CAMPIONATO GALEGO DE SLÁLOM- DUMBRÍA- 9/10/2016

Este domingo celebrouse na localidade coruñesa de Dumbría o Campionato Galego de Slálom, a última, e máis importante competición da Liga Galega de Slálom 2016. O Club Deportivo Miño acudiu cun equipo moi minguado polas ausencias, só seis teixugos puideron acudir ao evento, ao celebrarse en datas nas que catro dos seus mellores deportistas se atopaban fóra da comunidade galega, uns por estudos e outros preparando a pre-temporada 2017 coa Federación Española.

En K1 Sénior Home, Emilio Rodríguez fíxose co bronce; en K1 Sénior Muller, Marina Ruedas foi prata e Laura Soutelo bronce; Brais Castro acadou a prata en C1 Sénior Home e o ouro en K1 Júnior Home; Ariadna Pereira, tamén prata en K1 Infantil Feminino.

Seis medallas para os Teixugos que non puntuaron suficiente para darlle ao equipo o Campionato Galego, que gañou o Tea de Mondariz con 220 puntos, seguido do Piragüismo Penedo con 200 e en terceiro lugar o C.D.Municipal de Dumbría con 132. O Club Deportivo Miño-Teixugos rematou cuarto con 121 puntos.Para ver máis imaxes preme enriba da foto

PROMOCIÓN MONDARIZ 2/10/2016

A pasada fin de semana tamén os máis pequenos remataron a Liga Galega de Promoción de Slálom coa 6ª Copa Galega celebrada en Mondariz. Catorce foron os nenos do club que acudiron á cita, e os resultados foron impresionantes.

Ainhoa Barreiro gañou en K1 e C1 Muller Alevín, nas mesmas categorías Alba Soutelo foi segunda; en K1 e C1 Muller Infantil, Ariadna Pereira foi segunda; Samuel Castro foi o gañador en C1 Home Infantil e Sergio Martínez quedou segundo nesta categoría e foi o gañador en K1 Home Infantil.

Na clasificación final por equipos os Teixugos remataron terceiros con 219 puntos, por detrás do Club Tea de Mondariz con 298 puntos e do Club Penedo con 297.

Para ver máis imaxes preme enriba da foto

FOTOS

5ª COPA GALEGA DE PROMOCIÓN DE SLÁLOM EN GOIÁN-28/08/2016

Este sábado a partir das tres da tarde tivo lugar no río Miño en Goián, a quinta competición da Copa Galega de Promoción de Slálom organizada polo Club Deportivo Miño-Teixugos, que tamén formou parte da Liga portuguesa de Esperanças de Slálom. Seis clubs galegos e catro portugueses participaron neste evento cun total de 130 deportistas de oito a doce anos. Esta é a primeira vez que se celebra este tipo de competición nas augas do Miño en Goián, onde aproveitando a marea alta se montou o circuíto para nenos e nenas.

Coma sempre as cosas foron ben para os Teixugos. En alevín Ainhoa Bareiro foi ouro en K1 e C1, e Alba Soutelo prata en C1 e bronce en K1, Sergio Martínez foi ouro en K1 e prata en C1 e Samuel Castro ouro en C1.En infantil Ariadna Pereira foi prata en K1 e C1. En cadete Laura Soutelo foi prata en K1 e Marco Patiño bronce tamén en K1. Independentemente do medalleiro, todos e todas o pasaron ben, desfrutaron de forma segura da auga, aproveitaron para facer amigos novos , dun lado e outro da fronteira ,ou para reencontrarse cos que xa se fixeron noutras competicións.

Na clasificación por clubs o Piragüismo Penedo de Caldelas foi primeiro, OTea de Mondariz segundo e o Club Deportivo Miño Teixugos teceiro.

A tempada para os máis pequenos rematará o 25 de setembro en Mondariz.
Para ver as fotos preme AQUÍ

 

TEIXUGOS NO CAMPIONATO DE EUROPA EN SOLKAN

      Do 25 ao 28 deste mes están tendo lugar os Campionatos de Europa de Slálom na cidade eslovena de Solkan. Dous piragüistas do Club Deportivo Miño entraron a formar parte do equipo nacional.


      Luís Fernández participou na modalidade C1 sub-23. Na maña do mércores fixo a súa primeira baixada, rematando décimo dun total de 40 participantes e pasando directo a semifinais. Na maña do sábado, nas semifinais, fixo unha baixada sen fallos, pero non deu entrado en finais, rematando décimo quinto. Manuel Ochoa participou en K1 júnior. Na mañá do mércores non se deu clasificado para semifinais na primeira manga, pero si na segunda, rematando vixésimo octavo dun total de 61 participantes. Na mañá do sábado, fixo unha baixada rapidísima e sen fallos que o meteu en finais na sexta posición. Xa na final, volveu facer outra baixada perfecta que lle valeu unha sexta posición no Campionato de Europa.


    No venres tiveron lugar as competicións por equipos, Luís formou parte do equipo español de patrullas C1 sub-23, xunto a Lluis Pares e Jordi Tebe, rematando duodécimos.


     Manuel formou parte do equipo español e patrullas K1 júnior, xunto con Nil García e Eneko Auzmendi, equipo que nos deixou as portas da medalla no mundial de Cracovia, e que no europeo se fixeron coa prata nunha baixada perfecta, con apenas dous toques de penalización, rematando segundos por detrás dos alemáns.


     Remata aquí unha tempada na que os Teixugos e os piragüistas galegos de augas bravas fixeron historia. Nunca tantos galegos foron quen de entrar no equipo nacional, o que da fe do bo traballo da Federación Galega e o Centro Galego de Tecnificación, e do seu adestrador Ekhi Diez. 

Parabéns a Ainhoa Lameiro e Miguel Angel Lorenzo do Penedo e a Luis Fernández, Brais Castro e Manuel Ochoa dos Teixugos, o slalom galego facendo historia!

CAMPIONATO GALEGO DE SLÁLOM- RIBADUMIA-21/08/2016

Este domingo celebrouse en Ribadumia o Campionato Galego de Promoción de Slálom. Esta é a máis importante das competicións que conforman a Liga Galega de Promoción de Slálom, nela participan nenas e nenos das categorías benxamín, alevín e infantil.

Sete foron os “teixuguiños” que acudiron a cita. Ariadna Pereira, invatible esta tempada,  foi campiona galega en C1 e K1 infantil. Sergio Martínez, na categoría alevín, foi segundo tanto en K1 coma en C1. Na mesma categoría, Samuel Castro proclamouse campión galego en C1. Ainhoa Barreiro, tamén alevín, quedou segunda en canoa e campiona galega en caiac, a súa compañeira de categoría, Alba Soutelo, foi segunda en K1 e campiona en C1. En K1 benxamíns Adrián Lluch rematou quinto e Haritz Serrano sétimo. Inmellorable o balance final para o Club Deportivo Miño-Teixugos,con catro campións galegos, que lle valeron un segundo posto na clasificación final por equipos.

LUÍS E MANU RUMBO AOS EUROPEOS DE SOLKAN

Hoxe Luís Fernández e Manuel Ochoa partiron rumbo a localidade eslovena de Solkan onde terá lugar o Campionato de Europa de Slálom Júnior e Sub-23 a celebrar do 25 ao 28 de agosto.

Luís Fernández de Salceda de Caselas, formará parte do equipo español sub-23 de C1, modalidade na que o piragüista vai de xeonllos nunha canoa cun remo dunha soa pa. Tamén formará parte do equipo de patrullas C1 sub 23 xunto aos seus compañeiros Jordi Tebé e Lluis Parés.

O tomiñés Manuel Ochoa formará parte do do equipo español júnior K1, modalidade na que o piragüista vai sentado nun caiac cun remo de dúas pas. Tamén formará parte do equipo de patrullas k1 júnior xunto a Nil García e Eneko Auzmendi.

Luís e Manu no aeroporto de Vigo

A selección española júnior e sub-23 está formada por un total de 24 deportistas, a maioría deles das federacións vascas e catalás. Nesta ocasión catro galegos son os que deron entrado a formar parte dela. Ademais dos dous teixugos tamén acudiran Ainhoa Lameiro en C1 júnior feminino e Miguel Ángel Lorenzo en C1 júnior masculino do Club Piragüismo "O Penedo"

Luís, Manu, Ainhoa e Miguel

Moita sorte aos catro!!!

4ª COMPETICIÓN DA COPA GALEGA DE PROMOCIÓN DE SLÁLOM NO ÉZARO-06/08/2016

     Este sábado tivo lugar no Ézaro en Dumbría a 4ª competición da Copa Galega de Promoción de Slálom, a que non faltaron os máis pequenos do Club Deportivo Miño. 
     Os resultados foron máis que satisfactorios para os teixuguiños. Ariadna Pereira acadou dous ouros nas categorías C1 e K1 infantil, Ainhoa Barreiro tamén ouro en K1 Alevín e prata en C1, a súa compañeira de categoría Alba Soutelo foi ouro en C1 e prata en K1; seguindo na categoría Alevín pero masculina, Sergio Martínez conseguiu ouro en caiac e prata en canoa por detrás de Samuel Castro que foi ouro.

     Seis primeiros postos e tres segundos son un moi bo resultado para estes pequenos deportistas

     Na clasificación por equipos o Club Deportivo Miño-Teixugos rematou terceiro, sendo  gañador o Penedo de Caldelas seguido do Club Tea de Mondariz.

FOTOS

2ª COPA DE ESPAÑA DE JÓVENES PROMESAS-SORT: 30-31/07/2016

     Despois dos bos resultados da semana pasada para o club Deportivo Miño no Campionato de España en Sort, esta semana tocoulle aos máis pequenos na Copa de España de "Jóvenes Promesas" celebrada na mesma localidade. 

     A nivel galego, nas competicións de promoción, participan tódalas categorías por debaixo de júnior, pero nas da liga española só entran cadete, Infantil A (nenos e nenas nacidos en 2002) e Infantil B (nenos e nenas nacidos en 2003). 

     A competición tivo lugar sábado e domingo. Cada día nenos e nenas fixeron dúas mangas, contando o mellor tempo das dúas como resultado final de cada proba. O resultado final da competición consistiu na suma dos puntos obtidos o sábado e o domingo: un primeiro posto suma 50 puntos, o segundo 46, o terceiro 43… 

     Aínda que os máis pequenos do club xa levan en Sort unha semana adestrando, na competición so puido participar Ariadna Pereira na categoría Infantil A, ao non ter idade suficiente os demais. Ariadna participou nas categorías C1 e K1 . En C1 quedou cuarta tanto sábado como domingo, o que lle valeu unha posición final de cuarta clasificada. En K1 o sábado rematou nunha impresionante segunda posición, o domingo aínda que non lle foi tan ben, rematou nun meritorio cuarto lugar. A suma de puntos dos dous días déronlle a terceira posición, e polo tanto unha medalla de bronce. 

      Grazas aos puntos acadados pola dobre participación de Ariadna os Teixugos remataron en novena posición por equipos, clasificación na que o Club Penedo de Caldelas rematou segundo e o Tea de Mondariz quinto; o que da fe do bo momento do slálom galego. 

CAMPIONATO DE ESPAÑA, SORT: 23 E 24 DE XULLO DE 2016

Esta fin de semana tivo lugar en Sort o Campionato de España de slálom, a derradeira, e máis importante proba da Liga Española de slálom olímpico ao que acudiron cerca de 300 deportistas de toda España. Oito foron os piragüistas do Club Deportivo Miño que acudiron a esta cita.

A xornada do sábado foi dura, cun circuíto moi longo e cheo de dificultades. No domingo o trazado era moito máis rápido e non deu tantos problemas como o do día anterior. Para as clasificacións do campionato sumáronse os resultados dos dous días.

Laura Soutelo en K1 muller júnior remataría oitava o sábado e décima no domingo, o que lle valeu unha posición final de novena

Andrea González en K1 muller sénior, remataría undécima despois de ser décima no sábado e décimo segunda no domingo. Na mesma categoría Laura Alonso acabaría décimo quinta e décimo oitava, que lle valería ser décimo sétima na final.

Marco Patiño en K1 home cadete rematou o sábado vixésimo cuarto e décimo quinto o domingo, o que lle valeu a vixésima posición.

Brais Castro rozou o bronce, o sábado fixo unha baixada sen fallos pero lenta, acabando cuarto, e o domingo rematou terceiro cun bo tempo, pero que non lle deu para acadar o bronce, rematando cuarto.

Luís Fernández en C1 sénior, tivo unha mala tarde de sábado e fixo unha baixada moi boa pero algo lenta que o deixou oitavo, no domingo, moi rápido e sen fallos, quedou terceiro. Resultados que lle deron unha cuarta praza na categoría máis alta, e na que debutou esta tempada.

Luís e Brais participaron tamén na categoría C2 sénior, e non puideron ter mellor debut, pois fixéronse coa medalla de bronce.

Emilio Rodríguez, en K1 veteranos, fixo dúas boas baixadas nas que rematou terceiro e que lle deron un bronce neste Campionato de España.

Manuel Ochoa, en K1 júnior, foi segundo na tarde do sábado nunha baixada rápida e sen fallos e a segundo e medio o primeiro clasificado. No domingo rematou primeiro cunha baixada espectacular, rapidísima e sen penalizacións, que fixo que acabara como campión de España da categoría.

Bo final de tempada para os Teixugos na Liga Española de slálom, e para os clubs galegos en xeral, que cada ano fan mellor papel neste deporte dominado por vascos e cataláns.

MUNDIAL SUB-23 E JÚNIOR- CRACOVIA: 12 A 17 DE XULLO DE 2016

     Ao longo desta semana tivo lugar en Cracovia, Polonia, o Campionato do Mundo Sub-23 e Júnior de slálom olímpico. Tres palistas do Club Deportivo Miño estaban convocados para formar parte do equipo nacional, sendo este un feito sen precedentes tanto para os Teixugos como para o piragüismo galego de augas bravas. Aínda que os tres fixeron unhas moi boas baixadas, sen fallos e moi rápidas, só Manuel entrou en semifinais e ningún deu entrado nas finais polo elevadísimo nivel da competición.

     Luís Fernández Pereira foi un dos tres representantes españois na modalidade de C1 Sub.23. Durante a mañá do martes fixo a súa primeira baixada, rematando no posto vixésimo sexto,que non lle permitiu entrar en semifinais, na segunda baixada de repesca tampouco foi quen de clasificarse, rematando vixésimo terceiro. Na mañá do sábado Luís formou parte do equipo nacional de patrullas C1 Sub-23, xunto con Jordi Tebe e Lluis Parés, rematando nunha meritoria oitava posición.

     Brais Castro competía en C1 Júnior. O martes, fixo unha primeira baixada mala na que rematou no posto cincuenta, que o deixou moi lonxe de semifinais. Ese mesmo día, na segunda manga de repesca fixo un espléndido recorrido que o deixou a apenas tres postos de semifinais nunha décimo terceira posición.

     Manuel Ochoa formaba parte do equipo K1 júnior. Na tarde do mércores foi quen de entrar directo en semifinais na décimo novena posición cunha moi boa baixada. Na tarde do venres celebráronse as semifinais, nas que rematou décimo sexto despois dunha baixada impecable, e a solo tres segundos de entrar nas finais. Na tarde do sábado, xunto cos seus compañeiros Eneko Auzmendi e Nil García, formaron o equipo de patrullas K1 júnior e fixeron unha baixada deslumbrante e sen fallos que os deixou nunha cuarta posición, a catro décimas de segundo da medalla de bronce.

     Destacar tamén que outra galega, Ainhoa Lameiro, do Piragüismo Penedo de Caldelas, formou parte da selección española, concretamente en C1 Júnior. A pesar da súa curta idade, aínda en categoría cadete, foi quen de entrar en semifinais, pero non en finais, rematando décimo oitava.

JÓVENES PROMESAS ARFA: 2-3/7/2016 E CAMPEONATO ESPERANÇAS VIZELA 3/6/2016

    Esta foi unha fin de semana moi intensa para os máis pequenos do slálom. Por un lado na localidade ilerdense de Arfa tivo lugar a 1ª competición da Copa de España de Jóvenes Promesas. O Club Deportivo Miño-Teixugos só enviou a esta competición a Ariadna Pereira, que participou na categoría infantil, tanto en kaiak como en canoa.

    A Copa constou de dúas competicións cuxos resultados se sumaron para obter a posición final. Na competición do sábado Ari quedou segunda tanto en C1 coma en K1, no domingo acadou idénticas posicións. Estes magníficos resultados fixeron que volvera para a casa con dúas medallas de prata.

    Na clasificación final por clubs os Teixugos quedaron no oitavo lugar. Destacar o papel do Penedo de Caldelas que quedou en primeiro lugar e do Tea de Mondariz que quedou terceiro, o que da fe do magnífico momento que atravesa o slálom galego.

    Por outro lado, tamén acudiron os Teixugos ao Campeonato Nacional de Esperanças de Slalom, correspondente a liga portuguesa de slálom, e que se celebrou na localidade de Vizela no domingo. Os resultados non puideron ser mellores. Ainhoa Barreiro gañou en K1 Iniciado muller, Alba Soutelo foi segunda na mesma categoría e Samuel Castro rematou cuarto en C1 cadete, posto moi meritorio pois pola súa idade correspondíalle a categoría iniciado, é dicir dúas categorías máis baixo. 

 

ECA JUNIOR CUP- SOLKAN-25 e 26 de xuño de 2016

Durante o sábado e o domingo celebrouse na canle de augas bravas de Solkan en Eslovenia unha Copa Europea de slálom júnior e sub-23 coa participaron de 370 piragüistas de 23 países. Catro foron os galegos que acudiron a esta proba formando parte da selección española júnior e sub-23: Luís Fernández, Brais Castro e Manuel Ochoa dos Teixugos e Ainhoa Lameiro do Club Penedo de Caldelas.


Durante a mañá do sábado tiveron lugar as probas clasificatorias, os catro galegos entraron nas finais que se celabraron pola tarde. Luis Fernández acabou primeiro en C1 sub-23, Brais Castro sétimo en C1 sub-18, Manuel Ochoa tamén sétimo en K1 sub-18 e Ainhoa Lameiro cuarta en C1 sub-16.

Durante o domingo repetiuse o sistema de competición, pola mañá clasificatorias e pola tarde finais. Outra vez os catro galegos foron quen de entrar nas finais das súas categorías. Xa pola tarde, Luís remataría de novo primeiro, Brais duodécimo, Manuel octavo e Ainhoa primeira.

Os resultados das probas dos dous días sumáronse para obter os postos finais dos participantes.

Finalmente so subiron ao podio Luís Fernández dos Club Deportivo Miño- Teixugos cunha medalla de ouro e Ainhoa Lameiro do Penedo que acadou a prata.

Aínda que Luís Fernández xa leva varios anos formando parte do equipo español, este ano ademais entrou no absoluto, para os outros tres, esta foi a súa primeira experiencia internacional. Este é un éxito sen precedentes para o slálom galego, grazas en boa parte ao bo facer do Centro Galego de Tecnificación Deportiva no que están becados 6 palistas de slálom adestrados por Ekhi Díez.

A súa seguinte cita será no Campionato do Mundo que terá lugar entre o 14 e o 17 de xullo en Cracovia(2016 ICF Junior&U23 Canoe Slalom World Championships)

Luís, Brais, Ainhoa, Ekhi e Manu

TRES TEIXUGOS NA ECA JUNIOR CUP DE SOLKAN, ESLOVENIA

Manuel, Luís e Brais

      Esta fin de semana dispútase na canle de Solkan en Eslovenia a Copa Europea de slálom júnior e sub-23. Tres piragüistas do Club Deportivo Miño estarán formando parte do equipo nacional.

    En canoa sub-23 estará Luís Fernández, de 19 anos. Este piragüista de Caldelas de Tui , ten ademais o mérito de formar parte do equipo nacional absoluto.

    Na selección júnior estarán os tomiñeses Brais Castro e Manuel Ochoa de 17 anos. Esta é a primeira competición internacional para os dous. Brais Castro en canoa e Manuel Ochoa en kayak.

Destacar tamén a presenza doutra galega, Ainhoa Lameiro, do Club Penedo de Caldelas.

    Levan xa uns días adestrando na canle de Solkan, que ademais lles sirve de preparación para o Campionato do Mundo a disputar en Cracovia nun par de semanas.

    Sábado e domingo terán lugar as competicións que contan cun total de 370 participantes de 23 países.

SORTE TEIXUGOS!

PROMOCIÓN TUI: 19/06/2016

      Esta domingo o Club Deportivo Miño-Teixugos acudiu ao Porto Deportivo de Tui a onde se celebraba a Copa Galega de Promoción de Slálom e o Campionato Nacional Portugués de esperanzas de piragüismo.

      Ao logo da mañá nenos e nenas de 8 a 14 anos, as pequenas promesas de cada club, fixeron dúas mangas. Na Liga Galega de promoción tense en conta o mellor tempo das dúas mangas para facer a clasificación final.

       Os Teixugos, como xa é habitual non volveron de baleiro. En K1 Alevín Ainhoa Barreiro foi ouro e Alba Soutelo prata, os mesmos postos que acadaron en C1, volvendo cada unha con dúas medallas. En K1 Infantil Ariadna Pereira conseguiu a medalla de prata e en C1 foi ouro. Sergio Martínez foi ouro en K1 Alevín e prata en C1, modalidade esta última na que Samuel Castro foi ouro. Marco Patiño acadou a prata en K1 Cadete. Tamén o deron todo, aínda que sen medalla, Valentina Feijoo, Cristian Vicente e Adrián Lluch, porque o importante é o esforzo e as ganas de facer deporte.

      Na clasificación final por equipos impúxose o Club Penedo de Caldelas, o segundo posto foi para o Club Tea de Mondariz e o Club Deportivo Miño quedou en terceiro lugar.

3ª COPA DE ESPAÑA DE SLÁLOM, SABERO 27 e 28 de maio de 2016

Esta fin de semana celebrouse a 3ª Copa de España de Slálom Olímpico na localidade de Sabero, León, na nova canle de slálom construída no río Esla. 

O Club Deportivo Miño acudiu con oito piragüistas das categorías cadete, júnior, sénior e veterano: Marco Patiño , Laura Soutelo, Manuel Ochoa, Brais Castro, Laura Alonso, Andrea González, Luís Fernández e Emilio Rodríguez. Ariadna Pereira tamén participou, pero de abridora. 

A competición transcorreu ao longo de dúas xornadas, a primeira sábado e a segunda o domingo, sumándose os resultados das dúas. Todos os nosos deportistas deron o mellor de si mesmos, obtendo uns resultados que fai non moitos anos eran impensables no piragüismo de augas bravas galego. Catro foron os podios acadados: Emilio Rodríguez foi prata na categoría K1 veterano; Luís Fernández, o primeiro galego que optou a unha praza olímpica, acadou a medalla de ouro na categoría C1 sénior; Manuel Ochoa tamén ouro en K1 júnior e Brais Castro bronce en C1 júnior. Luís, Manuel e Brais forman parte do equipo nacional sub 23 que representarán a España no mundial que se celebrará en Cracovia no mes de xullo. 

Na clasificación final por equipos o Club Deportivo Miño-Teixugos rematou en cuarto posto, por detrás do Atlético San Sebastián, o Santiagotarrak de Irún e o Cadi Canoe-Kayak da Seu D´Urgell. 

Non foron as nosas as únicas medallas para os galegos, Sen Siras, Penedo, Tea e Dumbría tamén subiron o podio. Estes bos resultados débense en gran medida a boa labor que están facendo no Centro Galego de Tecnificación Deportiva de Pontevedra no que están becados 6 piragüistas adestrados por Ekhi Díaz.

3ª COPA DE SLÁLOM GALEGO-MAZARICOS- 7/5/2016

Este domingo celebrouse en Castrelo, Mazaricos, a 3ª Copa Galega de Slálom Olímpico correspondente a Liga Galega de Slálom. A competición, que comezou con moito retraso debido a un malentendido coas empresas eléctricas que controlan as augas do río Xallas, non puido ir mellor para os Teixugos.


Nunha tarde chuviosa e fría, e despois dunha longa espera agardando por un bo caudal de auga, tódolos deportistas deron o mellor de si mesmos. Andrea González gañou en K1 sénior e Laura Alonso quedou terceira na mesma categoría. Brais Castro en C1 sénior tamén acadou o primeiro posto; a mesma posición para Manuel Ochoa en K1 júnior na que ademais Brais Castro quedou terceiro. Outra gañadora na súa categoría foi Ariadna Pereira en K1 infantil. Tamén fixo podio Marco Patiño con unha segunda posición en K1 cadete.


A clasificación final por equipos estivo liderada polo Club Deportivo Miño cun total de 157 puntos, seguido polo Club Piragüismo Penedo de Caldelas con 150 e o Club Tea de Mondariz con 130.


A próxima cita dos Teixugos será nas augas do Esla na localidade leonesa de Sabero, onde se celebrará a 3ª Copa de España de Slálom os día 28 e 29 de maio.

2º COPA DE ESPAÑA DE SLÁLOM( 9 e 10 de abril de 2016)

Ao longo das dúas xornadas desta fin de semana estaba prevista a celebración da 2ª Copa de España de Slálom en San Miguel , Irún . Os Club Deportivo Miño-Teixugos acudiu con cinco deportistas: Emilio Rodríguez, Andrea González, Luís Fernández, Brais Castro, Manuel Ochoa e Marco Patiño.


O sábado estivo marcado pola chuvia e o frío, pero a xornada desenrolouse sen problemas. O domingo, a pesares de que o tempo tivo melloría, suspendeuse a competición a causa das fortes rachas de vento que facían imposible o trazado por parte dos piragüistas.


Este ano a Federación Española de Piragüismo cambiou o sistema de competición da Liga de Slálom, tendo lugar ao longo de dúas xornadas, puntuando o resultado dos dous días. A consecuencia da suspensión do domingo, solo se tiveron en conta os resultados do sábado.


Os Teixugos volven a dar fe do seu bo momento regresando para a casa con tres medallas. Luís Fernández quedou terceiro en C1 sénior, Manuel Ochoa tamén terceiro en K1 júnior e Brais Castro gañou na categoría C1 júnior. Resultados que poñen aos Teixugos no máis alto do Slálom español.

Teixugos en Irún

Brais Castro gañador en C1 júnior

TRES TEIXUGOS NO EQUIPO NACIONAL DE SLÁLOM

Histórica fin de semana para o Club Deportivo Miño, que logrou que tres dos seus piragüistas entraran a formar parte do equipo nacional.
Na pasada fin de semana celebrouse a 1ª Competición da Copa de España de Slálom, que ademais funcionou como 1º selectivo. Luís Fernández, Brais Castro e Manuel Ochoa foron quen de entrar nos seis mellores da súa categoría e pasar ao 2º selectivo a celebrar na localidade francesa de Pau.
 Esta fin de semana, na canle de Pau tivo lugar o 2º selectivo. Sábado cada deportista fixo dúas mangas e o domingo outras dúas. O resultado final non puido ser mellor. Luís Fernández, que adestra desde fai anos no centro nacional da Seu D´Urgell, acadou praza na modalidade C1 absoluta e C1 sub-23. Brais Castro entrou en C1 júnior e Manuel Ochoa en k1 júnior, ámbolos dous están becados no Centro Galego de Tecnificación Deportiva en Pontevedra, adestrados por Ekhi Díez. Xunto a eles tres entrou tamén outra galega do centro, Ainhoa Lameiro, do Club Penedo de Caldelas.
Histórico resultado para o slálom galego, xa que a selección nacional desta modalidade está dominada desde fai anos por cataláns e vascos, sendo a primeira vez que un galego entra na categoría absoluta, e, a primeira tamén, que tantos galegos superan o selectivo.
Os catro, xunto cos restantes seleccionados, representarán a España no Campionato do Mundo que se disputará en Cracovia, Polonia.
O mérito destes deportistas e maior, se cabe, porque tiveron que clasificarse coa desvantaxe que supón que as probas se realizaron na canle na que adestra o equipo catalá, Seu, e na que adestra o equipo vasco, Pau. Eles xogaban na casa, os nosos xogaron fóra.

1ª COMPETICIÓN COPA DE ESPAÑA DE SLÁLOM-SEU 12/13-03-2016

Esta fin de semana, o 12 e 13 de marzo, celebrouse a primeira competición da Liga Española de slálom “Manuel Fonseca”, na localidade catalá da Seu D`Urgell. Os deportistas do Club Deportivo Miño levaba moitas expectativas, pero non se viron todas cumpridas, pois a competición foi dura ao longo de dous días. Aínda así o club acadou dúas medallas de prata: Luís Fernández en C1 na categoría sénior e Brais Castro, tamén en canoa pero categoría júnior. Manuel Ochoa rozou o podio cunha quinta praza en K1 júnior e, na mesma categoría, Brais Castro quedou sexto. Esta competición forma parte ademais das probas para o Selectivo Nacional, que continuaran a vindeira fin de semana na localidade francesa de Pau. Para este segundo selectivo clasificáronse Luís Fernández, Brais Castro e Manuel Ochoa. Sábado e domingo farán as súas baixadas intentando estar entre os mellores para formar parte da selección nacional Júnior e SUB-23.

2º COMPETICIÓN DA LIGA GALEGA DE SLÁLOM-SALVATERRA, 05-03-2016

Na mañá deste sábado tivo lugar a 2ª competición da Liga Galega de Augas Bravas 2016. Celebrouse no río Tea, en Alxén, Salvaterra do Miño, nesta ocasión organizada polo Club Piragüismo Penedo. Participaron unha centena de deportistas das categorías sénior, júnior, cadete e infantil.

O Club Deportivo Miño acudiu con 10 deportistas que fixeron un total de 14 participacións pois algúns deles fixeron dobre participación, baixando en kaiak e canoa.

Andrea González, na categoría sénior, gañou en C1 e quedou segunda en K1. Na mesma categoría Laura Alonso quedou segunda en C1 e terceira en K1. Na categoría júnior, Brais Castro, gañou en C1 e quedou terceiro en K1 e Manuel Ochoa gañou en k1 e quedou segundo en C1. Ariadna Pereira foi prata en K1 Infantil.

Sumando polo tanto tres ouros, catro pratas e dous bronces para os Teixugos. Na puntuación final por equipos os Club Deportivo Miño-Teixugos quedou en primeiro lugar con 172 puntos, seguido polo Club Tea de Mondariz con 167 e terceiro o Club Penedo con 112.

 A seguinte cita será vindeira fin de semana na 1ª Competición da Copa de España que se celebrará na canle da Seu D´Urgell, e que ademais será selectiva para conseguir praza para o equipo nacional. SORTE TEIXUGOS!!!

COPA DAVID CASTRO DE PIRAGÜISMO 28/02/2016

Este domingo celebrouse no río da Pedra, en Tomiño, a Copa David Castro de slálom. Organizada pola Federación Galega de Piragüismo e polo Club Deportivo Miño, esta é primeira das competicións desta tempada da Liga Galega de Promoción de Slálom. Participaron 7 clubs galegos cun total de 78 deportistas das categorías alevín, infantil e benxamín. Os Teixugos remataron cun resultado inmellorable, xa que acadaron 6 medallas de ouro, dúas de prata e dúas de bronce, sendo o club participante que acadou máis podios. Alba Soutelo conseguiu dúas primeiras prazas en K1 e C1 Alevín, Ariadna Pereira tamén con dúas primeiras prazas en K1 e C1 Infantil; e Sergio Martínez tamén primeiro nas dúas modalidades, K1 e C1 Alevín. Samuel Castro e Ainhoa Barreiro foron prata en C1 Alevín e bronce en K1 Alevín nas categorías masculina e feminina respectivamente. Na clasificación final por equipos quedou en primeiro lugar o Club Piragüismo Penedo de Caldelas, segundo o Club Piragüismo Tea de Mondariz e terceiro o Club Deportivo Miño-Teixugos. A seguinte cita co slálom será a 2ª competición da Copa Galega que terá lugar a próxima fin de semana en Salvaterra. FOTOS