ONCE MEDALLAS PARA OS TEIXUGOS NA 3ª COPA GALEGA DE PROMOCIÓN DE SLÁLOM

 

    Este domingo celebrouse en Monforte de Lemos a terceira Copa Galega de Promoción do Slálom, onde se mediron as forzas os máis pequenos do slálom galego. O Club Deportivo Miño-Teixugos acudiu con trece deportistas que deron mostras da súa gran deportividade e calidade. Algúns deles tiveron dobre participación en caiac, K1, e canoa, C1. 

    En C1 Infantil Feminino, podio completo para as teixugas, Nerea Álvarez gañou a prova, Leila Álvarez foi segunda, Catalina Sánchez foi terceira e Beatriz Sánchez rematou cuarta. En C1 Infantil Masculino Lois Montenegro conseguiu a medalla de bronce, e Izan Vicente foi oitavo. 

    En K1 Infantil Feminino de novo dominio total das teixugas, ouro para Leila Álvarez, prata para Rita Olveira e bronce para Nerea Álvarez; Beatriz Sánchez rematou cuarta e Catalina Sánchez foi quinta. En K1 infantil Masculino, Lois Montenegro rematou cuarto, Alejandro Barreiro foi sétimo, Leo Álvarez noveno e Izan Vicente décimo terceiro. 

    Na categoría Alevín Masculina, Roque Olveira conseguiu dúas medallas de ouro, pois foi o gañador tanto de C1 como de K1. En K1 tamén participou Martín Vicente que acabou a proba en sétimo lugar. 

    Na categoría Benxamín K1,os dous representantes teixugos, Iria Álvarez e Brais Vicente, gañaron as súas respectivas competicións. 

    O impresionante balance final para os teixugos foi de once medallas, seis das cales foron ouro. Na clasificación final por equipos o Club Deportivo Miño-Teixugos foi o gañador desta terceira Copa cun total de 247 puntos, compartindo podio co Montaña Quixós de Monforte con 178 puntos e co Penedo-Te Importa de Tui con 127 puntos. 

 

BRONCE PARA NEREA ÁLVAREZ NA 3ª COPA DE ESPAÑA DE SLÁLOM

    Esta fin de semana nova cita cunha Copa de España “Jóvenes Promesas” de Slálom, concretamente a 3ª, na localidade de Sort, en Lleida. Nestas competicións participan mozas e mozos das tres categorías anteriores a júnior: cadete, infantil A e infantil B. Participación moi numerosa, con máis de douscentos palistas de vinte e catro clubs de toda España , seis dos cales pertencían ao Club Deportivo Miño-Teixugos. 

     As nosas representantes da categoría Infantil A feminino, tiveron dobre participación ao baixar en C1 e K1. En canoa, gran actuación de Nerea Álvarez que volveu facer podio ao rematar terceira na final, segundo bronce para a teixuga nas copas de España. Leila Álvarez foi quinta e Catalina Sánchez sétima. En caiac ou K1 Nerea quedou fóra do podio por unha penalización por toque, rematando cuarta a menos dun segundo de acadar un novo bronce; Leila Álvarez despois de facer unhas moi boas clasificatorias, rematou sétima na final; Catalina Sánchez foi oitava. 

    En K1 Infantil B, Rita Olveira pasou as finais quedou sexta. . En K1 Infantil B Masculino Lois Montenegro conseguiu meterse nas finais do domingo, onde rematou cuarto, a menos de dous segundos de subir ao podio. En K1 Cadete Masculino, Brais Cambra non acadou pase a finais, rematando trixésimo quinto. 

    Na clasificación final por equipos o Deportivo Miño-Teixugos rematou quinto por detrás dos grandes clubs catalás e vascos.