COMPETICIÓN AMISTOSA EN COVAS- 27-12-2015

Tres clubs, Tea, Darque e Teixugos, celebraron unha competición amistosa este domingo no río Coura, na localidade portuguesa de Covas.
O ambiente foi do máis lúdico e festivo, nenos e nenas de tódalas idades e categorías competiron como preparación para a tempada 2016, que dará comezo o 23 e 24 de xaneiro coa Taça Ibérica de Slálom.

CAMPIONATO DE PROMOCIÓN DE SLÁLOM- SABERO 22 DE AGOSTOS DE 2015

Esta fin de semana tivo lugar na localidade leonesa de Sabero o Campionato de España de Promoción de Slálom. Nestas competicións participan solo deportistas da categoría infantil, nenos e nenas nacidos nos anos 2001 ou 2002. Dentro desta categoría o Club Deportivo Miño Teixugos conta con Ariadna Pereira e Gabriel Alonso. Ambos deportistas participaron nas categoría de canoa e kaiak. Ariadna Pereira estivo rozando o bronce ao acadar dous cuartos postos en K1 e C1 muller infantil B. Pola súa banda Gabriel Alonso rematou décimo noveno en C1 infantil A home e vixésimo en K1 infantil A home.


Pola tarde celebrouse o campionato de España por autonomías na categoría de patrullas. Ariadna Pereira formou parte dun dos equipos da Federación Galega, xunto con Yasmina Díaz do Quixós e Lorena Costa do Dumbría, acadando este equipo unha medalla de bronce en K1 muller.


Na clasificación por equipos o Club Deportivo Miño rematou duodécimo xa que con so dous deportistas non é doado acadar puntos.

 


O domingo todos os Teixugos que acudiran a Sabero para adestrar participaron no Campionato de Slálom de Castilla León, outros equipos españois quedaron tamén nas ribeiras do Esla para participar neste campionato castelán, que non lles puntuou pero que lles valeu como adestramento e para traer algunha que outra medalla, tal e como atestiguan as fotos.
 

CAMPIONATO DE ESPAÑA, ORTHEZ 1 E 2 DE AGOSTO DE 2015

Esta fin de semana celebrouse na localidade francesa de Orthez o Campionato de España de Slálom Olímpico. Esta é a derradeira e máis importante competición da Liga Española de Slálom Olímpico “Manuel Fonseca” . Sábado e domingo fixeron as súas baixadas na canle francesa os mellores piragüistas de augas bravas de España . O club Deportivo Miño-Teixugos acudiu con sete deportistas que fixeron un moi bo papel. Destaca sobre todo a medalla de prata acadada por Manuel Ochoa en K1 xuvenil Masculino. Brais Castro rematou cuarto na mesma categoría e sexto en C1 xuvenil. Laura Alonso e Andrea González empataron no décimo posto en K1 sénior e Laura Soutelo obtivo a mesma posición en K1 xuvenil. Emilio Rodríguez rematou vixésimo primeiro en K1 sénior e Marco Patiño vixésimo terceiro en K1 cadete. Na clasificación por equipos os Teixugos remataron na quinta posición, sendo o club galego mellor clasificado. Con esta competición remata a Liga Española de Slálom Olímpico deste ano, na que cabe destacar o auxe dos representantes galegos nun deporte que tradicionalmente dominaban vascos e cataláns, e iso que Galicia non conta con ningunha canle para a práctica do slálom.

CAMPIONATO GALEGO DE SLÁLOM, PADRÓN 28 XUÑO DE 2015

Este domingo celebrouse en Padrón, nas augas do río Ulla,  o Campionato Galego de Slálom, a competición máis importante da Liga Galega de slálom. Participaron  clubs galegos e portugueses, aínda que estes últimos non contaban para o medalleiro.

A competición tivo lugar ao longo de todo o día. O Club Deportivo Miño- Teixugos participou con 8 piragüistas, moitos dos cales participaron en dúas modalidades ,canoa e  kaiak.

Remataron como campionas galegas Andrea González en K1 sénior, Sara Vázquez en C1 sénior e Marina Ruedas en K1 júnior. Acadaron medallas de prata Laura Soutelo en K1 júnior, Brais Castro en C1 júnior e  Manuel Ochoa en K1 júnior; e foron bronce Sara Vázquez en K1 sénior, Emilio Rodríguez en K1 sénior, Brais Castro en K1 júnior e Laura Alonso en C1 sénior.

Na modalidade de patrullas, tanto o equipo feminino, formado por Laura Alonso, Andrea e Sara, coma o masculino, formado por Brais, Manuel e Emilio, resultaron gañadores, e por tanto, campións galegos.

Na clasificación por equipos o Club Deportivo Miño-Teixugos rematou segundo por detrás do Club Tea de Mondariz.

Máis fotos AQUÍ

 

3ª COMPETICIÓN DA LIGA GALEGA DE PROMOCIÓN DE SLÁLOM- RIBADUMIA-23 MAIO 2015

FOTOS

3ª COPA DE ESPAÑA 2015-PONTS

Esta fin de semana o Club Deportivo Miño- Teixugos fixo fronte a súa segunda competición na Liga Española de slálom olímpico. A sorte non estivo do lado dos Teixugos na localidade catalá de Ponts, aínda que os postos acadados serían impensables fai uns anos.

Este ano a Federación cambiou o sistema de competición, tendo lugar en dous días, sumándose os postos obtidos, de tal maneira que un primeiro posto suma cero puntos, un segundo dous, un terceiro tres, e así sucesivamente.

Os Teixugos acudiron con 5 piragüistas a esta Copa de España: Emilio Rodríguez, Andrea González, Brais Castro, Manuel Ochoa e Marco Patiño.

Emilio rematou no posto 22 na categoría K1 sénior home e Marco Patiño foi vixésimo oitavo en k1 cadete home.

Andrea González quedou décima o sábado e oitava no domingo, resultando oitava na final de k1 muller sénior. O mesmo posto obtivo Brais Castro en C1 home xuvenil home despois de ser sétimo o sábado e oitavo o domingo. Brais fixo dobrete, e participou tamén en k1 xuvenil home onde foi undécimo, cun décimo posto o sábado e un sétimo o domingo.

Manuel Ochoa o sábado rematou terceiro e o domingo décimo, despois de que un erro nos cronómetros lle obrigara a repetir a súa baixada; acabando cun quinto posto en k1 home xuvenil.

A X Liga de Slálom Olímpico Manuel Fonseca rematará o 1 e 2 de agosto na localidade francesa de Orthez coa celebración do Campionato de España

1ª COPA DE ESPAÑA DE SLÁLOM- SEU D´URGELL

O Club Deportivo Miño participou esta fin de semana na 1ª Copa de España de Slálom Olímpico na canle olímpica da Seu D´Urgell en Lleida.
 Seis piragüistas do equipo partiron cara a Lleida este mércores para adestrar e familiarizarse coa difícil canle desta localidade. Mentres que Andrea González, Brais Castro e Manuel Ochoa xa levaban alí concentrados dúas semanas coa Federación Galega de Piragüismo.
 Este ano ademais esta competición forma parte do Selectivo 1 da Federación Española para configurar os equipos nacionais júnior e sub 23 para o mundial de Foz de Iguacu en Brasil.
No remate as cousas non foron mal para os Teixugos, pero non deron acadado ningunha medalla neste circuíto moi difícil para eles, pois están afeitos a remar en río e non en canle artificial. Os mellores clasificados foron Brais Castro cunha quinta posición en C1 xuvenil e Manuel Ochoa coa mesma posición en K1 xuvenil. Pódese ver os resultados picando AQUÍ.
Destacar tamén que Manuel Ochoa clasificouse para o Selectivo 2 que se se celebrará na canle de Pau en Francia os días 7 e 8 de marzo e no que lle desexamos acade os mellores resultados.

ANDREA GONZÁLEZ GAÑA O XXI SLÁLOM INTERNACIONAL DE FRIDÂO

Este domingo celebrouse na localidade portuguesa de Fridaô o XXI Slálom Internacional . O club Deportivo Miño acudiu con algún dos seus deportistas a esta cita habitual. Aínda que a proba non é puntuable para o circuíto galego, cada ano os Teixugos acoden a Fridaô como preparación para a xa inminente Liga de Slálom, tanto nacional como autonómica. Esta é unha proba difícil, pois compítese en categoría única. Todos os Teixugos entraron en finais, excepto Santiago e Adrián, que por un erro na inscrición quedaron fóra. Nas finais, Andrea González Ucha acadou unha merecida primeira posición na categoría K1 feminina. Sendo a nosa palista mellor clasificada. Nesa mesma categoría Marina Ruedas, Laura Alonso e Laura Soutelo quedaron en 4ª, 5ª e 6ª posición respectivamente. En k1 masculino Manuel Ochoa rematou 4º e Brais Castro 7º, mentres que en C1 masculino Brais Castro acadou o 5º posto. O días 28 de febreiro e 1 de marzo dará comezo o tempada nacional coa 1ª proba do Campionato de España que se celebrará na Seu D´Urgell en LLeida onde esperamos que os Teixugos fagan un bo papel na complicadísima Canle Olímpica desta cidade.