domingo, 29 de diciembre de 2019

1ª COPA GALEGA DE SLÁLOM, MONDARIZ: 29/12/2019

Este domingo deu comezo a Liga Galega de Slálom en augas do río Tea ao seu paso por Mondariz Balneario. Madrugadora, a poucos días do comezo do novo ano, o Club Tea de Mondariz organizou a 1ª Copa Galega de Slálom, correspondente xa a tempada 2020.
Sesenta deportistas de cinco clubs galegos acudiron ao evento. O Club Deportivo Miño acudiu con sete piragüistas, rematando todos nesta ocasión cunha medalla.
En categoría feminina, Ainhoa Barreiro e Alba Soutelo, baixaron tanto en canoa como en kaiak cadete. Alba acadou o ouro nas dúas modalidades e a súa compañeira Ainhoa foi prata, tamén nas dúas.
En C1 sénior Brais Castro foi o gañador , e seu irmán Samuel tamén gañou en C1 cadete.
Na categoría k1 cadete os teixugos coparon o podio, o ouro foi para Sergio Rodríguez, prata para Alexis Segadaes e bronce para Mateo Rivas.
Non puido ser mellor o resultados para os do Club Deportivo Miño cos cinco ouros, tres pratas e un bronce, acadados. Na clasificación final por equipos os gañadores foron os anfitrións do Tea de Mondariz con 152 puntos, e o Club Deportivo Miño-Teixugos rematou segundo con 139 puntos.







domingo, 22 de diciembre de 2019

GALA DO PIRAGÜISMO GALEGO 2019

Este venres, a Federación Galega de Piragüismo, fixo entrega dos premios aos mellores do ano na súa Gala do Piragüismo Galego. O evento tivo lugar nesta ocasión no edificio da Xunta, en Campolongo, Pontevedra.
O Club Deportivo Miño-Teixugos recibiu nesta ocasión tres galardóns. 

O canoísta Luís Fernández recibiu o premio a mellor deportista masculino sub-23 por o que foi o mellor ano da súa carreira. Este ano formou parte do equipo nacional sub- 23 e absoluto de slálom, na modalidade de canoa. En setembro conseguiu unha medalla de prata por equipos no Campionato do Mundo absoluto celebrado  na Seu D´Urgell, sendo a primeira medalla nun mundial absoluto para o slálom galego. Esta medalla e os bos resultados obtidos en diferentes competicións fixeron que a Federación Galega lle outorgara o premio ao mellor Deportista Galgo sub-23.

Por outra banda o Club Deportivo Miño-Teixugos recibiu o premio ao mellor club galego de slálom, premio que subiu a recoller o presidente Pablo Pousa.

Finalmente Manuel Ochoa recibiu unha mención especial da Federación pola súa medalla de bronce na modalidade de equipos ou patrullas no Campionato do Mundo sub-23, celebrado en xullo en Cracovia.

Inmellorable balance para os Teixugos nesta Gala do Piragüismo Galego cos tres galardóns acadados. Agora toca facer frente a tempada 2020 e intentar mellorar os fantásticos resultados desta.


 

martes, 17 de diciembre de 2019

II TAÇA DE PORTUGAL DE SLÁLOM:14-15/12/2019

A pasada fin de semana celebrouse na localidade portuguesa de Amarante a II Taça de Portugal de Slálom coa participación de piragüistas portugueses e galegos. 
Do Club Deportivo Miño  acudiu ao evento Alexis Segadaes, participando na modalidade de k1  categoría cadete. Despois de superar as clasificatorias a primeira hora do domingo, Alexis fixo unha boa baixada nas finais, marcando o mellor tempo da categoría, pero seis segundos de penalizacion por tres toques, fixeron que rematara en segundo lugar, a apenas vintedúas centésimas de segundo de José Ferreira do Augas Bravas Clube. Medalla de prata, por tanto, para Alexis nesta IITaça Portuguesa de Slálom.



domingo, 29 de septiembre de 2019

CAMPIONATO DO MUNDO, SEU D´URGELL: 25a29/09/2019

Do 25 ao 29 de setembro celebrouse na localidade ilerdense da Seu D`Urgell o Campionato do Mundo de Slálom no que se deron cita os mellores deportistas do mundo da modalidade. O canoísta de Salceda, Luís Fernández, do Club Deportivo Miño Teixugos, foi un dos doce deportistas que integraron a selección española.

O mércores 25, Luís estreouse no mundial na competición por equipos, xunto co vasco Ander Elosegui e o catalá Miquel Travé, cunha baixada rápida e sen penalizacións, fixeron o segundo mellor tempo do mundial na modalidade C1, conquistando a medalla de prata. No día seguinte, Luís comezou a súa participación individual, onde, cun percorrido rápido e perfecto, conseguiu facer o décimo mellor tempo, que o clasificou directamente para semifinais. A primeira hora da mañá do sábado buscou entrar nas finais, pero catro segundos de penalizacións e unha baixada algo lenta deixárono fóra, rematando finalmente na vixésimo oitava posición, que colocan ao teixugo na elite mundial da canoa de slálom.

Outra galega, Ainhoa Lameiro do Piragúismo Penedo, tamén formou parte do equipo feminino de C1, e ao igual que Luís acadou medalla de prata por equipos, e, nas clasificatorias individuais, aínda que fixo dúas baixadas correctas, non foron o bastante rápidas como para poder entrar en semifinais.

Primeira participación galega nun mundial absoluto, con dúas medallas de prata históricas que demostran o bo momento que está vivindo o slálom galego, que pouco a pouco se está metendo na elite do slálom nacional e mundial.


domingo, 22 de septiembre de 2019

CAMPIONATO GALEGO DE PROMOCIÓN DE SLÁLOM, DUMBRÍA:22/09/2019

Este domingo as augas do río Xallas na localidade de Dumbría recibiron aos máis pequenos do slálom galego para competir no Campionato Galego de Promoción . A competición caracterizouse pola baixa participación, apenas 60 deportistas das categorías pre-benxamín, benxamín, alevín e infantil. Cada deportista fixo dúas baixadas, puntuando para posición a mellor das dúas.

O club Deportivo Miño acudiu ao evento con seis deportistas, que deron o mellor de si mesmos no ambiente de amizade e deportividade que caracteriza ao slálom.
O máis pequeno do club, Alejandro Barreiro, foi o gañador da categoría prebenxamín. Javier Luch, fixo o mellor tempo da categoría benxamín na súa segunda baixada, proclamándose campión galego de K1. Pedro Lomba rematou sétimo en K1 alevín. Mateo Álvarez, tivo participación dobre, en kaiak e canoa, fixo dúas baixadas impecables sen penalizacións en K1, rematando sétimo en K1 e oitavo en C1. O seu compañeiro de categoría, Adrián Lluch tamén tivo dobre participación, rematando sétimo en C1 e décimo en K1.

Na clasificación final por clubs, o Club Deportivo Miño-Teixugos, rematou en quinto lugar.

Dende o Club Deportivo Miño queren animar aos nenos e nenas de Tomiño a probar este deporte anotándose en slálom como actividade extraescolar. A través do slálom foméntase a actividade física, a deportividade e a amizade, e a única condición que se necesita e saber nadar, o resto, chaleco, pa, casco e barco, facilítaos o Club.

domingo, 8 de septiembre de 2019

COPA DO MUNDO, PRAGA: 6 a 8/09/2019

Luís Fernández, en canoa, e Manuel Ochoa, en kaiak, formaron parte do equipo nacional que acudiu esta semana a última Copa do Mundo de Slálom celebrada na cidade checa de Praga do 6 ao 8 de setembro. Foron os únicos galegos que a Federación Española de piragüismo convocou para esta competición.
O venres seis tiveron lugar as clasificatorias, nas que cada deportista gozou de dúas oportunidades para poder entrar nas semifinais.
En C1 masculino cincuenta e cinco canoístas de todo o mundo intentaron estar entre os trinta mellores para acceder a semifinais. Luís fixo unha primeira baixada algo lenta, e na porta 16 penalizou con 50 segundos, quedando fóra; na repesca fixo unha baixada rápida, con tempo de entrar en semifinais, pero un toque no remonte da porta 11, con dous segundos de penalización, deixárono fóra. Na clasificación final do evento Luís rematou trixésimo quinto.
En K1 masculino, a máis numerosa das categorías con 78 deportistas participantes, acadaban praza en semifinais os corenta mellores. Manuel fixo os seus dos intentos para conseguilo, facendo dúas baixadas correctas, sen fallos nin penalizacións, pero lentas, lonxe das súas marcas, quedando fóra. Rematando a Copa no posto cincuenta e un.
 Para Manuel esta é a última competición da tempada 2019, na que acadou éxitos tales como o subcampionato de España absoluto ou o bronce por equipos no Campionato do Mundo sub-23. Despois dun breve e merecido descanso comezará a preparar xa a tempada 2020.
Luís, pola súa banda, formará parte da selección española que participará no Campionato do Mundo a celebrar do 25 ao 29 de setembro na canle da Seu D´Urgell. Esta é unha competición de gran importancia, pois nela se decidiran as prazas para Tokio 2020. Luís pode acadar resultados históricos para o piragüismo galego, pois é bo coñecedor desta canle onde leva adestrando moitos anos xa.

domingo, 1 de septiembre de 2019

4 COPA DO MUNDO, MARKKLEEBERG: 30 a 1/09/2019

Do 30 de agosto ao 1 de setembro tivo lugar en Markkleeberg, Alemania, a cuarta Copa do Mundo de Slálom. España acudiu ao evento co seu equipo sénior de slálom do que formou parte Luís Fernández, deportista do Club Deportivo Miño-Teixugos.
O deportista de Salceda foi un dos tres representantes españoles na modalidade de canoa. O venres 30 Luís fixo a súa primeira baixada para entrar entre os vinte primeiros e acceder a semifinais, fixo unha baixada correcta, pero algo lenta, que xunto con catro segundos de penalización por dous toques o deixaron fóra. Nesa mesma mañá baixou por segunda vez e tampouco tivo a sorte da súa parte, e non conseguiu praza en semifinais. Rematou a súa participación nesta copa no trixésimo quinto lugar.
Outra galega tamén formou parte do equipo, a salcedense do Club Piragüismo Penedo Te Importa Ainhoa Lameiro, tamén na modalidade de canoa. Ainhoa conseguiu entrar en semifinais pero non nas finais, rematando no vixésimo quinto lugar.
Do 6 ao 8 de setembro Luís acudirá a última Copa do Mundo desta tempada a celebrar en Praga, na República Checa, nesta ocasión tamén formará parte do equipo nacional o seu compañeiro de club Manuel Ochoa.

domingo, 25 de agosto de 2019

CAMPIONATO DE ESPAÑA "JÓVENES PROMESAS", SABERO: 24-25/08/2019

Esta fin de semana celebrouse na localidade leonesa de Sabero o Campionato de España “Jóvenes Promesas de Slálom”. Deportistas das categorías infantil e cadete de toda España déronse cita na canle de augas bravas de Alejico.

 O Club Deportivo Miño-Teixugos acudiu a cita con oito piragüistas que deron o mellor de si sobre as augas do río Esla. O sábado tiveron lugar as probas clasificatorias que daban acceso as semifinais a celebrar o domingo.

Na categoría cadete Samuel Castro en C1 e Alba Soutelo en K1 e C1, e Ainhoa Barreiro en K1, non tiveron sorte e quedaron fóra das semifinais. Si conseguiron superar as clasificatorias Ainhoa Barreiro en C1, Sergio Rodríguez en K1 e Alexis Segadaes tamén en K1. Na categoría Infantil Mateo Alvarez en K1 e Adrián Lluch en K1 e C1, non conseguiron cas dúas baixadas acadar un posto nas semifinais, aínda que estiveron moi preto de conseguilo.

O domingo Alexis Segadaes, en K1 cadete, fixo unha boa baixada en semifinais, pero o tempo non lle permitiu a entrada na final, rematando a competición cun meritorio décimo lugar. Na mesma categoría Sergio Rodríguez si acadou praza nas finais onde fixo o terceiro mellor tempo, acadando por tanto a medalla de bronce. En C1 muller cadete houbo finais directas, e Ainhoa Barreiro baixou ben e sen penalizacións, rematando terceira e conseguindo a a medalla de bronce.

Bo balance para os Teixugos neste campionato de España con dúas medallas de bronce, pero sobre todo boa experiencia para os máis pequenos do Club que aproveitaron para remar e adestrar nunha canle adaptada para o seu deporte, canle da que carece Galicia, e sobre todo para intercambiar experiencias e amizades con outros deportistas do resto de España.

Tamén se celebrou nestas xornadas o “Campeonato de España Infantil por Autonomías” acadando os galegos a terceira posición por detrás de vascos e catalás.

domingo, 4 de agosto de 2019

CAMPIONATO DE ESPAÑA 2019, LA SEU D´URGELL:3-4/08/2019

Esta fin de semana tivo lugar no Parque Olímpico do Segre, na localidade ilerdense da Seu D`Urgell o Campionato de España de Slálom. Máis de douscentos deportistas de toda España se deron cita nas augas da canle olímpica para disputar a última e máis importante das competicións da liga española de slálom olímpico. 

O sábado pola mañá tiveron lugar as clasificatorias para entrar en semifinais, cun circuíto complicado na xa de si complicada canle da Seu. Pola tarde celebráronse as competicións por equipos. Rematou o campionato na mañá do domingo coas distintas semifinais e finais. 

O Club Deportivo Miño-Teixugos acudiu con 10 dos seus deportistas que deron o mellor de si mesmos, rematando cun balance histórico para club.

  Manuel Ochoa en K1 absoluto ou sénior, superou as clasificatorias, entrando en semifinais co terceiro mellor tempo. Na mañá do domingo fixo unha moi boa semifinal que lle deu acceso a finais, nas que so entraban os dez mellores deportistas. Nunha final de infarto, Manu fixo unha baixada rápida e sen penalizacións que nun primeiro momento o daba como campión, pero o equipo arbitral estimou unha reclamación interposta polo vasco Samuel Hernanz, no que se lle retirou unha penalización por toque de dous segundos, que lle deu o campionato, quedando o teixugo Manu en segundo lugar. Histórica medalla de prata, pois é a primeira acadada por un galego en K1 nun campionato de España na categoría absoluta. 

Tamén en K1, pero categoría veteranos, Emilio Rodríguez conseguía na mañá do sábado entrar en finais co terceiro mellor tempo. Xa no domingo fixo unha boa baixada, rematando terceiro por detrás do catalá Carles Juanmartí e do vasco Urko Zabaleta, o que lle supuxo a medalla de bronce da categoría. 

A terceira medalla foi para o canoísta Luís Fernández. O deportista tivo unha actuación que solo pode cualificarse como excepcional. Na mañá do sábado conseguiu un posto en semifinais co cuarto mellor tempo, xa na mañá do domingo fixo unha baixada perfecta en semifinais que o levaron a finais co mellor tempo de todos. E na baixada decisiva rematou terceiro, por detrás do vasco Ander Elósegui e do catalá Miquel Travé. Medalla de bronce, por tanto, para Luís en C1 sénior. Este posto tamén lle deu a Luís o acceso a unha praza que había vacante na selección española e que o levarán a disputar o Campionato do Mundo a celebrar nesta mesma canle, campionato nos que se decidiran as prazas para a vindeira olimpíada de Tokio. 

Sergio Rodríguez e Alexis Segadaes, en K1 cadete, tamén conseguiron superar as clasificatorias. Nas semifinais do domingo Alexis rematou duodécimo, quedando fóra de finais por moi pouco o seu compañeiro Sergio fixo o terceiro mellor tempo, o que lle deu entrada en finais con serias aspiracións a medalla. Durante a final fixo unha baixada algo lenta que o deixaron finalmente nun décimo lugar. 

A outra semifinalista foi Ainhoa Barreiro en K1 e C1 cadete, rematando sétima nas dúas categorías, quedando fóra de finais pois só entraban as cinco mellores, ao ser unha categoría pouco numerosa. 

Alba Soutelo en k1 e C1 cadete, Samuel Castro en C1 cadete e Brais Castro en C1 sénior, que non conseguiron clasificarse para semifinais, e Mateo Álvarez como abridor, completaron o equipo de deportistas o Club Deportivo Miño nesta importante cita. 

Ao longo da tarde do sábado tivo lugar a competición por equipos, tamén denominada patrullas. En C1, o equipo formado por Luís, Emilio e Brais rematou sétimo. En K1 o equipo formado por Manu, Luís e Brais rematou en sexto lugar. 

Xa como colofón a esta xornada, que para os Teixugos solo pode ser cualificada de histórica, destacar o cuarto lugar acadado polo Club Deportivo Miño na clasificación da Liga Española de Slálom por clubs, por detrás do Atlético San Sebastián, o Cadí e o Santiagotarrak. 
 Para ver máis fotos preme AQUÍ




domingo, 21 de julio de 2019

CAMPEONATO DO MUNDO SUB-23, CRACOVIA: 16 a21/07/2019

Do 16 ao 21 de xullo celebráronse na cidade polaca de Cracovia os Campionatos do Mundo Júnior e Sub-23 de Slálom. Dous deportistas do Club Deportivo Miño formaron parte da selección española para este evento, Manuel Ochoa en K1 Sub-23 e Luís Fernández en C1 Sub-23.

O martes 16 comezou o campionato coa modalidade de patrullas ou equipos, na que os tres integrantes da selección baixan xuntos. Luis Fernández, xunto con Miquel Travé e David Burgos fixeron a súa baixada na competición de canoa sub-23, o seu percorrido e velocidade foron boas, pero tres toques supuxéronlles seis segundos de penalización, rematando décimos do mundo. Máis tarde chegoulle a vez ao equipo formado por Unai Nabaskues, David Llorente e o teixugo Manuel Ochoa na modalidade de K1 sub 23. Fixeron unha baixada rápida e con apenas dous segundos de penalización, por un único toque nunha porta, que os deixou como o terceiro mellor equipo do mundo e unha medalla de bronce no seu haber.

No mércores comezaron as competicións individuais dos deportistas sub-23, con dúas mangas por categoría para intentar acadar praza en semifinais. Luís Fernández fixo unha boa primeira manga, pero tres toques cos seis segundos de penalización deixárono fóra de semifinais. No segundo intento, cun recorrido rápido e sen penalizacións conseguiu pase a semifinais. O xoves , xa en semifinais, fixo unha baixada boa e rápida, con apenas 2 segundos de penalización, pero non conseguiu estar entre os dez mellores, quedando fóra de finais. Luís rematou o campionato na vixésimo terceira posición.

Manuel Ochoa comezou a súa primeira manga arriscando moito para acadar un bo tempo, o que o levou a cometer un erro nunha das portas que lle supuxo unha penalización de cincuenta segundos. Xa no segundo intento, fixo un percorrido rápido, pero tocando tres portas, seis segundos de penalización que o deixaron fóra de semifinais, rematando o campionato na trixésimo segunda posición. Manuel participou tamén nunha nova modalidade de piragüismo denominada kaiak extremo, rematando en sétimo lugar.

Outros dous deportistas galegos formaron parte da selección española, os dous do club veciño Piragüismo Penedo de Tui. Daniel Pérez en C1 júnior, chegou a finalista rematando décimo e a súa compañeira Ainhoa Lameiro en C1 sub-23, tamén finalista, rematou novena.

Rematada a competición internacional sub-23 o seguinte reto dos deportistas do Club Deportivo Miño Teixugos estará no Campionato de España a celebrar os días 3 e 4 de agosto na canle da Seu D´Urgell.



domingo, 7 de julio de 2019

CAMPIONATO DE EUROPA SUB-23, LIPTOVSKY: 4a7/07/2019

Luís Fernández en C1 e Manuel Ochoa en K1, do Club Deportivo Miño-Teixugos, foron quen de superar as complicadas probas de selección da Federación Española de Piragüismo para formar parte do equipo nacional sub-23 de slálom, e, ao longo desta semana, tiveron a súa primeira competición internacional, concretamente o campionato europeo.
 Do 4 ao 7 de xullo tiveron lugar na localidade eslovaca de Liptovsky os Campionatos Europeos Júnior e Sub-23 de piragüismo, na modalidade de slálom. Os teixugos Luís Fernández e Manuel Ochoa formaron parte dos vinte e catro deportistas do equipo nacional.

Luís, formando parte do equipo de canoa sub-23, fixo a súa primeira baixada nas clasificatorias na mañá do xoves, intentando acceder a un posto nas semifinais. A súa actuación foi boa, sen penalizacións, pero algo lenta, deixándoo fóra das semifinais. Pola tarde, na segunda baixada de repesca, tampouco tivo sorte, cunha baixada con seis segundos de penalización e que o deixaron xa fóra da competición, rematando finalmente vixésimo noveno. O venres cinco, xunto cos seus compañeiros de canoa David Burgos e Miquel Travé, participou na modalidade de equipos ou patrullas, rematando no oitavo lugar.

Pola súa banda, Manu, tivo a súa primeira actuación a primeira hora do venres na complicada e numerosa modalidade de kaiak, fixo unha baixada sen penalizacións, pero moi lenta, que o deixaron lonxe de semifinais. Xa pola tarde, na eliminatoria de repesca, , tivo unha baixada impecable e rápida, pero un pequeno erro nunha das portas supúxolle unha demora de tres segundos que o deixaron fóra de semifinais. Rematou o europeo en trixésimo sétimo lugar. Esa mesma tarde participou na modalidade de equipos xunto a David LLorente e Unai Nabaskues. O equipo tivo unha actuación correcta, pero lenta, acadando un oitavo posto.

Outros dous galegos acadaron praza no equipo nacional, os dous do club tudense Piragüismo Penedo. Daniel Pérez, en canoa júnior conseguiu entrar en semifinais, pero non en finais, rematando vixésimo. Ainhoa Lameiro, en canoa sub-23, tamén acadou semifinais, e quedou fóra de finais por apenas un segundo e medio de tempo, conseguindo un décimo terceiro posto.

Rematado o europeo, o equipo español pon rumbo a Cracovia, onde participaran no Campionato do Mundo sub-23 e júnior do 16 ao 21 de xullo, no que tanto Luís como Manu esperan acadar unha boa clasificación.
Fotos: © Nina Jelenc

domingo, 30 de junio de 2019

1ª COPA DE ESPAÑA "JÓVENES PROMESAS", DUMBRÍA: 30/06/2019

De novo esta fin de semana os máis pequenos do Club Deportivo Miño volveron as augas do río Xallas, desta vez para disputar a primeira Copa de España ”Jóvenes Promesas”. Nenas e nenos de entre oito e dezaseis anos de tódolos clubs de España déronse cita nas augas do campo de slálom do Couquiño en Dumbría, nunha fin de semana de competición, convivencia e reivindicación. 

Cinco foron as medallas acadadas polos teixugos na primeira das competicións da Liga Española de Promoción do Slálom. Impresionante foi o balance final das mulleres do noso club. Na categoría cadete Ainhoa Barreiro fixo a mellor baixada en K1, acadando a medalla de ouro por diante da tamén teixuga Alba Soutelo que foi segunda. As mesmas deportistas, pero en canoa ou C1, tamén dominaron o podio, sendo, nesta ocasión, o ouro para Alba e a prata para Ainhoa. A outra medalla foi para o tamén cadete Samuel Castro, que en canoa fixo o segundo mellor tempo, por detrás de Álex Segura do Atlético San Sebastián. Outros tres piragüistas completaron o equipo que acudiu a Dumbría, Sergio Rodríguez foi cuarto en K1 cadete, Mateo Álvarez foi vixésimo en K1 infantil A e Adrian Lluch oitavo en K1 Infantil B. 

Esta xornada, e a da semana pasada, tiveron ademais un certo carácter reivindicativo, pois o slálom galego está loitando pola construción dunha canle de augas bravas en Galicia, que, de facerse, podería chegar a converterse nun importante motor económico e deportivo a nivel nacional, pois a única canle de augas bravas de España atópase na Seu D´Urgell, polo que unha canle galega mobilizaría a deportistas galegos, portugueses e casteláns. 

Finalmente recordar que o vindeiro sábado día 6 de xullo, de catro a sete da tarde o Club Deportivo Miño-Teixugos celebra a súa xornada de portas abertas, dende o club animámosvos a acudir. 


domingo, 23 de junio de 2019

5ª COPA GALEGA DE SLÁLOM, DUMBRÍA:23/06/2019

Este domingo celebrouse a quinta competición da Liga Galega de Slálom na localidade de Olveira, pertencente ao concello de Dumbría. Foi esta unha competición de carácter reivindicativo, pois neste concello estase loitando para conseguir que as administracións dean os permisos pertinentes para a construción dunha canle de slálom.
Dez foron os deportistas do Club Deportivo Miño que acudiron a dar o mellor de si mesmos nas augas do río Xallas.
 Na máxima categoría absoluta ou sénior Luís Fernández foi o gañador en canoa e o seu compañeiro Brais Castro rematou segundo, ouro e prata polo tanto para os dous representantes dos Teixugos. Tamén en C1, pero categoría cadete, Samuel Castro dominou a proba, conseguindo un novo ouro para o Deportivo Miño. Adrian Lluch foi cuarto en C1 infantil. En canoa feminina o club so levou representación na categoría cadete, pero por partida dobre, Ainhoa Barreiro gañou a proba e a súa compañeira Alba Soutelo foi terceira.
A modalidade de kaiak sumou tamén moitas medallas no haber do Club Deportivo Miño. Sergio Rodríguez foi o mellor en K1 cadete cunha gran baixada, na mesma categoría Alexis Segadaes foi quinto. Tamén ouro para Mateo Rivas en K1 infantil, na mesma categoría Adrián Lluch foi quinto. Segunda medalla de ouro na xornada para Ainhoa Barreiro, desta vez en K1 cadete, modalidade na que Alba Soutelo tamén acadou a súa segunda medalla, nesta ocasión de prata.
Non poido ir mellor a competición para o Club Deportivo Miño-Teixugos, cun balance final de seis medallas de ouro, dúas de prata e unha de bronce. Na clasificación final por equipos, remataron terceiros, por detrás do Penedo de Tui e do Tea de Mondariz que resultou gañador do torneo.







domingo, 9 de junio de 2019

4ª COPA GALEGA DE PROMOCIÓN DE SLÁLOM, RIBADUMIA: 09/06/2019


Os máis pequenos do slálom galego déronse cita este domingo na localidade de Ribadumia para celebrar a cuarta competición da Liga Galega de Promoción de Slálom. Seis foron os pequenos Teixugos que participaron no evento. 

Na categoría Infantil, na modalidade K1, Mateo Rivas foi o mellor dos teixugos coa súa terceira posición, Adrián Lluch acadou un meritorio sétimo lugar e Álex González foi décimo segundo. Na mesma categoría, modalidade C1, Adrián Lluch foi o único teixugo en baixar, rematando sexto. 

Javier Luch participou en K1 benxamín facendo a mellor baixada da súa categoría, alzándose coa medalla de ouro. 

Alejandro Barreiro tamén foi o mellor da categoría prebenxamín, conseguindo o segundo dos ouros para o club. 

Dúas medallas de ouro e unha de bronce, foi por tanto, o balance desta competición para o Club Deportivo Miño-Teixugos, que a pesar de ter un equipo minguado, segue colleitando éxitos. 

Este é u deporte individual que fomenta a responsabilidade, e a amizade e convivencia con nenas e nenos de distintos lugares de Galicia, España e Portugal. O único requisito para anotarse e saber nadar. Desde o Club Deportivo Miño anímase as familias de Tomiño e concellos lindeiros a anotar as súas fillas e fillos a este deporte, destacando a total seguridade da súa práctica, pois nenas e nenos están absolutamente concienciados dende o primeiro momento na obrigatoriedade do uso de chaleco e casco. 









domingo, 26 de mayo de 2019

CAMPIONATO GALEGO, COVAS:26/05/2019

Este domingo, nas augas do río Coura, na localidade portuguesa de Covas, tivo lugar o Campionato Galego de Slálom. Esta é a competición máis importante da Liga Galega de Slálom. 

O Club Deportivo Miño-Teixugos, acudiu cun equipo de dez deportistas, moitos dos cales fixeron dobre participación en C1 e K1. 

En C1 muller cadete Ainhoa Barreiro foi a gañadora da proba seguida pola súa compañeira Alba Soutelo, que foi prata. As dúas participaron tamén na modalidade de K1, onde Ainhoa foi segunda, por detrás de Roxana Bernárdez do Club Tea, e Alba fixo tamén podio, rematando terceira.

 En K1 infantil Mateo Rivas conseguiu a medalla de prata por detrás de Martín Fernández do Piragüismo Dumbría, e o seu compañeiro Adrián Lluch rozou o podio co seu cuarto lugar. 

En K1 cadete, Sergio Rodríguez acadou o bronce e, na mesma categoría, Alexis Segadaes foi quinto. Tamén en cadete, pero en C1, Samuel Castro rematou segundo por detrás de Brais Caride do Piragüismo Penedo. 

Na categoría absoluta ou sénior, en C1, Luís Fernández gañou a proba, seguido do tamén teixugo Brais Castro. Na modalidade de K1, Emilio Rodríguez conseguiu a medalla de prata por detrás de Axel Afonso do Club Tea, e Brais Castro, que tamén baixou en kaiak ramatou cuarto. 

Moi bos resultados para o Club Deportivo Miño-Teixugos, con dous campións galegos, Luís Fernández en C1 sénior e Ainhoa Barreiro en C1 cadete, seis medallas de prata e dúas de bronce. 

Na clasificación final por equipos, o gañador do Campionato foi o Club Tea de Mondariz, en segundo lugar quedou o Club Piragüismo Penedo e terceiros o Club Deportivo Miño-Teixugos. 

domingo, 19 de mayo de 2019

3ª COPA DE ESPAÑA DE SLÁLOM, SEU D´URGELL:18/19-05-2019

Esta fin de semana tivo lugar na canle da localidade catalá da Seu D´Urgell a 3ª Copa de España de Slálom Olímpico. O Club Deportivo Miño-Teixugos acudiu cun equipo moi minguado, so seis deportistas, coas ausencias de Manu Ochoa, Laura Alonso e Mateo Álvarez por un fallo informático que os deixou fóra das listas, e dos irmáns Castro, Brais e Samuel, por compromisos persoais. 

Alba Soutelo, deportista cadete, participou tanto en C1 como en K1. En K1 cadete conseguiu o sábado entrar en semifinais, e no domingo non foi quen de facer final, rematando novena. En C1 no sábado conseguiu praza para final directa, rematando finalmente nun meritorio cuarto lugar. 

Ainhoa Barreiro, tamén na categoría cadete, e tamén dobrando participación, C1 e K1, durante a mañá do sábado non foi quen de entrar en ningunha das dúas semifinais, rematando oitava en C1 e undécima en k1.

 Luís Fernández, na máxima categoría de C1, a categoría sénior, fixo unhas moi boas clasificatorias entrando en semifinais cun cuarto posto. Nas semifinais do domingo fixo unha impresionante baixada que o meteron en finais co segundo mellor tempo, a súa final foi boa, pero non o suficiente para lograr medalla, rematado cuarto, a quince centésimas de segundo da medalla de bronce. 

Emilio Rodríguez, na categoría K1 veterano, nas clasificatorias do sábado logrou entrar nas finais co segundo mellor tempo. Xa nas finais do domingo fixo o terceiro mellor tempo, acadando a medalla de bronce, a única coa que regresaron os Teixugos. 

Alexis Segadaes, en K1 cadete, foi quen de entrar en semifinais coa súa baixada do sábado, pero xa no domingo non conseguiu entrar en finais , rematando vixésimo. 

Na mesma categoría, Sergio Rodríguez, tamén deu entrado en semifinais coa súa actuación do sábado. Xa na mañá do domingo, fixo unha baixada moi correcta, pero algo lenta que o deixaron fóra de finais, rematando duodécimo.

 Na clasificación final por equipos, o Club Deportivo Miño-Teixugos rematou e quinta posición.






domingo, 5 de mayo de 2019

SELECTIVOS NACIONAIS 2019, SEU D´URGELL E PAU: 26/04/2019 a 05/05/2019

Desde o 26 de abril ao 5 de maio, a federación española xunto coa francesa fixeron os selectivos para conformar os seus equipos nacionais. Foron catro as probas as que tiveron que facer fronte os mellores deportistas españois de cada modalidade. As dúas primeiras probas celebráronse na canle da Seu DÚrgell do 26 ao 28 de abril, e as dúas seguintes na localidade francesa de Pau do 1 ao 4 de maio. Para os atletas senior e sub-23 sumáronse os tres mellores resultados, descartándose o peor, para os júnior os dous mellores, descartando outros dous. 

Once foron os representantes galegos que conseguiron entrar nestes selectivos, dos cales tres eran do Club Deportivo Miño-Teixugos: Brais Castro e Luís Fernández en canoa e Manuel Ochoa en kaiak. Foron uns selectivos difíciles, con moitos resultados sorprendentes, nos que deportistas que partían como favoritos estiveron a piques de quedarse fóra. Os teixugos puxeron todo da súa parte e deron o mellor de si, pero no slálom o máis pequeno fallo págase caro. 

Brais Castro conseguiu facer unhas baixadas bastante correctas, pero algo lentas que o deixaron fora do equipo español. 

Luís Fernández tivo unha competición bastante irregular, unha primeira baixada mala, cunha penalización de 50 segundos, as dúas seguintes moi boas, facendo final nas dúas, e xa no último día, un pequeno fallo que o árbitro non pasou por alto, deixouno fóra do equipo nacional sénior e sub-23 por primeira vez en moitos anos. Luís e Brais terán posibilidade de repesca para o equipo sénior no Campionato de España de Slálom a celebrar no mes de agosto. 

Manuel Ochoa tamén comezou con mal pé, cunha penalización de 50 segundos que o deixaron nos últimos postos. Na segunda proba fixo a súa mellor baixada, gañando a final B, na terceira foi correcto pero lento e xa na cuarta tamén acadou final B. Estes resultados deixárono fóra da selección sénior pero permítenlle facerse cunha das tres prazas do equipo nacional sub-23 de K1 xunto co segoviano David LLorente e o vasco Unai Nabaskues. Este é o segundo ano consecutivo que o teixugo se fai cun lugar no equipo nacional sub-23 de kaiak, sendo o primeiro e único galego que forma parte do equipo español na modalidade K1. No mes de xullo Manuel acudirá ao Campionatos do Mundo e de Europa júnior e sub-23 a celebrar en Cracovia e Liptovsky, respectivamente. 

Xunto con Manuel, outros dous galegos, os dous do Penedo Te Importa de Tui, acadaron praza, Daniel Pérez formará parte da selección española júnior en C1 e Ainhoa Lameiro, a gran revelación destes selectivos, acadou unha histórica praza no equipo de C1 feminino sénior e tamén no sub-23, sendo a primeira deportista galega en conseguilo. 




domingo, 28 de abril de 2019

2ª COMPETICIÓN DE PROMOCIÓN-O CORDEIRO: 28/04/2019

Este domingo tivo lugar en O Cordeiro, Salvaterra, a segunda das competicións da Liga Galega de Promoción de Slálom.
A Liga de Promoción abarca os máis pequenos dos diferentes clubs galegos, concretamente as categorías pre-benxamín, benxamín, alevín e infantil.
Un total de cincuenta nenas e nenos tomaron a saída, dos cales catro foron en representación do Club Deportivo Miño-Teixugos.
Adrián Lluch rematou sexto en C1 Infantil e undécimo en K1. Na mesma categoría Mateo Rivas rematou décimo.
 En K1 Benxamín Javier Lluch foi segundo, medalla de prata, polo tanto, e o seu compañeiro de categoría, Sergio Álvarez, rematou quinto.
 En K1 pre-benxamín Alejandro Barreiro foi primeiro. Na clasificación por equipos os Teixugos remataron na sexta posición.
Nestes momentos o Deportivo Miño, aínda que ten un equipo de promoción algo minguado, conta cun bo equipo nas categorías superiores, con moitos dos seus Deportistas competindo ao máis alto nivel. Ao longo desta semana e a que ven, Brais Castro e Luís Fernández en C1 e Manuel Ochoa en K1 loitarán por conseguir unha das tres prazas para o equipo español nos selectivos nacionais que se celebran nas canles da Seu D´Urgell e de Pau, en Francia.


martes, 2 de abril de 2019

CAMPIONATO NACIONAL PORTUGUÉS- VIZELA: 30/31-03-2019

Esta fin de semana celebrouse na localidade portuguesa de Vizela o Campeonato Nacional de Slálom, correspondente a Liga Portuguesa de Slálom. Como xa é habitual, os clubs galegos tamén acudiron ao evento.
Neste caso, en representación do Club Deportivo Miño só acudiu Alexis Segadaes, na categoría K1 cadete. O sábado Alexis acadou a cuarta posición nas clasificatorias, que lle deron acceso as finais a celebra no domingo. Xa nas finais, Alexis foi o mellor da súa categoría, facéndose coa medalla de ouro.
A vindeira cita co slálom será na Copa Pirineus, onde se dan cita deportistas de todo o mundo, e no que os Teixugos intentarán acadar praza nos selectivos nacionais sénior, sub-23 e júnior.