domingo, 21 de noviembre de 2021

COPA SEGRE, SEU D´URGELL, PONTS: 20-21/11/2021

Esta fin de semana celebrouse a Copa Segre, unha competición internacional, que non entra dentro do calendario oficial, pero de gran prestixio no mundo do slálom. O torneo consta de dúas competicións, unha celebrada na canle olímpica da Seu D´Urgell e a segunda na canle de slálom de Ponts. O resultado final é a suma dos resultados acadados ao longo das dúas xornadas. 
O Club Deportivo Miño estivo representado por tres dos seus deportistas. 
Manuel Ochoa participou na categoría K1 sénior. O sábado en clasificatorias acadou o terceiro mellor tempo, nas finais cunha baixada moi rápida e sen penalizacións, rematou en segundo lugar. O domingo, en Ponts, fixo o mellor tempo das clasificatorias, pero nas finais volveu quedar en segundo lugar. Moi boa a competición de Manu, que na suma final de puntos o levaron ao podio como subcampión, por detrás do catalá Miquel Travé e por diante do olímpico David LLorente. 
Ainhoa Barreiro participou en K1 júnior. O sábado, non foi quen de acadar as finais, nas que entran os dez primeiros de cada categoría, pero andivo preto de logralo, rematando no posto doce. No domingo en Ponts mellorou moito os tempos do día anterior, entrando nas finais co sétimo mellor tempo das clasificatorias, na final, tamén fixo unha boa baixada, pero 6 segundos de penalización por toques fixeron que rematara en noveno lugar. Na suma final de puntos a nosa representante rematou décima. 
Alexis Segadaes participou en K1 júnior, a categoría con maior número de participantes. Aínda que fixo boas baixadas, as penalizacións por toques deixárono fóra das finais nas dúas xornadas. Na suma final de puntos rematou no décimo quinto lugar.
Fotos de Norbert Aguilera








domingo, 26 de septiembre de 2021

CAMPIONATO GALEGO DE PROMOCIÓN DE SLÁLOM, MONDARIZ: 26/09/2021

Este domingo celebrouse en Mondariz o Campionato Galego de Promoción de Slálom. Os máis pequenos do slálom galego déronse cita nas augas do río Tea, na máis importante das competición da Liga Galega de Promoción. 
O Club Deportivo Miño acudiu con once piragüistas que desfrutaron e deron o mellor de si mesmos no evento. 
Javier Lluch, na categoría alevín, participou en cáiac e canoa. En C1 ou canoa, impúxose aos seus competidores cunha baixada rápida e sen penalizacións, en K1 ou caiác tamén demostrou as súas habilidades, rematando en segundo lugar. Dobre medalla, ouro e prata, polo tanto, para Javi. 
As outras dúas medallas foron para as irmás Leila e Nerea Álvarez en K1 benxamín. Nerea cunha baixada rápida e sen toques acadou a medalla de prata. Leila, tamén fixo bo tempo, pero os toques fixeron que rematara terceira. Na mesma categoría, Rita Olveiros, foi cuarta. 
Itzel del Río acabou en quinto lugar en K1 prebenxamín feminino. Na mesma categoría, pero masculino, Tiago Rei foi cuarto e Roque Olveira noveno. 
En K1 benxamín masculino, Lois Montenegro rematou sexto, Alejandro Barreiro oitavo e Leo Cortiñas noveno. 
Pedro Lomba, en K1 infantil , foi sexto. 
Na clasificación por equipos o Club Deportivo Miño rematou en cuarto posto. 
Bo balance para os Teixugos que viñeron para a casa con catro medallas, un ouro, dúas pratas e un bronce, nunha competición que pretende promocionar o piragüismo de slálom entre os nenos e nenas galegos, e, na que o máis importante, é que os máis pequenos gocen do deporte e da actividade ao aire libre.






CAMPIONATO DO MUNDO, BRATISLAVA: 22 A 26/09/2021

Ao longo desta semana celebrouse na cidade eslovaca de Bratislava o Campionato do Mundo de Slálom, a máis importante das competicións internacionais desta modalidade. 
A única representación galega no evento foi a do teixugo Luís Fernández Pereira. O deportista do Club Deportivo Miño era un dos tres integrantes do equipo español de canoa que a Federación Española de Piragüismo convocou para o evento. 
A participación comezou para Luís o mércores 22, onde, xunto con Miquel Travé e Ander Elósegui, competiron na modalidade de equipos. Fixeron unha baixada correcta, con poucas penalizacións pero moi lenta, rematando en noveno lugar. 
No día seguinte celebráronse as clasificatorias, onde piragüistas de todo o mundo intentaron acadar un posto en semifinais. Luís fixo unha impresionante primeira baixada, cun tempo de 87,15 segundos, que o meteron directamente en semifinais co sétimo mellor crono. 
O domingo, os trinta semifinalistas, enfrontáronse a un circuíto moi criticado pola súa tremenda dificultade. Luís defendeu moi ben a súa semifinal, cunha baixada rápida, pero dúas penalizacións nas portas de remonte 3 e 10 deixárono fóra da final. Cun tempo de 97,39 segundos, o deportista salcedán rematou nun impresionante décimo cuarto lugar, o que o sitúa na elite do slálom mundial. Con esta competición, dáse por rematada esta tempada 2021. 
Video das semifinais:
 

domingo, 12 de septiembre de 2021

COPA DO MUNDO, PAU: 10 a 12/09/2021

Desde o 10 ao 12 de setembro tivo lugar na canle de augas bravas da localidade francesa de Pau a última das Copas do Mundo de Slálom. España acudiu a cita cos doce deportistas que conforman o seu equipo nacional. Entre os convocados, Luís Fernández do Club Deportivo Miño-Teixugos, único galego que superou os selectivos sénior. 

 Pouca fortuna nesta ocasión para o teixugo, que non deu superado as clasificatorias. No venres, Luís loitou por acadar uns dos postos nas semifinais. A súa primeira baixada foi rápida, pero con demasiados toques nas portas, que lle supuxeron 8 segundos de penalización, quedando fóra. No seu segundo intento, no que entraban os dez primeiros, o trazado non foi tan rápido como o primeiro, pero suficiente para entrar, de non ser por un toque nunha porta, que o deixaron en undécimo lugar, a un posto de entrar en semifinais. 

Do 22 ao 27 de setembro, Luís Fernández, terá a súa última cita da tempada na máis importante das competicións internacionais, o Campionato do Mundo de Slálom, no que se medirá cos mellores canoístas do planeta. 


 

domingo, 5 de septiembre de 2021

COPA DO MUNDO DE SLÁLOM, LA SEU D´URGELL: 3 ó 5/09/2021

 

Do 3 ao 5 de setembro celebrouse na Seu D´Urgell a Copa do Mundo de Slálom. O único galego que formaba parte da selección española foi o canoísta Luís Fernández. Luís, de Salceda de Caselas, forma parte dende fai anos do Club Deportivo Miño-Teixugos. 

Luís comezou a súa competición o venres coas clasificatorias. Na primeira manga, dúas penalizacións que sumaron catro segundos ao seu tempo, deixárono fóra de semifinais. Na segunda manga, si conseguiu unha praza nas semifinais, cun impresionante segundo mellor tempo. 

O domingo , os trinta deportistas que chegaron a semifinais intentaron acadar un dos dez primeiros lugares para entrar nas finais. Un reto complicado que o teixugo superou con nota, nunha baixada rápida e sen penalizacións, que lle valeu o quinto posto e un lugar nas finais. 

Na final Luís fixo unha boa baixada, rápida e correcta, rematando finalmente en sétimo lugar desta Copa do Mundo. Un gran posto que o coloca entre os mellores canoístas do mundo.

 Á  próxima semana Luís acudirá a unha nova Copa do Mundo na localidade francesa de Pau, e a finais de mes ao Campionato do Mundo a celebrar en Bratislava. 

Foto de Norbert Aguilera.


 

 Baixada de finais: 

 

domingo, 29 de agosto de 2021

CAMPIONATO DE ESPAÑA "JÓVENES PROMESAS", SABERO:28 e 29/08/2021

Esta fin de semana celebrouse en Sabero, León, o Campionato de España “Jóvenes Promesas” de Slálom, no que só participan deportistas das categorías cadete e infantil. No sábado tiveron lugar as clasificatorias, dúas mangas, das que se colle a que teña mellor tempo. O domingo foron as finais, os dez primeiros deportistas de cada categoría pasaron a disputar a final A, e os restantes a final B, pois a función principal de esta Liga e potenciar e promocionar o slálom entre os máis novos.

 O Club Deportivo Miño-Teixugos, acudiu con tan so tres deportistas, os tres de categoría cadete masculino. 

Adrián Lluch participou en C1 e K1. En C1 na primeira clasificatoria rematou décimo sétimo e na segunda décimo sexto, pasando, por tanto, á final B onde foi sétimo. En K1, categoría moito máis numerosa, rematou vixésimo quinto nas dúas mangas, e na final B, remontou uns postos e acabou décimo terceiro.

 Mateo Rivas participou en K1, na primeira manga ocupou o vixésimo lugar e na segunda o décimo noveno. Na final B do domingo foi décimo. 

Antón Fernández, tamén en K1, nas mangas clasificatorias rematou trixésimo terceiro e trixésimo oitavo. Na final B rematou décimo quinto.

Un bo papel o feito polos deportistas do Deportivo Miño, pois aínda son cadetes de primeiro ano, e un ano no slálom supón moita diferenza. 

 Tamén se celebrou o campionato por federacións autonómicas de patrullas. Os Teixugos fixeron unha única patrulla en k1 cadete. Mateo, Adrián e Antón remataron en décimo lugar. 

Resaltar que na clasificación final por equipos a federación galega ocupou o terceiro lugar, por detrás das federacións vasca e catalá. 


 






 


 

 

domingo, 22 de agosto de 2021

CAMPIONATO DE EUROPA JÚNIOR E SUB-23, SOLKAN, ESLOVENIA: 19 a 22/08/2021

Esta semana celebrouse en Solkan, Eslovenia, o Campionato Europeo de Slálom Júnior e Sub-23. Os mellores deportistas europeos de cada categoría déronse cita nas augas do río Soca. Desde o xoves 19 ata o domingo 22 tiveron lugar as diferentes competicións: canoa ou C1, cáiac ou K1, de maneira individual e por equipos e slálom extremo ou boater cross. 

Dous representantes do Club Deportivo Miño-Teixugos superaron os selectivos e acadaron unha praza para este evento, Manuel Ochoa, en K1 sub23 e extremo, formando parte do equipo español e Alexis Segadaes, en K1 júnior, como integrante do equipo portugués. Os dous teixugos comezaron a súa competición o xoves 19 coas clasificatorias de K1. 

Alexis, único representante júnior da federación portuguesa, na súa primeira experiencia internacional, fixo unha primeira baixada correcta, pero moi lenta, en 141,3 segundos, que o deixaron lonxe de clasificarse para semifinais, na segunda baixada, cunha penalización de 50 segundos tampouco tivo opción de entrar. 

Manuel Ochoa, no seu primeiro intento, cun tempo de 102,18 segundos, quedou fóra de semifinais a só un segundo de conseguilo. Na segunda baixada, moito máis rápida, en 98,81 segundos, foi quen de meterse. O sábado intentou buscar un lugar nas finais, as que pasan os dez mellores. Fixo un bo circuíto, 95,80 segundos, pero un toque na porta 19, con dous segundos de penalización, deixárono fóra de finais, rematando finalmente no vixésimo lugar. 

O venres tivo lugar a competición por equipos, Manu, xunto con Pau Etxaniz e Miquel Travé, conformaron o equipo español de K1 sub-23. Nesta modalidade faise final directa, nela os tres integrantes deben facer o circuíto e entrar na meta xuntos. Os tres baixaron absolutamente compenetrados, rapidísimos e sen fallos, e cun tempo de 105,86 segundos, remataron terceiros por detrás de Francia e Italia. Medalla de bronce para os tres, nun podio moi axustado, xa que a diferencia de tempos entre franceses, italianos e españois foi de menos de un segundo. 

Neste Campionato Europeo celebrouse por primeira vez de forma oficial o Campionato de Europa de caiac extremo, tamén chamado boater cross. Esta é unha nova e espectacular modalidade de slálom que se estreará como categoría olímpica en París 2024. Catro piragüistas, saltan dende unha rampla ao mesmo tempo, e enfróntanse nunha carreira moi rápida, nun circuíto no que deben pasar varias portas e un esquimotaxe, os dous primeiros en pasar a meta clasifícanse para a seguinte fase e os dous últimos quedan eliminados. 

Nesta modalidade, na que se baixa de catro en catro, so poden entrar 16 atletas na competición, para facer a selección dos 16 mellores, na tarde do venres baixaron o circuíto de maneira individual, clasificándose os 16 máis rápidos. Manuel conseguiu entrar co segundo mellor tempo. Durante a tardiña do sábado celebrouse a competición propiamente dita, Manuel foi eliminando contrincantes, superando cuartos de finais e semifinais. Nas finais entrou en terceiro lugar , o que lle valeu a súa segunda medalla de bronce neste campionato. Impresionante palmarés para o tomiñés, que volve de Eslovenia con dúas medallas de bronce no Campionato Europeo. 

Neste europeo outros tres deportistas galegos, os tres do Piragüismo Penedo, acompañaron a Manuel na selección española. Borja González en extremo, que se quedou nas clasificatorias; Daniel Pérez en C1 que acadou finais e rematou noveno en individual e sexto por equipos e Ainhoa Lameiro en C1 que rematou vixésimo cuarta en individual e acadou a medalla de prata por equipos. Grandes resultados para o slálom galego, e moito mérito para os nosos representantes, que se atopan todos adestrando na canle da Seu D´Urgell, a máis de mil quilómetros dos seus fogares, ao non contar Galicia cunha canle de augas bravas. 







 

Final por equipos 

 

Final en boater cross

domingo, 15 de agosto de 2021

4ª COMPETICIÓN DE PROMOCIÓN DE SLÁLOM, DUMBRÍA: 15/08/2021

Este domingo celebrouse en Dumbría a cuarta competición da liga galega de promoción de slálom. Os máis pequenos dos clubs galegos déronse cita nas augas do Xallas. A pesares do gran auxe que vive o slálom galego nas categorías superiores, a promoción non pasa polo seu mellor momento, en Dumbría tan so cincuenta e sete dorsais tomaron a saída. 

O Club Deportivo Miño-Teixugos acudiu con oito deportistas que loitaron, gozaron e se superaron a si mesmos. 

En K1 muller prebenxamín, Itzel del Río foi cuarta. 

En K1 benxamín muller, as irmás Leila e Nerea Álvarez, remataron primeira e segunda respectivamente, conseguindo, por tanto, as medallas de ouro e prata. 

En K1 prebenxamín home, Tiago Rey acadou o quinto lugar. 

En K1 benxamín home, Lois Montenegro foi quinto, Alejandro Barreiro sexto e Leo Álvarez sétimo. 

En K1 home infantil, Pedro Lomba rematou en sexta posición. 

Na clasificación final por clubs, o Deportivo Miño Teixugos foi quinto. 


 

lunes, 9 de agosto de 2021

CAMPIONATO DE ESPAÑA DE SLÁLOM EXTREMO E SLÁLOM OLÍMPICO, SORT: 6, 7 e 8/08/2021

 


Os días 6, 7 e 8 de agosto celebrouse na localidade catalá de Sort a máis importante das competicións da Liga Española de Slálom, o Campionato de España. Despois da suspensión o ano pasado por mor da COVID, este ano retomouse contando cunha elevadísima participación e xerando gran expectación na poboación do lugar. 

O Club Deportivo Miño-Teixugos acudiu cun equipo ben numeroso, formado por 13 deportistas, que desfrutaron da competición e deron o mellor de si mesmos. 

Na xornada do venres, celebrouse por primeira vez o Campionato de España de Slálom Extremo, que será deporte olímpico en Paris 2024. Trátase dunha modalidade moi vistosa e espectacular, na que os deportistas baixan un circuíto de catro en catro, clasificándose os dous primeiros e quedando fóra os dous últimos, ata que so queden catro nas finais. 

Comezouse cunha baixada en liña recta, na que se clasificaron para cuartos de final os dezaseis deportistas máis rápidos de cada categoría. 

 Laura Alonso, en mulleres sénior, quedou a un posto de meterse en cuartos, rematando décimo séptima. 

 En mulleres xuvenil, Ainhoa Barreiro quedouse en cuartos de final e Alba Soutelo chegou a semifinais, moi preto de facer finais. 

En homes sénior, Brais Castro non superou as clasificatorias, Luís Fernández si o fixo, caendo en cuartos de final e Manuel Ochoa fixo o mellor tempo nas clasificatorias, gañou con claridade a súa ronda de cuartos, e nas semifinais tamén gañou con claridade, pero unha penalización ben dubidosa dunhas das xuizas, deixárono fóra da final. 

En homes xuvenil, Mateo Álvarez e Alexis Segadaes caeron nas clasificatorias mentras que Sergio Rodríguez as superou co segundo mellor tempo, caendo en cuartos, por non trazar de forma correcta dúas das portas. 

Na clasificación final por equipos o Deportivo Miño Teixugos rematou en cuarto lugar. 

Podedes ver a espectacularidade deste campionato no seguinte vídeo:

 

O sábado deu comezo o Campionato de España de Slálom Olímpico, cunha elevadísima participación, un total de 295 dorsais, entre eles os catro olímpicos, Maialen Chorrault, Nuria Villarrubla, Ander Elósegui e David Llorente, que xeraron grande expectación entre o público. 

Ao longo de toda a mañá disputáronse as clasificatorias, onde os deportistas intentaron acadar un lugar nas semifinais. 

Xa pola tarde, tiveron lugar as competicións por patrullas ou equipos formados por tres piragüistas do mesmo club, que deben facer o circuíto xuntos. Os Teixugos participaron con tres equipos. 

En C1 sénior, Luís, Brais e Emilio foron octavos. En K1 sénior masculino, Manuel , Sergio e Alexis remataron en noveno lugar. O equipo formado por Laura, Ainhoa e Alba, fixeron dobre baixada, en caiac e canoa, en K1 foron novenas, e en C1, sextas. A súa foi a única representación feminina galega en patrullas, o que pon de relevo a necesidade dunha campaña a favor do deporte feminino na nosa comunidade.

 Podedes ver toda a competición no video seguinte:

 

 E, na mañá do domingo, rematou este maratoniano torneo coas semifinais e finais individuais de slálom. 

En K1 sénior, Manuel Ochoa, fixo unha moi boa competición, superando sen problema clasificatorias e semifinais, e , xa nas finais, fixo unha baixada rápida e sen penalizacións, en 91,85 segundos, rematando segundo, por detrás do vasco Joan Crespo e acadando a medalla de prata. Tamén se xogaba nesta competición unha praza para o Campionato de Europa Júnior e sub-23, praza que finalmente tamén foi para Manu, ao ser o sub-23 mellor clasificado. 

En C1 sénior, Luís Fernández, con serias aspiracións a medalla, superou sen problemas clasificatorias e semifinais, e xa nas finais, fixo unha boa baixada, sen fallos, pero algo lenta, rematando en quinto lugar. Na mesma categoría, Brais Castro, superou as clasificatorias e a piques estivo de meterse nas finais, rematando undécimo. 

En K1 veteranos Emilio Rodríguez finalizou sexto. 

En K1 xuvenil, Sergio Rodríguez meteuse en semifinais, pero unha penalización nunha porta, deixárono sen finais, rematando décimo séptimo. Na mesma categoría, Alexis Segadaes, ao igual que Sergio superou as clasificatorias, e caeu nas semifinais, tamén por unha penalización e rematou décimo noveno. Este torneo, ademais de Campionato de España, era selectivo para a federación portuguesa, e grazas a súa boa baixada en clasificatorias, Alexis, teixugo de nacionalidade portuguesa, acudirá ao Europeo Júnior en representación do seu pais. 

Tamén participaron nesta categoría Mateo Alvarez, Adrián Lluch, Rui Malheiro e Antón Fernández, os máis benxamíns e menos experimentados do equipo, que o deron todo, pero non foron quen de superar as clasificatorias.

 En K1 sénior feminino sénior, Laura Alonso, acadou semifinais, rematando décimo séptima. 

En K1 xuvenil, Ainhoa Barreiro, tamén chegou a semifinais, acabando en décimo quinto lugar. 

Alba Soutelo, tivo dobre participación, en K1 e C1 xuvenil. Acabando décimo cuarta en semifinais nas dúas categorías. 

Bo balance para o Club Deportivo Miño, cun gran equipo e nun moi bo momento, que lle valeu un cuarto lugar na clasificación por clubs neste Campionato de España. 

Para ver fotos das xornadas, preme na imaxe.





sábado, 24 de julio de 2021

CAMPIONATO GALEGO DE SLÁLOM, ARBO: 24/07/2021

Este sábado celebrouse en Arbo o Campionato Galego de Slálom, a máis importante das competicións da Liga Galega. O mellor dos clubs galegos acudiu ao evento, no que destacou, de forma negativa, a baixa participación feminina. 

O Club Deportivo Miño Teixugos acudiu ao torneo con nove deportistas que tiveron unha destacada actuación. 

En K1 feminino sénior o podio estivo totalmente dominado polas “teixugas”: Ainhoa Barreiro fixo o mellor tempo da categoría gañando o ouro, Laura Alonso foi prata e Alba Soutelo bronce. 

Na modalidade de C1 muller sénior, Alba Soutelo acadou a súa segunda medalla, nesta ocasión de ouro. 

En C1 home sénior Luís Fernández fixo o segundo mellor tempo, a tan solo medio segundo de gañar a carreira. Na mesma categoría Brais Castro foi sexto e Emilio Rodríguez noveno. 

En K1 home júnior, Alexis Segadaes acadou a medalla de prata facendo o segundo mellor tempo, e Sergio Rodríguez foi bronce.

 En K1 home sénior, Luís Fernández, subiu ao podio a recoller outra medalla de prata ao rematar segundo. 

En K1 home veterano, Emilio Rodríguez gañou a proba, acadando a medalla de ouro. 

Destacada participación do club, que rematou o torneo con oito medallas: dous ouros, catro pratas e dous bronces. Na clasificación final por equipos o Club Deportivo Miño-Teixugos foi o que acadou unha maior puntuación, que o fixo gañador do campionato, seguido polo Club Piragüismo Penedo e, en terceiro lugar, o Club Tea de Mondariz. 

Tamén se celebrou o Campionato Galego por Equipos, tamén coñecidas como patrullas, unha modalidade moi espectacular e vistosa, na que tres padexeiros de cada club deben facer a baixada xuntos. En K1 home sénior, o equipo formado por Emilio, Brais e Luís, foi segundos por detrás do Tea de Mondariz, os mesmos deportistas repetiron prata e canoa ou C1, nesta ocasión por detrás do Piragüismo Penedo.

 En K1 home júnior, Alexis, Sergio e Mateo Rivas , tamén subiron ao podio co terceiro mellor tempo. 

En K1 sénior feminino, Alba, Laura e Ainhoa, acadaron o ouro. 

A seguinte competición a que terán que facer fronte o equipo será o Campionato de España que se celebrará en Sort o 7 e 8 de agosto. 



 

domingo, 11 de julio de 2021

3ª COPA GALEGA DE PROMOCIÓN DE SLÁLOM, MONFORTE DE LEMOS: 11/07/2021

Este Domingo celebrouse en Monforte de Lemos a terceira das competicións da Liga Galega de Promoción de Slálom, no que participan nenas e nenos de entre 7 e 13 anos. O Club Deportivo Miño-Teixugos acudiu con once representantes, que acadaron cinco podios, pero que, sobre todo, fixeron deporte, amigos e desfrutaron da xornada.
 En K1 muller pre-benxamín Lara Muíños foi a segunda mellor deportista da categoría, acadando a medalla de prata e Itzel del Río foi cuarta. 
En K1 muller benxamín Leila Álvarez foi a gañadora e súa irmá Nerea rematou segunda. 
En K1 home pre-benxamín subiu ao podio Tiago Rey co terceiro mellor tempo. 
En K1 home benxamín tivemos a participación máis numerosa, Alejandro Barreiro rematou sexto, Lois Montenegro sétimo, Leo Álvarez oitavo e Guillermo Vicente noveno.
 En K1 home alevín, Javier Lluch fíxose coa medalla de prata co seu segundo posto. 
En K1 infantil, Pedro Lomba rematou sétimo. 
Na clasificación final por equipos, o Deportivo Miño Teixugos, rematou no cuarto lugar. 
Desde o Club Deportivo Miño animan as familias a traer aos seus nenos e nenas para practicar este deporte no que priman os valores e o bo ambiente, nun momento en que a infancia está tan necesitada de actividade física.










CAMPIONATO DO MUNDO JÚNIOR E SUB-23, TACEN-LJUBLJANA: 6 A 11/07/2021

Do 6 ao 11 de xullo celebráronse na canle de augas bravas de Tacen- Ljubljana, en Eslovenia, os Campionatos do Mundo Júnior e Sub-23 de piragüismo na súa modalidade de slálom. O tomiñés Manu Ochoa foi un dos integrantes deste equipo, concretamente un dos tres representantes sub-23 de cáiac.

 Manuel comezou a súa participación na mañá do martes 6 de xuño na modalidade non olímpica de slálom en equipos, tamén coñecida como patrullas. Xunto con Pau Echaniz e Miquel Travé, formaban un dos conxuntos favoritos para optar ao podio, pero unha penalización de 50 segundos nada máis comezar, na porta 2, deixáronos sen opcións a medalla, rematando décimo terceiros. 

O mércores 7 comezou a competición individual coas clasificatorias, Manuel fixo unha boa baixada e conseguiu meterse en semifinais no primeiro intento. Houbo de esperar ao sábado para loitar por un dos dez postos na final, cunha baixada correcta, pero algo lenta, non se achegou aos postos de cabeza, rematando vixésimo cuarto. 

 Por último, no domingo, participou no slálom extremo , unha modalidade de slálom nova e cada vez con maior importancia por haber acadando a categoría de olímpica para Paris 2024. Comezaron coas eliminatorias para acadar un posto na competición, que Manuel deu superado sen problema co quinto mellor tempo de tódolos participantes. Xa na competición en si, baixadas en grupos de catro, na que se clasifican os dous primeiros en acadar a meta, superou as clasificatorias e caeu en cuartos de final, cunha gran baixada, rematando décimo no campionato do mundo de slálom extremo. 

Destacar que outros tres galegos formaron parte da selección, Daniel Pérez do Piragüismo Penedo de Tui ,que rematou trixésimo terceiro en C1 sub-23, Ainhoa Lameiro, do mesmo club, que rematou vixésima en C1 sub-23 e Mario Otero do Tea de Mondaríz que rematou trixésimo primeiro en K1 júnior. Non foi un gran campionato para a selección española júnior e sub-23, non acadando ningunha medalla, pero o slálom de alto nivel é así, un mínimo error, un solo segundo, pode deixarte fóra de xogo.

 


Baixada de semifinais en k1
 

 Baixada en slálom extremo

domingo, 27 de junio de 2021

2ª COPA GALEGA DE PROMOCIÓN DE SLÁLOM, O ROSAL: 27/06/2021

    Despois da paréntese da tempada pasada a causa da COVID-19, este ano estase retomando a competición con normalidade. Este domingo, nas augas do río Tamuxe, no concello do Rosal, os máis pequenos do slálom galego déronse cita na 2ª Copa Galega de Promoción de Slálom, organizada polo Club Deportivo Miño-Teixugos. Máis de 70 deportistas das categorías pre-benxamín, benxamín, alevín e infantil, acudiron ao evento, oito deles representando ao Deportivo Miño. 

    En K1 Pre-benxamín Feminino, Lara Muíños fixo o segundo mellor tempo, conseguindo a medalla de prata, a súa compañeira Itzel del Río rematou quinta. En K1 Benxamín Feminino, Leila Álvarez foi a gañadora e a súa irmá Nerea rematou segunda, ouro e prata para elas. En K1 Benxamín Masculino, Alejandro Barreiro rozou o podio coa súa cuarta posición, o seu compañeiro Lois Montenegro rematou quinto, e Leo Álvarez noveno. En K1 Infantil Masculino, Pedro Lomba foi sétimo. 

    Tres medallas, por tanto, para os teixugos nesta 2ª Copa de Promoción, pero o máis importante é que todos eles desfrutaron do seu deporte favorito , facendo exercicio e novos amigos nun entorno privilexiado.

     Na clasificación por equipos o gañador foi o Club Montaña Quixós de Monforte de Lemos; o Club Deportivo Miño-Teixugos rematou en cuarto lugar. 


 

domingo, 20 de junio de 2021

2ª COPA DO MUNDO, MARKKLEEBERG: 17 A 20/06/2021


 

Nova cita de Luís Fernández, o canoísta de Salceda, membro do Club Deportivo Miño-Teixugos, coa competición internacional. Luís, o único galego no equipo nacional sénior de slálom, participou na 2ª Copa do Mundo de Slálom, celebrada do 17 ao 20 de xuño na localidade alemá de Markkleeberg. 

O venres fixo a súa primeira baixada para optar a unha das vinte prazas de semifinais en C1 masculino que se xogaban nesta eliminatoria. Luís rematou o percorrido de forma rápida e sen penalizacións, co décimo mellor tempo, que o meteron directo en semifinais sen necesidade de ir á repesca. 

Despois de descansar sábado, o domingo intentou estar entre os dez mellores para meterse nas finais. Comezou o percorrido, cun total de 25 portas, moi rápido e con tempo de finais, pero un toque na porta 15, descentraron a súa marcha e fixeron que tomara a porta 16 de maneira un tanto forzada, metendo apenas a cabeza, o foi que penalizado con 50 segundos que o deixaron fóra de finais. Luís rematou esta copa nunha máis que digna vixésimo sexta posición. 

Baixada en semifinais  

Baixada en clasificatorias

domingo, 13 de junio de 2021

1ª COMPETICIÓN DA LIGA GALEGA DE PROMOCIÓN DE SLÁLOM, A FREIXA: 13/06/2021

Este domingo, nas augas do río Tea, na praia da Freixa en Ponteareas, celebrouse a 1ª Competición da Liga Galega de Promoción de Slálom. O Club Deportivo Miño acudiu ao evento cunha representación de nove pequenos deportistas, que e superaron e deron o mellor de si mesmos, pero sobre todo, e o máis importante, e que pasaron unha mañá diferente e divertida, facendo amigos e actividade física.

 En K1 Feminino prebenxamín, Lara Muíños foi a gañadora e Itzel del Río terceira, ouro e bronce para as nosas deportistas máis novas. 

En K1 Feminino benxamín, as irmás Leila e Nerea Álvarez foron ouro e prata, respectivamente. 

En K1 Masculino prebenxamín, Tiago Rey, rematou segundo, medalla de prata, por tanto. 

En K1 Masculino benxamín, Alejandro Barreiro foi quinto, Lois Montenegro, sétimo, e Leo Álvarez octavo. 

En K1 masculino alevín, Javier Lluch acadou a medalla de prata. 

Bo comezo da liga galega de promoción para o Deportivo Miño, que rematou a xornada con cinco podios. Na clasificación por equipos, os gañador foi o Montaña Quixós de Lugo con 277 puntos, seguido polo Tea de Mondariz con 256 puntos e no terceiro lugar o Club Deportivo Miño-Teixugos con 153 puntos. 

Fotos, Federación Galega de Piragüismo 






 

 

COPA DO MUNDO DE SLÁLOM, PRAGA: 10 A 13/06/2021

Do 11 ao 13 de xuño celebrouse en Praga unha das Copas do Mundo de Slálom, ao que acudiu o equipo nacional de slálom.

 O teixugo Luís Fernández foi o único integrante galego , concretamente un dos tres representantes en canoa ou C1. 

O venres comezou a súa participación cunha primeira baixada algo lenta, cun tempo de 101,25 segundos, quedando fóra das semifinais; na segunda tentativa, fixo un percorrido rápido e sen penalizacións, cun tempo de 96.34, que o meteron en semifinais co terceiro mellor tempo. 

Os trinta mellores canoístas do mundo déronse cita nas semifinais na mañá do domingo para intentar acadar un dos dez postos das finais. Luís fixo unha boa baixada, rematando décimo cuarto que o deixaron fóra das finais, pero nunha moi boa posición. 

 Foto Norbert Aguilera

domingo, 9 de mayo de 2021

CAMPIONATO DE EUROPA DE SLÁLOM, IVREA-ITALIA: 6 a 9/05/2021

Do 6 ao 9 de maio celebrouse na localidade italiana de Ivrea o Campionato de Europa de piragüismo na modalidade de slálom. España acudiu cun equipo formado por doce padeeiros, entre eles, Luís Fernández do Deportivo Miño-Teixugos. 

O deportista de Salceda foi o único galego que deu superado os selectivos nacionais para entrar no equipo absoluto, concretamente na modalidade de C1 ou canoa. 

Luís comezou a súa participación o venres día 7 coas clasificatorias. No seu primeiro intento, no que se clasificaban 20, rematou vixésimo oitavo cun percorrido sen fallos, pero algo lento, cun total de 95,23 segundos. Nas segundas clasificatorias, fixo unha baixada moito máis rápida, 90,45 segundos, pero unha penalización de 2 segundos por toque nunha porta, deixárono fóra de semifinais por menos de 4 décimas de segundo. Nese mesmo día, pola tarde, xunto co catalá Miquel Travé e o vasco Ander Elósegui, participou na modalidade de canoa por equipos, rematando no sétimo lugar. 

A súa vindeira cita coa competición oficial será o 22 de maio, na 3ª Copa de España de Slálom, a que acudirá o Club Deportivo Miño, con varios deportistas. 


 

domingo, 21 de marzo de 2021

COPA PIRINEUS: 20-21/03/2021

Esta fin de semana celebrouse na localidade ilerdense da Seu D´Urgell a Copa Pirineus de Slálom. Esta é a competición non oficial, de carácter internacional, máis importante que se celebra no noso país. 

Este ano, a federación española de piragüismo, decidiu que serviría como selectivos para determinar os distintos equipos nacionais de slálom: sénior, sub-23 e júnior. Durante esta fin de semana os deportistas seleccionados farían tres baixadas, puntuando as dúas mellores, e na seguinte fin de semana, en Pau Francia, o mesmo proceso. Por problemas causados pola situación COVID a federación anulou os selectivos de Pau, polo que esta fin de semana se conformaron os distintos equipos nacionais de slálom. 

Cinco padexeiros do Club Deportivo Miño gañaron un posto nestes selectivos polos seus resultados nas dúas Copas de España xa celebradas: Luís Fernández, Manuel Ochoa, Sergio Rodríguez, Alba Soutelo e Ainhoa Barreiro. Os cinco deron o mellor de si mesmos para acadar unha praza nos equipos nacionais nesta competición marcada polas baixas temperaturas e o vento. 

Luís Fernández, que optaba a praza no equipo sénior de canoa, gañou dúas das tres baixadas, o que lle garante unha das tres prazas no equipo nacional. E como remate a unha impresionante participación, gañou a competición cun tempo de 92.70 segundos, subindo ao podio xunto ao catalá Miquel Travé e o irlandés Jake Cochrane.

 Manuel Ochoa aspiraba a praza nos equipos sub-23 e sénior de cáiac. O sábado rematou sétimo na primeira baixada, na segunda, o vento xogou na súa contra e levouno a facer un mal tempo, mellor sorte tivo na terceira baixada, no domingo, rematando segundo. A falta de confirmación oficial, non acada praza no equipo sénior, pero conta con moitas posibilidades de estar no equipo nacional sub-23. Na final, cun tempo de 87.01 segundos, acadou a terceira posición, por detrás do ruso Pavel Eigel e do marroquí Mathis Soudí. 

Ainhoa Barreiro e Sergio Fernández loitaron por unha praza nos equipos júnior de caiac e Alba Soutelo en caiac e canoa. Os tres tiveron unha actuación correcta e sen excesivas penalizacións, tendo en conta as duras condicións da canle e a climatoloxía, pero, a espera da confirmación oficial da federación, non parece que deran acadado praza no equipo español. 

Unha vez máis os Teixugos tocando o ceo do slálom, demostrando o seu bo momento e gran nivel. O slálom galego cada vez ten máis que dicir no panorama nacional, xunto cos Teixugos, o Penedo de Tui e o Tea de Mondariz, deron mostras disto, con varios deportistas serios candidatos a formar parte dos diferentes equipos nacionais. 



 

domingo, 7 de marzo de 2021

2ª COPA DE ESPAÑA DE SLÁLOM- LA SEU D´URGELL: 6-7/03/2021

Esta fin de semana celebrouse na canle olímpica da Seu d´Urgell a segunda Copa de España de slálom olímpico, na que participaron máis de douscentos deportistas de diferentes categorías de toda España. Esta competición caracterizouse polo altísimo nivel dos participantes é pola dificultades do percorrido , nunha canle na que o máis pequeno erro se paga caro. Esta copa, ao igual que a anterior, constou de dúas competicións diferenciadas, unha sábado e outra domingo, cunha primeira baixada clasificatoria, na que os dez primeiros pasaban á final. 
O Club Deportivo Miño desprazou a Lleida sete dos seus deportistas, que se ben non deron acadado medalla, fixeron unha moi boa competición, manténdose nos postos de cabeza, moi preto do podio.
 
 En canoa sénior Luis Fernández conseguiu entrar en finais os dous días, co segundo e terceiro mellor tempo das clasificatorias. Xa na final, cuns tempos moi apertados, rematou cuarto tanto sábado como domingo, non facendo podio por moi pouco. 
 
En caiac sénior, Manuel Ochoa, na xornada do sábado meteuse en finais co segundo mellor tempo da competición, e nas finais quedou fóra do podio por un toque nunha porta que lle penalizou con 2 segundos, rematando quinto. No domingo, aínda que fixo unha baixada moi rápida, dous toques penalizados con catro segundos, deixárono fóra de finais, rematando décimo quinto. 
 
Tamén en caiac sénior, Laura Alonso, non acadou finais en ningunha das xornadas, rematando décimo novena nas dúas xornadas. 
 
En categoría xuvenil feminina, Alba Soutelo, participou tanto e caiac como en canoa. En K1, o sábado no acadou final, rematando décimo sexta; o domingo, entrou en finais e rematou a competición no sétimo lugar. En C1, demostrou o seu gran nivel ao entrar nas finais nas dúas xornadas, rematando cuarta o domingo e quinta o sábado, a un pasiño de acadar podio nos dous días. Ainhoa Barreiro participou nesta ocasión so en caiac, e tanto sábado como domingo non conseguiu superar as clasificatorias rematando finalmente en décimo noveno e vixésimo lugar. 
 
En xuvenil masculino, so houbo participación en K1. Sergio Rodríguez foi quen de entrar en finais nas dúas xornadas, rematando o sábado décimo e o domingo sétimo. O seu compañeiro de equipo e categoría, Alexis Segadaes, fixo dúas boas baixadas, con poucas penalizacións, pero non deu entrado en finais en ningún dos dous días, rematando vixésimo terceiro. 
 
Ausencia de medallas para o Club Deportivo Miño nesta segunda competición da Liga Española de Slálom, pero resultados moi satisfactorios, con varias finais, e moi pretiño das medallas en varias ocasións. 
 
Na clasificación por clubs, o Club Deportivo Miño-Teixugos rematou cuarto no sábado e quinto no domingo, sendo o club galego mellor clasificado. Fotos de Norbert Aguilera

domingo, 21 de febrero de 2021

1ª COPA E ESPAÑA, MONDARIZ: 20 - 21/02/2021

Esta fin de semana arrancou a Liga Española de Slálom, despois dun ano de parón por mor da COVID-19. A primeira das competicións, 1ª Copa de España de Slálom, celebrouse na localidade de Mondariz. Durante dúas xornadas, o mellor do panorama nacional nesta modalidade de piragüismo, deuse cita nas augas do río Tea. O evento estivo marcado pola adversa meteoroloxía, pola elevadísima participación, con catorce equipos e máis de 200 deportistas, e polo protocolo do coronavirus, con grandes medidas de seguridade e sen público.

 Esta copa constou de dúas competicións diferenciadas, unha sábado e outra domingo, cunha primeira baixada clasificatoria, na que os dez primeiros pasaban á final. O Club Deportivo Miño acudiu con dez deportistas, cos que deu acadado resultados históricos.

 En canoa sénior Luis Fernández foi gañador absoluto nas dúas xornadas. O deportista de Salceda, impúxose nas clasificatorias e nas respectivas finais, tanto sábado como domingo. Na mesma modalidade Alejandro Ochoa non deu conseguido entrar nas finais rematando décimo sexto nos dous días.

 En caiac sénior, o tomiñés Manuel Ochoa, conseguiu a terceira medalla de ouro para os Teixugos. Nas clasificatorias do sábado, un pequeno fallo e unha penalización de dous segundos, deixárono fóra das finais nun décimo quinto lugar. O domingo, co quinto mellor tempo, entrou en finais, e rematou gañando a proba. Na mesma proba, Alejandro Ochoa, rematou trixésimo quinto e trixésimo oitavo. 

Tamén en caiac sénior, Laura Alonso, quedou nas dúas xornadas ás portas das finais co seu duodécimo lugar. 

En categoría xuvenil feminina, Ainhoa Barreiro e Alba Soutelo tiveron unha moi boa actuación, rozando o podio en varias ocasións. Alba , en caiac, rematou sexta o sábado na final e décimo cuarta o domingo, na modalidade de canoa, rozou medalla nos dous días, rematando cuarta e quinta. Pola súa banda, Ainhoa fixo finais nos dous días en caiac, rematando cuarta e sétima, e en canoa foi décimo cuarta e novena. 

En xuvenil masculino, a modalidade de canoa non tivo participación de teixugos, e en caiac, a mellor actuación foi a de Sergio Rodríguez que entrou en finais nas dúas xornadas, rematando quinto e sexto. O seu compañeiro Alexis Segadaes fixo dúas baixadas correctas, pero non o bastante rápido para facer final, rematando décimo sexto e vixésimo. Na mesma categoría, participaron tamén, Rui Malheiro e Adrián Lluch, os máis novos dos nosos participantes, que se estrearon na Liga absoluta nacional, rematando lonxe dos postos de cabeza.

 A seguinte competición, a 2ª copa de España, terá lugar na canle da Seu D´Urgell os días 6 e 7 de marzo.