasificatorias individuais, aínda que fixo dúas baixadas correctas, non foron o bastante rápidas como para poder entrar en semifinais.

Primeira participación galega nun mundial absoluto, con dúas medallas de prata históricas que demostran o bo momento que está vivindo o slálom galego, que pouco a pouco se está metendo na elite do slálom nacional e mundial.


domingo, 22 de septiembre de 2019

CAMPIONATO GALEGO DE PROMOCIÓN DE SLÁLOM, DUMBRÍA:22/09/2019

Este domingo as augas do río Xallas na localidade de Dumbría recibiron aos máis pequenos do slálom galego para competir no Campionato Galego de Promoción . A competición caracterizouse pola baixa participación, apenas 60 deportistas das categorías pre-benxamín, benxamín, alevín e infantil. Cada deportista fixo dúas baixadas, puntuando para posición a mellor das dúas.

O club Deportivo Miño acudiu ao evento con seis deportistas, que deron o mellor de si mesmos no ambiente de amizade e deportividade que caracteriza ao slálom.
O máis pequeno do club, Alejandro Barreiro, foi o gañador da categoría prebenxamín. Javier Luch, fixo o mellor tempo da categoría benxamín na súa segunda baixada, proclamándose campión galego de K1. Pedro Lomba rematou sétimo en K1 alevín. Mateo Álvarez, tivo participación dobre, en kaiak e canoa, fixo dúas baixadas impecables sen penalizacións en K1, rematando sétimo en K1 e oitavo en C1. O seu compañeiro de categoría, Adrián Lluch tamén tivo dobre participación, rematando sétimo en C1 e décimo en K1.

Na clasificación final por clubs, o Club Deportivo Miño-Teixugos, rematou en quinto lugar.

Dende o Club Deportivo Miño queren animar aos nenos e nenas de Tomiño a probar este deporte anotándose en slálom como actividade extraescolar. A través do slálom foméntase a actividade física, a deportividade e a amizade, e a única condición que se necesita e saber nadar, o resto, chaleco, pa, casco e barco, facilítaos o Club.