domingo, 27 de agosto de 2017

CAMPIONATO DE ESPAÑA “JÓVENES PROMESAS” SEU D´URGELL: 26-27/08/2017

Esta fin de semana celebrouse na canle olímpica da Seu D´Urgell o Campionato de España de “Jóvenes Promesas”, co que se pecha a “ XII Liga Española de Jóvenes Promesas de Slálom”, onde competiron deportistas das categorías Infantil e Cadete de toda España. Durante a mañá do sábado cada deportista fixo dúas baixadas, das que contaba só a mellor, o domingo pola mañá outras dúas, contando tamén a mellor das dúas.  O resultado final do campionato ven dado pola suma dos postos do sábado e do domingo.  
Cinco foron os deportistas dos Teixugos que acudiron a esta cita. A primeira medalla foi para Ariadana Pereira que en K1 Cadete onde rematou terceira. En K1 Infantil-B Muller Ainhoa Barreiro foi sétima e Alba Soutelo décima, as mesmas deportista participaron tamén en canoa, rematando Alba quinta e Ainhoa octava. Na categoría Infantil-B Home C1, Samuel Castro acadou medalla de prata e Sergio Martínez foi quinto, na mesma categoría, pero K1, Sergio foi segundo, medalla de prata, por tanto, e Samuel noveno.
 Na clasificación final por equipos o Club Deportivo Miño rematou na quinta posición. 
O sábado pola tarde celebrouse tamén o Campionato de España de patrullas ou slálom por equipos, no que os Teixugos, formando equipos con palistas de varios clubs galegos representando a Federación Galega, acadou dúas novas medallas. En C1 Infantil a patrulla da federación galega na que participaba Samuel Castro dos Teixugos, xunto con Brais Caride e Yoel Costales do Penedo de Tui, quedou en segundo lugar; na mesma categoría, a patrulla formada por Sergio Martínez dos Teixugos, Hipólito Alves do Penedo e Darío Mínguez do Tea foi cuarta. En K1 Infantil a patrulla que integraba a Sergio Martínez foi cuarta e a de Samuel octava. En K1 Infantil feminino, a patrulla formada por Ainhoa e Alba dos Teixugos xunto a Rosana Bernárdez do Tea acadou a medalla de bronce. 






domingo, 20 de agosto de 2017

CAMPIONATO DE EUROPA JÚNIOR E SUB-23 HOHENLIMBURG: 17 a 20/08/2017



Desde o xoves 17 ata o domingo 20 de agosto celebráronse na localidade alemá de Hohenlimburg os Campionatos de Europa e Sub-23 de Slálom.


Dous canoístas do club Deportivo Miño-Teixugos acadaron praza para formar parte da selección que representou a España. Luís Fernández e Brais Castro conseguiron no pasado Campionato de España de slálom superar os selectivos para esta competición, concretamente para a modalidade C1 Home sub-23. Ademais de eles dous, outra galega, Ainhoa Lameiro, do Club Penedo de Caldelas, tamén conseguiu superar os selectivos.


Luís Fernández tivo a súa primeira baixada o venres de mañá, quedando a apenas tres postos de entrar en semifinais, xa pola tarde tivo outra oportunidade, pero nesta ocasión baixou algo máis lento, quedando fóra de semifinais. O seus resultados están por debaixo das súas marcas habituais, probablemente debido a que se viu obrigado a competir cunha canoa “de prestado” a causa dun incidente que non lle permitiu o uso do seu material habitual. Na clasificación final acadou o trixésimo segundo posto.


Brais Castro fixo dúas boas mangas con apenas dúas penalizacións, pero algo lentas, e tampouco foi quen de facer semifinais. Rematou na trixésima posición.


A terceira representante galega no campionato Ainhoa Lameiro formou parte do equipo de K1 Júnior e tamén do de C1 júnior. En K1 Ainhoa non foi quen de entrar en semifinais, e acabou no posto trinta. En C1, na mañá do venres, conseguiu pase directo a semifinais na primeira manga cunha duodécima posición. Na mañá do domingo fixo unha boa baixada de semifinais, pero por apenas segundo e medio quedou fóra das finais. Rematou no décimo quinto posto.


O equipo español conseguiu neste campionato dúas medallas de ouro, para Laia Sorribes en K1 Júnior Muller e para Miren Miren Lazcano en C1 Sub-23 Muller, e unha de plata para o equipo español de patrullas en C1 Júnior Home.


Este volve a ser un ano con historia para o slálom galego grazas sobre todo ao traballo do Centro Galego de Tecnificación Deportiva, e iso a pesar de non contar con ningunha canle adecuada para este deporte na comunidade galega. A maioría vese obrigado a desprazarse máis de mil quilómetros para adestrarse na canle da Seu D´Urgell, outros, como Luís Fernández, optan por irse a vivir alí para poder manter un bo nivel de adestramento.

domingo, 13 de agosto de 2017

2ª COPA DE ESPAÑA DE “JÓVENES PROMESAS” DUMBRÍA: 12-13/08/2017

Esta fin de semana disputouse na vila coruñesa de Dumbría a 2ª Copa de España “Jovenes Promesas”, na que compiten as futuras promesas do slálom, concretamente as categorías cadete, infantil A e infantil B. 
A competición comezou a súa primeira fase o sábado e a segunda o domingo, sendo o resultado final a suma dos postos obtidos nos dous días. 
Foilles ben aos pequenos teixugos e teixugas, que viñeron para a casa con sete medallas. En K1 Cadete Muller, Ariadna Pereira foi medalla de ouro. En Infantil B Muller, Ainhoa Barreiro acadou a prata por partida dobre, en K1 e en C1, e na mesma categoría Alba Soutelo foi ouro en C1 e cuarta en K1. En Infantil B Home, Sergio Martínez foi prata en K1 e bronce en C1, na mesma categoría Samuel Castro foi o ouro en C1 e cuarto en K1 e Alexis Segadaes foi sétimo. 
Na clasificación final por equipos, resultou gañador o Cadí Canoe-Kayak da Seu D´Urgell, seguido polo Club Santiagotarrak de Irún e o Piragüismo Penedo de Tui. O club Deportivo Miño-Teixugos acadou o cuarto posto. 





domingo, 6 de agosto de 2017

CAMPIONATO DE ESPAÑA DE SLÁLOM-SABERO: 5-6/08/2017

Esta fin de semana tivo lugar na canle de Alejico-Sabero, en León, o Campionato de España de Slálom, a última é máis importante das competicións da Liga Española de slálom olímpico. 
Foron dous días de infarto, con luces e sombras para o club, que acudiu a evento con 9 deportistas que o deron todo ao longo das dúas xornadas. Esta competición, ademais de decidir os campións e campioas de cada categoría, tamén foron selectivas para formar parte da selección nacional de slálom, o que lle deu máis emoción se cabe. 
En C2 sénior home a parella formada por Luís Fernández e Brais Castro foron terceiros, conseguindo a medalla de bronce da categoría. 
En K1 Júnior Muller, Laura Vaquero rematou sexta e en K1 Cadete, Ariadna Pereira foi sexta. En K1 Sénior Muller, a máxima categoría, Andrea González rematou décimo terceira, Marina Ruedas décimo oitava e Laura Soutelo vixésimo cuarta, as tres moi orgullosas dos seus postos, xa que os seus estudos non lles permitiron apenas adestrar esta tempada. Das tres, Andrea foi a única que entrou no selectivo para o equipo nacional, pero non acadou praza nin en sénior nin en sub-23. 
En K1 Home Júnior, Marco Patiño foi décimo noveno. En K1 Home Veterano, Emilio Rodríguez , foi terceiro, conseguindo a segunda medalla de bronce do Campionato para o club. E xa na máxima categoría, K1 Sénior Home, Manuel Ochoa rematou oitavo. Manuel tamén optou a formar parte do equipo sub-23, posto polo que loitou ata o final, pero que finalmente perdeu na última baixada, na que un pequeno erro nunha das portas fixo que perdera uns segundos que lle custaron o posto para o europeo sub-23 a favor do catalán Jordi Cadena. 
En C1 Home Sénior, máxima categoría de canoa, Brais Castro fixo catro baixadas impresionantes, sen toques, que lle valeron un quinto posto e unha praza no equipo nacional de canoa sub-23 para o europeo a celebrar en Alemaña, dato este, aínda pendente de confirmar pola federación; na mesma categoría, Luís Fernández, que tiña serias aspiracións a medalla, rematou sexto, xa que non puido contar coa súa canoa, pa e material, pois a furgoneta que llos transportaba do Campionato do mundo de Bratislava, sufriu unha avaría e viuse obrigado a competir con material e barco prestado, o que repercutiu moi negativamente nos seus resultados, perdendo non so as posibles medallas, senón tamén o seu posto na selección absoluta de C1. Luís segue mantendo, sen embargo, praza na selección sub-23. 
Na clasificación final por equipos o Club Deportivo Miño-Teixugas, rematou en sétimo lugar. 
E xa como remate da xornada, o club obtivo o 3º lugar na recén estreada Liga Feminina de Slálom, premio Loterías del Estado, o que lle valeu un trofeo e un premio de 500€. Eeste é un recoñecemento ó papel das deportistas femininos, que superan aos masculinos no Club Deportivo Miño- Teixugas, e como homenaxe a elas, vai un pequeno e ben merecido cambio de nome nesta nova e na cabeceira do blog do club. 
Para ver máis fotos da xornada preme AQUÍ 





domingo, 23 de julio de 2017

1ª COPA DE ESPAÑA "JÓVENES PROMESAS"- SORT: 22-23/07/2017

Esta fin de semana celebrouse en Sort, Lleida, a “1ª Copa de España de Jóvenes Promesas”, na que compiten as pequenas promesas do slálom español. O Club Deportivo Miño-Teixugos acudiu con cinco pequenos deportistas, a maioría dos cales participaron tanto en C1 como en K1.
O sistema é similar ao que se usa nas competicións sénior, o sábado fixéronse dúas mangas , da que se contou a mellor de cada nena ou neno, o domingo repítese o mesmo sistema, e a clasificación final ven dada pola suma dos puntos dos postos obtidos en cada un dos dous días.
 En K1 Cadete Muller, Ariadna Pereira foi a gañadora da categoría. Alba Soutelo foi terceira en C1 Infantil-B muller e décima en K1 Infantil-B . Ainhoa Barreiro foi octava en C1 Infantil-B muller e novena en K1 Infantil-B. Samuel Castro foi segundo en C1 Infantil-B home e undécimo en K1 mentras que o seu compañeiro Sergio Martínez foi terceiro en en K1 Infantil-B home e sexto en C1.

Unha medalla de ouro, outra de prata e dúas de bronce son un inmellorable balance para a xornada.Na clasificación final por equipos, o club Deportivo Miño rematou en quinta posición.





CAMPIONATO DO MUNDO JÚNIOR E SUB-23-BRATISLAVA: 18 A 23/07/2017

Ao longo desta semana celebrouse en Bratislava, Eslovaquia, a Campionato do Mundo Júnior e Sub-23 de piragüismo na modalidade de slálom. Nela participou o deportista de Salceda e membro do Club Deportivo Miño Luís Fernández Pereira, que acudiu como un dos tres integrantes do equipo de España de canoa sub-23. 
Luís fixo a súa primeira baixada na mañá do martes, quedando vixésimo primeiro, a apenas un posto de semifinais, no mesmo día pola tarde, na segunda ronda, consegue entrar nas semifinais. 
As semifinais de C1 Home Sub-23 tiveron lugar na mañá do sábado, nas que Luís fixo unha espectacular baixada, que o fixo entrar en finais cun impresionante quinto posto. Nese mesmo día, pola tarde, os dez finalistas fixeron os seus circuítos, a baixada do teixugo foi boa rematando na sétima posición. 
 E xa como remate, na mañá do domingo, Luís formou parte do equipo español de C1 sub-23 na modalidade de patrullas, xunto con Jordi Tebé e Adriá Martí, rematando décimos. 
 Luís Fernández e Ainhoa Lameiro, tamén de Caldelas, pero do Club Penedo, que rematou décimo octava en C1 Júnior Muller, foron os dous únicos galegos que entraron nesta ocasión na selección. Con este resultado, que o colocan entre os mellores canoístas sub-23 do mundo, Luís pecha esta primeira ronda de competicións internacionais coa selección nacional. Na fin de semana do 5 e 6 de agosto, en Sabero , León, terá que facer fronte ao segundo selectivo para formar parte da selección española para a segunda ronda de competicións internacionais. 

domingo, 2 de julio de 2017

3ª COPA DO NOROESTE IBÉRICO DE SLÁLOM- SABERO: 1-2/07/2017

Esta fin de semana tivo lugar na canle de slálom de Alejico –Sabero, en León, a 3ª Copa do Noroeste Ibérico. Está competición que foi pensada para reunir aos equipos do norte de Portugal, Galicia e Castela León, converteuse nesta ocasión nun ensaio para o Campionato de España a celebrar na mesma canle dentro dun mes. Coa ausencia dos equipos portugueses, contou sen embargo con varios deportistas vascos e cataláns, que se sumaron ao evento.



Cada deportista fixo un total de catro baixadas, dúas o sábado e dúas o domingo, contando a mellor das dúas de cada xornada. A clasificación final de cada deportista fíxose coa suma dos postos obtidos en cada un dos dous días.

Os teixugos fixeron un papel inmellorable, en C1 sénior home, Brais Castro foi o gañador da proba. En K1 sénior Manuel Ochoa quedou segundo por detrás do vasco Unai Nabaskues do Atlético San Sebastián. En K1 muller sénior Andrea González e Laura Alonso foron segunda e terceira respectivamente, resultando gañadora Carmen Costa do Baix Cinca. Ariadna Pereira gañou en C1 cadete e foi segunda en K1 cadete. Samuel Castro gañou en C1 infantil e quedou terceiro en K1 infantil, nesta mesma categoría Sergio Martínez foi segundo. Por último tamén infantil, pero feminino, Alba Soutelo foi primeira en C1 e segunda en K1.

Na clasificación final por equipos o primeiro posto foi para o Piragüismo Penedo, o segundo para o Deportivo Miño Teixugos e o terceiro para o Tea de Mondariz.
Para ver tódalas fotos preme AQUÍ

 

domingo, 25 de junio de 2017

LUIS FERNÁNDEZ NA 2ª COPA DO MUNDO- AUGSBURG-ALEMANIA


Esta semana, Luís Fernández,  tivo unha nova participación de coa selección española absoluta. Desta vez na cidade alemana de Augsburg, onde se celebrou a segunda copa do mundo do 23 ao 25 de xuño. O único representante galego na selección española fixo dúas boas baixadas. Tivo dúas opcións para entrar en semifinais, facendo na súa segunda baixada mellor tempo, pero quedando lonxe dos postos de clasificación. Rematou na cuadraxésimo sétima posición, unha boa posición tendo en conta o altísimo nivel dos participantes.

4ª COPA GALEGA DE PROMOCIÓN DE SLÁLOM: 25/06/2017

Este domingo celebrouse na localidade pontevedresa de Ribadumia, sobre as augas do río Umia, a 4ª Competición da Liga Galega de Promoción de Slálom, ao que o Club Deportivo Miño acudiu cun equipo algo reducido de tan só seis deportistas, pero a pesar diso, aínda foi quen de alzarse con catro medallas.

En K1 home infantil Sergio Rodríguez acadou a primeira posición, obtendo por tanto a medalla de ouro, na mesma categoría Samuel Castro foi sexto e Alexis Segadaes sétimo.

En C1 home infantil Samuel Castro foi bronce e Sergio Rodríguez rematou sétimo.

Alba Soutelo obtivo dúas medallas de bronce en K1 muller infantil e en C1 muller infantil.

En K1 home benxamín Javier Luch foi sexto e en K1 home alevín Adrián Lluch foi oitavo.

Na clasificación final por equipos o Club Deportivo Miño rematou quinto.





domingo, 18 de junio de 2017

LUÍS FERNÁNDEZ NA COPA DO MUNDO DE PRAGA

Do 16 ao 18 de xuño tivo lugar en Praga a 1ª Copa do Mundo de Slálom. 
Doce foron os piragüistas que formaron parte do equipo español. Un ano máis entre a elite do slálom español estivo o teixugo Luís Fernández, que foi un dos tres integrantes do equipo español de C1.
 Luís, natural de Salceda,e membro do Club Deportivo Miño Teixugos, aos seus apenas 19 anos leva xa dous anos formando parte do equipo nacional sénior, e está tamén seleccionado para o equipo de slálom sub-23. 
O venres pola tarde fixo a primeira baixada, con apenas seis segundos de penalización, e cun bo tempo,pero que non lle valeu para entrar en semifinais. Unhas horas máis tarde, nese mesmo día, fixo o seu segundo intento de entrar nas semifinais, mellorando o seu tempo anterior en case catro segundos, pero aínda así non foi suficiente para pasar a seguinte rolda. Na clasificación final rematou na cuadraxésima sétima posición. 


domingo, 11 de junio de 2017

4ª COPA DE ESPAÑA DE SLÁLOM, PONTS:10-11/06/2017

Esta fin de semana celebrouse na localidade ilerdense de Ponts a 4ª e última Copa de España de Slálom olímpico. 
Como xa é habitual os resultados finais desta competición obtéñense da suma dos resultados obtidos nas xornadas do sábado e do domingo. Aínda que faltaron os integrantes do equipo nacional, incluído o Teixugo Luís Fernández, por estar concentrados na cidade de Praga preparando a Copa do Mundo, o nivel da competición foi moi alto. 
O Club Deportivo Miño acudiu con seis piragüistas, que deron o mellor de si mesmos. En K1 muller sénior Laura Alonso foi sexta, e Laura Soutelo e Marina Ruedas remataron empatadas na décima posición. Ariadna Pereira acabou quinta en K1 muller cadete e cuarta en C1 . Manu Ochoa rematou sexto en K1 sénior e, por último, a mellor posición da xornada foi para o canoísta Brais Castro que se fixo coa medalla de bronce en C1 sénior. 
Na clasificación final por equipos os Teixugos remataron oitavos, ao acudir a esta copa de España cun equipo moi minguado. 

Aitor Gramendia, Daniel Marzo e Brais Castro

PARTICIPACIÓN INTERNACIONAL PARA LUÍS PEREIRA

A semana pasada, do 1 ao 4 de xuño, celebrouse na cidade eslovena de Tacen o Campionato de Europa de slálom ao que acudiu o Teixugo Luís Fernández como un dos tres integrantes do equipo nacional de C1. Non tivo Luís moita sorte coa súa participación, rematando na trixésimo primeira posición. Nestes momentos atópase concentrado en Praga coa Selección Nacional preparando a Copa do Mundo que se celebrará do 16 ao 18 de xuño. Moita sorte Luís!!!
Luís Fernández en Tacen

lunes, 22 de mayo de 2017

3ª COPA GALEGA PROMOCIÓN DE SLÁLOM: 21/05/2017

Este domingo tivo lugar no porto deportivo de Tui a terceira competición da Copa Galega de promoción de slálom. A competición, que foi organizada polo Club Tea, contou coa participación dos deportistas máis pequenos dos clubs galegos. 
Os nenos e nenas do Club Deportivo Miño remataron con 6 medallas no seu haber. Ainhoa Barreiro foi ouro en C-1 Muller Infantil e prata en K-1. Alba Soutelo rematou terceira nas dúas modalidades anteriores, facéndose por tanto con dúas medallas de bronce. Samuel Castro acadou outra medalla de ouro para o club en C-1 Infantil Masculino e Sergio Martínez prata en K-1 Infantil.
Na clasificación por clubs o Deportivo Miño rematou terceiro con 179 puntos, por detrás do Tea con 239 e o Penedo con 213.









martes, 16 de mayo de 2017

LUÍS FERNÁNDEZ NO EQUIPO NACIONAL DE SLÁLOM

Ao longo das últimas semanas tiveron lugar nas localidades da Seu d´Urgell e Pau os selectivos nacionais para formar parte dos equipos sénior, sub-23 e júnior de slálom.
Os días 6 e 7 de xuño, na canle da Seu, tiveron lugar os primeiros selectivos que solo deron superado dous deportistas do Club Deportivo Miño: Brais Castro e Luís Fernández.
Na seguinte fin de semana, 13 e 14 de xuño, na localidade francesa de Pau, celebráronse os segundos selectivos. Os equipos nacionais formáronse con tres mellores deportistas de cada categoría.
Brais Castro aspiraba a entrar no equipo sub-23 de canoa, pero non foi quen de quedar entre os tres primeiros.
Pola súa banda, Luís Fernández, acadou praza non solo na selección sub-23 senón tamén na absoluta, ao ser o segundo mellor canoísta por detrás do olímpico Ander Elosegui.
Esta praza dálle a Luís o dereito de participar no Campionato de Europa, en tres copas do Mundo e tamén no mundial sub-23.
Luís, natural de Salceda, adestra dende fai anos no centro nacional de slálom da Seu. O logro deste ano é maior se cabe, pois a principio de ano sufriu unha lesión no ombreiro, da que estaba recentemente recuperado cando afrontou as probas selectivas.
Ademais de Luís, só outra galega, Ainhoa Lameiro Lameiro do Piragüismo Penedo, deu superado este ano os selectivos nacionais.




domingo, 7 de mayo de 2017

3ª COPA DE ESPAÑA, SEU D´URGELL: 6-7/05/2017

Esta fin de semana celebrouse a 3ª Copa de España de Slálom na canle olímpica da Seu D´Urgell. A expectación e participación foron máximas xa que ademais as probas forman parte do selectivo nacional para os equipos Júnior, Sub-23 e sénior. O Club Deportivo Miño acudiu nesta ocasión con 5 piragüistas.

Andrea González rematou décimo primeira en K1 sénior e Ariadana Pereira foi oitava en K1 cadete.

Manuel Ochoa rematou décimo primeiro na categoría K1 sénior, a máis numerosa da competición.

Brais Castro rematou sexto en C1 sénior, un bo posto tendo en conta que é o seu primeiro ano na categoría.

Tamén en C1 sénior,  Luís Fernández foi o terceiro clasificado, obtendo por tanto a medalla de bronce. Luís gañou tamén nesta competición o dereito a participar nos selectivos que se celebrarán a semana que ven na canle da localidade francesa de  Pau, e no que ten moitas posibilidades de entrar tanto no equipo  sub-23 como sénior.

Na clasificación xeral por equipos, que gañou o Cadí Canoe Kayak, club local,  o Club Deportivo Miño rematou na novena posición. O mellor club galego foi o Penedo na sexta posición.
Bronce para Luís

lunes, 24 de abril de 2017

2ª COMPETICIÓN DA LIGA GALEGA DE PROMOCIÓN DE SLÁLOM-SALVATERRA: 23/4/2017



Esta fin de semana tivo lugar en Cordeiro, no concello de Salvaterra a 2ª Competición da Liga Galega de Promoción de Slálom, liga na que participan os máis pequenos de clubs galegos e portugueses. O Club Deportivo Miño acudiu ao evento con 12 pequenos deportistas, moitos dos cales dobraron, facendo baixada en cáiac e canoa.
Cinco foron as medallas que os Teixugos acadaron nesta xornada, algunhas menos das esperadas, pero que non quitaron nin ilusión nin ganas aos máis pequenos e pequenas do Club.
A mellor participación do club  foi a de  Ainhoa Barreiro cunha medalla de ouro en C1 e unha de prata en K1 muller infantil. Samuel Castro foi prata en C1 Home Infantil. Sergio Martínez acadou o bronce en K1 Home Infantil e bronce tamén para Alba Soutelo en C1 Muller Infantil.
Na clasificación final por clubs o Club Penedo de Tui declarouse gañador cun total de 216 puntos, seguido do Club Tea de Mondariz con 189, terceiro foi o Piragüismo Dumbría con  178 e xa no cuarto lugar os Teixugos con 174.
Para ver imaxes da xornada preme AQUÍ

domingo, 2 de abril de 2017

2ª COPA DE ESPAÑA, SEU D´URGELL: 1-2/03/2017

Esta fin de semana tivo lugar na canle do Parc Olimpic do Segre, na Seu D´Urgell, a 2ª Copa de España de Slálom Olímpico, pertencente a Liga Española de Slálom. As competicións da Liga de Slálom teñen lugar ao longo de dous días, sábado e domingo, celebrándose en cada un deles clasificatorias e finais. O resultado final obtense coa suma dos postos obtidos nos dou días.
O Club Deportivo Miño participou nesta ocasión con oito dos seus deportistas, obtendo uns moi bos resultados, volvendo de LLeida con dúas medallas de prata.
En K1 sénior feminino,  Andrea González e Marina Ruedas remataron décimo quinta e décimo sexta, respectivamente, unhas posicións do máis dignas nesta complicada canle e nunha tempada na que apenas levan adestrado porque os seus estudos non llo permiten.
En K1 cadete feminino Ariadna Pereira foi sétima, despois de dúas baixadas algo lentas pero sen case penalizacións.
En C1 sénior chegou a primeira medalla para os Teixugos da man de Luis Fernández. Luis rematou segundo tanto sábado como domingo, o que lle valeu a medalla de prata da máxima categoría, solo superado polo olímpico Ander Elosegui. Medalla de prata que sabe a ouro tendo en conta a idade de Luís, este é o seu segundo ano de sénior, e que ademais acusa unha pequena lesión no seu ombreiro.
Tamén en C1 sénior, Brais Castro, que se estrea este ano na categoría,  rematou noveno. O sábado fixo unha moi boa baixada coa que deu entrado en finais e rematou sétimo, o domingo quedou fóra por moi pouco, rematando décimo.
En K1 veteranos chegou a segunda medalla da man de  Emilio Rodríguez, que tanto o sábado coma o domingo fixo dúas moi boas baixadas que lle valeron o segundo posto por detrás de Carles Juanmartí do Cadí, o club local.
En K1 sénior, Manuel Ochoa , tanto sábado como domingo fixo finais, rematando finalmente quinto na categoría máis numerosa desta competición, un posto con moito mérito se se ten en conta o altísimo nivel dos competidores, con apenas décimas de segundo de diferenza nos quince primeiros postos, e que ademais, ao igual que Brais , este é o seu primeiro ano na categoría.
O último dos teixugos en participar foi Marco Patiño, en K1 júnior, que fixo dúas baixadas algo lentas, pero con moi poucas penalizacións, que lle valeron a décimo sétima posición.
Na clasificación final por equipos, o Club Deportivo Miño,  foi o mellor dos clubs galegos coa súa sexta posición.

A seguinte competición da liga XII Liga de Slálom Olímpico “Manuel Fonseca” será o 6 e 7 de maio, no mesmo lugar.
Para ver os resultados preme AQUÍ

domingo, 26 de marzo de 2017

TEIXUGOS NA III GALA DO DEPORTE DE TOMIÑO

Conducida por Terio Carrera e amenizada co humor de Pepo Suevos, na noite de onte tivo lugar no Auditorio de Goián a entrega de premios ao deporte tomiñés na III Gala do Deporte. O Club Deportivo Miño-Teixugos alí estivo con todos os seus rematando a xornada con dous premios no seu haber . 
O primeiro premio que lle foi concedido recaeu sobre Alba Soutelo co Premio a Deportista Feminina con Maior Proxección, premio ao que era tamén candidata Ainhoa Barreiro xunto con varias deportistas máis de outras especialidades. 
O segundo e último premio da noite para os Teixugos foi ao de Mellor Club ou Escola de Base de Tomiño.
Houbo ademais dúas candidaturas máis que ao final non se fixeron co premio,  Pablo Pousa e Emilio Rodríguez ao mellor adestrador e Manuel Ochoa ao mellor deportista.

O presidente Pablo Pousa recollendo o premio ao mellor Club de Base

Alba Soutelo co seu premio á Deportista con Maior Proxección

domingo, 19 de marzo de 2017

VIII TAÇA IBÉRICA DE SLÁLOM: 18-19/ 03 /2017






Esta fin de semana tivo lugar en Covas, Vila Nova de Cerveira, a VIII Taça Ibérica de Slálom, un evento que medra ano a ano e que revoluciona esta pequena aldea cerveirense. Ao longo de dous días máis de 100 deportistas galegos, portugueses e leoneses mostraron as súas destrezas nas augas do río Coura.
Na tarde do sábado tivo lugar a proba clasificatoria con máis de 150 embarcacións , na que os participantes  nos obsequiaron cunhas baixadas espectaculares. O nivel dalgúns dos deportistas foi moi alto o que fixo que moitos se quedaran fóra das finais, a pesar de obter unhas moi boas posicións, ao marcar estes o tempo de corte. Tal foi o caso de Marina Ruedas e Laura Alonso que a pesar de rematar terceira e quinta en K1 sénior feminino non entraron nas finais.
Ao longo da mañá do domingo disputáronse as finais nas que destacaron as actuacións do canoísta olímpico José Carvalho, do ADA de Amarante, gañador en C1 sénior e que marcou o mellor tempo da xornada e a do segundo mellor tempo marcado por o tamén portugués Iván Silva do ABC de Amarante en K1 sénior.
Os Teixugos, un dos organizadores de este evento, acudiu con doce deportistas a medir forzas nas augas bravas do Coura. Sergio Martínez fíxose con dúas pratas en K1 e C1 infantil. O seu compañeiro Samuel Catro foi ouro en C1 infantil e rematou cuarto en K1. Marco Patiño foi sexto en K1 júnior. Na categoría K1 sénior Brais Castro foi sétimo, Emilio Rodríguez décimo e Guillermo Pereira décimo quinto. En C1 sénior Brais acadou a quinta praza. Aihoa Barreiro foi prata en K1 e C1 infantil e na mesma categoría Alba Soutelo bronce en K1 e ouro en C1. Ariadana Pereira fíxose co bronce en K1 cadete.
Por equipos o gañador foi o ABC con 270 puntos, seguidos do C.P. Penedo de Caldelas con 251 e o Tea de Mondariz con 247. Os Club Deportivo Miño rematou cuarto con 223puntos.
Para ver tódolos resultados preme AQUÍ
FOTOS 1
FOTOS 2



domingo, 5 de marzo de 2017

1ª COPA DE ESPAÑA, MONDARIZ 4-5/3/17


 Espectáculo puro foi o que deron as principais figuras do piragüismo de augas bravas do panorama nacional esta fin de semana en Mondariz coa celebración da primeira das competicións da Liga Española de Slálom.  Máis de 150 deportistas acudiron a cita nas augas do río Tea. Este ano as competicións teñen lugar en dúas xornadas, con clasificatorias e finais en ámbolos dous días, resultando as clasificacións da suma de puntos obtidos nos dous días.
 O Club Deportivo Miño-Teixugos participou con doce dos seus integrantes.  
En K1 sénior feminino,  Andrea González foi a mellor galega no décimo terceiro lugar, Marina Ruedas e Laura Soutelo remataron décimo oitava e décimo novenas respectivamente; nesta categoría resultou gañadora a campioa olímpica Maialen Chorrault, invencible coma sempre.
 En K1 Júnior Feminino Laura Vaquero rematou no quinto lugar. Ariadna Pereira tivo participación dobre, en C1 e K1 Cadete feminino, rematando quinta nas dúas modalidades.
En C1 Sénior Luís Fernández obtivo o mellor resultado para o piragüismo galego ao facerse  coa medalla de prata, solo superado polo olímpico Ander Elosegui. O sábado Luís entrou en finais e rematou terceiro, o domingo fixo tamén finais e nunha espectacular baixada rematou segundo. A suma de puntos e tempos valeulle a medalla de prata na categoría reina masculina. Brais Castro tamén entrou nas dúas finais, rematando sétimo, un moi bo posto tendo en conta que é o seu primeiro ano como sénior.  Nesta mesma categoría Alejandro Ochoa, quedou décimo sexto.
A segunda medalla foi para Emilio Rodríguez en K1 Veterano. O segundo posto do sábado e o primeiro de domingo, fixeron que no cómputo final de puntos Emilio se alzara coa medalla de ouro.
En K1 sénior Manuel Ochoa, tamén no seu primeiro ano na categoría máxima, non tivo moita fortuna pois quedou as portas de finais nos dous días, rematando finalmente décimo. Na mesma categoría Alejandro Ochoa e Guillermo Martínez acabaron nos postos trixésimo segundo e trixésimo terceiro.
Pechou a participación dos Teixugos Marco Patiño en K1 Júnior cunha vixésima posición.
Na clasificación final por equipos o Atlético San Sebastián foi o gañador, seguido polo Cadí  e o Santiagotarrak .O Deportivo Miño acadou o sexto lugar.
Para ver tódalas fotos preme nunha imaxe e na outra.
https://goo.gl/photos/VQ3eGHsfrf2Skq269


 https://goo.gl/photos/Yxp2FXDg36ubd2fU7