LUÍS FERNÁNDEZ, UN TEIXUGO NO EQUIPO NACIONAL

Os meses de xuño e xullo forno datas intensas para o piragüista Luís Fernández. Este canoísta de Salceda de Caselas, integrante do Club Deportivo Miño- Teixugos, logrou superar os selectivos nacionais de slálom e entrar a formar parte do Equipo Nacional absoluto, na modalidade C1 o pasado mes de maio. Luís é o único galego que conseguiu forma parte deste Equipo Nacional.

A súa participación na Liga Internacional comezou en Praga onde se celebrou o Campionato de Europa do 3 ao 6 de xuño. Nesta competición non lle foi moi ben, quedando fóra de semifinais e rematando no trixésimo noveno lugar.

Do 21 ao 24 de xuño participa na 1ª Copa do Mundo na localidade eslovaca de Liptovsky Mikulas, onde Luís fixo o seu mellor papel. Nesta ocasión comezou con bo pé, cunha primeira baixada, na que a pesares de facer bo tempo, non acadou semifinais, cousa que si fixo no segundo intento. En semifinais a súa baixada foi impecable e rápida, quedando a segundo e medio de entrar en finais. Rematou finalmente na décimo sétima posición.

Esta pasada semana rematou esta primeira fase internacional en Cracovia, Polonia, onde do 28 de xuño ao 1 de xullo se celebrou a 2ª Copa do Mundo. Nesta ocasión fixo dúas boas baixadas, pero non deu entrado en semifinais, quedando a só dous segundos de logralo. Rematou trixésimo noveno.

Quédanlle agora por diante uns días de descanso, para en breve tomar rumbo a Ivrea, Italia, onde participará no Campionato do Mundo Sub-23.

SELECTIVOS NACIONAIS DE SLÁLOM 2018

Do 27 ao 29 de abril na localidade ilerdense de Seu D´Urgell e do 2 ao 4 e maio na localidade francesa de Pau, tiveron lugar as probas selectivas para formar parte dos equipos nacionais sénior e sub-23. En cada unha das sedes cada deportista fixo un total de tres baixadas: unha primeira proba de dúas mangas, na que contaba a mellor e unha segunda proba dunha soa manga. Das catro probas, puntuaban so as tres mellores. 

Tres foron os deportistas do Club Deportivo Miño que superaron o filtro de probas para formar parte deste selectivo: Brais Castro e Luís Fernández na modalidade de canoa e Manuel Ochoa na de kaiak. 

Luís Fernández, da localidade de Salceda de Caselas, tivo unha moi boa participación que o levan a acadar a terceira praza do equipo sénior, xunto cos catalás Miquel Travé do Cadí Canoe Kayak e Dani Marzo do Capitán Nemo . Como membro do equipo español participará no europeo e en dúas Copas do Mundo. Ao ser menor de 23 anos, tamén formará parte do equipo español sub-23, onde acadou a primeira praza, por diante do segoviano David Llorente do Río Eresma e do ilerdense Jordi Tebé. Este posto dalle dereito a participar no Mundial e no Europeo Júnior-Sub23. Para Luís non é a súa primeira experiencia como membro da Selección Española, xa que dende fai anos é un habitual dos equipos nacionais de C1, primeiro como júnior e máis tarde en sénior e sub23. 

O tomiñés Manuel Ochoa, a pesar de facer unhas baixadas rápidas e limpas, non foi quen de entrar no equipo sénior, quedando no posto nove, pero si no Sub23, no que acadou a terceira praza por detrás do donostiarra Unai Nabaskues do Atlético San Sebastián e de David Llorente do Río Eresma. Este posto válelle para formar parte do equipo nacional no Mundial Júnior-sub23. Está é a primeira vez que un galego acada un posto na Selección Española na modalidade de K1. 

O terceiro teixugo en lograr entrar nos selectivos nacionais foi Brais Castro, pero non foi quen de entrar no equipo, rematando oitavo no selectivo sénior e sexto en sub23. 

Este é un éxito sen precedentes para o slálom galego, que desde fai un par de anos e quen de poñerse a nivel de vascos e cataláns, que dominaban con comodidade esta espectacular modalidade. 

Luís Fernández

Manuel Ochoa

Brais Castro

II COPA GALEGA DE PROMOCIÓN DE SLÁLOM, CORDEIRO: 22/04/2018

Este domingo celebrouse nas augas do río Tea, no lugar de Cordeiro en Salvaterra a segunda competición da liga galega de Promoción de Slálom coa participación dos máis pequenos dos clubs galegos. Algo máis de medio cento de pequenos padexeiros acudiron a cita. O Club Deportivo Miño acudiu ao evento con nove piragüistas, a maioría dos cales tiveron dobre participación ao baixar en kaiak e canoa. Os Teixugos remataron a xornada con oito podios.
 En K1 Home Infantil Sergio Rodriguez foi o gañador da proba, Alexis Segadaes subiu tamén ao podio co seu terceiro lugar, Samuel Castro rematou quinto e Mateo Rivas undécimo.
En C1 Infantil o gañador foi Samuel Castro e o seu compañeiro Sergio foi segundo.
 Na categoría Alevín masculino Adrián LLuch rematou sexto en kaiak e oitavo en canoa.
Os nosos representantes máis novos, Sergio Álvarez e Javier LLuch, remataron cuarto e quinto, respectivamente, na categoría benxamín masculina.
En categoría feminina os Teixugos solo contaron con participación na categoría Infantil, copando as dúas deportistas os podios de kaiak e canoa. En K1 Ainhoa Barreiro foi a gañadora e Alba Soutelo segunda, e en C1 a gañadora foi Alba, seguida por Ainhoa.
No resultado final por clubs o Deportivo Miño volveu gañar cun total de 196 puntos, compartindo podio co Penedo Importa de Caldelas con 149, e o Montaña Quixos de Monforte con 120.
A vindeira cita dos Teixugos co slálom será esta semana na Seu D´Urgell, onde Luís Fernández e Brais Castro en canoa e Manuel Ochoa en kaiak , intentarán superar os selectivos para formar parte do equipo español de slálom sénior e Sub-23.

COPA DAVID CASTRO, LIGA GALEGA DE PROMOCIÓN DE SLÁLOM, TOMIÑO: 15/04/2018

Despois do seu aprazamento por causas meteorolóxicas, por fin este domingo celebrouse no río da Pedra en Tomiño a Copa David Castro de Slálom, correspondente a Liga Galega de Promoción de Slálom. Os máis pequenos de cada club acudiron a esta cita, dando o mellor de si mesmos. 

O balance final para o club Deportivo Miño, non poido ser mellor, con nove medallas para s seus deportistas. 

Ainhoa Barreiro gañou en K1 e foi segunda en C1 na categoría Infantil, a súa compañeira de equipo e categoría, Alba Soutelo foi a mellor en C1 e segunda en K1. 

En K1 benxamin, Javier Luch acadou o bronce, o seu compañeiro Sergio Álvarez foi cuarto e Pedro Lomba sexto, nesta categoría o gañador foi o representante do Club Tea de Mondariz Pablo Alfaya. 

En K1 alevín, o gañador foi Valentín Varela do Penedo Importa, e o teixugo Adrián Lluch rematou sexto. Na mesma categoría pero na modalidade C1, Adrián rematou cuarto, sendo o gañador Aarón González do Penedo. 

E finalmente na categoría Infantil masculina, na modalidade K1,  Sergio Rodríguez foi o gañador da proba, Samuel Castro rematou segundo, Alexis Segadaes cuarto e Mateo Álvarez sexto. En canoa, Samuel Castro foi primeiro e Sergio Rodríguez segundo.

A próxima cita co slálom será o vindeiro domingo en Salvaterra, coa II Copa Galaico Portuguesa de Promoción de Slálom.

Para ver máis fotos preme AQUÍ.

IICOPA DE ESPAÑA DE SLÁLOM, MONDARIZ: 17/18-03-2018

Esta fin de semana celebrouse en Mondariz-Balneario, nas augas do río Tea, a segunda das competicións da Copa de España de Slálom. O bo tempo acompañou a esta celebración na que se deron cita máis de 200 participantes, os mellores do slálom español. So faltou a olímpica Maialen Chorraut, por lesión.

O club Deportivo Miño inscribiu a 15 deportistas, pero so 10 participaron na competición oficial, os outros cinco foron en calidade de abridores.
Na categoría absoluta, sénior feminino, Laura Alonso foi a mellor no décimo cuarto lugar cun recorrido sen penalizacións, Laura Soutelo e Marina Ruedas decimo oitava e décimo novenas respectivamente.
Na categoría cadete, Ariadna Pereira, baixou en canoa e caiac. En canoa rematou quinta, non entrando en finais por non superar o tempo de corte, na categoría k1, conseguiu facer final, rematando cuarta e rozando a medalla de bronce.
En C1 sénior tanto Brais Castro como Luís Fernández superaron as clasificatorias do sábado, entrando en semifinais. Xa na mañá do domingo Luís conseguiu pasar a finais mentres que Brais Castro quedou fóra por apenas dous segundos, rematando finalmente nun envexable sexto posto. Na final Luís Fernández fixo unha baixada impresionante que lle valeu a medalla de prata por detrás de Dani Marzo e por diante do olímpico Ander Elosegui. Esta é a segunda medalla para o deportista de Salceda na Liga Española de Slálom Olímpico, o que da fe do seu bo momento esta tempada.
 En K1 sénior, a categoría máis numerosa e igualada, Manuel Ochoa fixo unha boa clasificatoria na mañá do sábado, pasando a semifinais co quinto mellor tempo. A primeira hora do domingo cunha baixada rápida e sen penalizacións conseguiu entrar en finais. Xa na final, Manuel fixo unha baixada limpa e moi rápida que lle valeu unha medalla de bronce a apenas un segundo do segundo clasificado Unai Nabaskues e a tres do gañador Joan Crespo.
 En K1 veterano, Emilio Rodríguez, fixo finais e na mañá do domingo foi quen de facer o mellor tempo da súa categoría, por diante de Raúl Barba e de Juan Segundo, o que o fixo merecedor da medalla de ouro.
 Na clasificación final por equipos o Club Deportivo Miño-Teixugos remataron sétimos. Destacar o segundo lugar conseguido polos galegos do Penedo e o quinto lugar do club organizador do evento, o Tea de Mondariz. Non puido ir mellor o evento para os teixugos, coas súas tres medallas.
O seguinte reto para este deportistas será superar os selectivos para formar parte do equipo español sénior e sub-23 de slálom, que se celbraran en abril e maio nas localidades de Pau e Seu D´Urgell, e para os que están clasificados Brais Castro e Luís Fernández en canoa, e Manuel Ochoa en caiac.
Para ver fotos, preme AQUÍ

I COPA DE ESPAÑA DE SLÁLOM, ORTHEZ:24-25/02/2018

Esta fin de semana tivo lugar na localidade francesa de Orthez a primeira das competicións da Liga Española de Slálom.
O club organizador, o Atlético San Sebastián, recorreu a esta canle francesa, na que adestra habitualmente, para celebrar esta primeira Copa e España.
 O club Deportivo Miño-Teixugos acudiu con oito palistas, dous dos cales foron en calidade de abridores, para coller experiencia e adestrar, pero non puntuando para o club.
 Esta competición ten gran relevancia, pois xunto coa que se celebrará en Mondariz, vai determinar os palistas que formaran parte do proceso selectivo nacional no que se seleccionará o equipo nacional de slálom 2018.
O sábado celebráronse as probas clasificatorias , cunha segunda baixada de repesca para os que non deron entrado en semifinais. E na mañá do domingo semifinais e finais.
As representantes femininas do club, non deron entrado en finais, rematando Laura Alonso en décimo quinto lugar en K1 Sénior e Ariadna Pereira sexta en K1 Cadete.
 Os catro representantes masculinos pasaron a semifinais, rematando en moi bo lugar.
Emilio Rodríguez, na categoría K1 Veterano, fixo unha gran baixada nas clasificatorias, tendo serias opcións a medalla, pero na final foi algo lento e rematou quinto.
 Manuel Ochoa, en K1 sénior, a categoría máis numerosa e igualada, rematou nun impresionante quinto posto, a pesar de non estar no seu mellor momento por problemas de saúde.
 Brais Castro, en C1 sénior, fixo unha boa clasificatoria e conseguiu entrar en semifinais , onde fixo unha gran baixada, rebaixando en varios segundos a do sábado, pero que non lle permitiron facer final por apenas dous segundos, rematando oitavo.
Luís Fernández, tamén en C1 sénior, tivo unha impresionante actuación esta fin de semana, tanto o sábado coma o domingo demostrou o seu bo momento, rematando en segundo lugar, por detrás de Daniel Marzo e por diante do olímpico Ander Elósegui. A vindeira cita co slálom será en Mondariz, onde o club Tea organizará a 2ª Copa de España, tamén puntuable para o selectivo nacional.

 

II COPA GALEGA DE SLÁLOM, SALVATERRA: 04/02/2018

Este domingo celebrouse en Alxén, Salvaterra de Miño, a II Copa Galega de Slálom, correspondente a Liga Galega de Slálom, a que o Club Deportivo Miño acudiu con 11 deportistas. Ao igual que a semana anterior, os resultados non puideron ser mellores.
Na categoría sénior, Brais Castro foi o gañador en C1 e segundo en K1, superado solo por Axel Afonso do club Tea, Laura Soutelo gañou en K1 e Marina Ruedas foi segunda.
Na categoría cadete, Ariadna Pereira foi segunda en C1 e K1, por detrás de Roxana Bernárdez do Tea.
Na categoría Infantil, Ainhoa Barreiro gañou en K1 e  en C1, Alba Soutelo foi segunda tamén en K1 e C1, Samuel Castro gañou en C1 e foi segundo en K1, Sergio Rodríguez primeiro en K1 e terceiro en C1 e Alexis Segadaes rematou terceiro en K1.
Inmellorable, pois, a participación do Club Deportivo Miño, cun total de 15 podios, dos cales 6 foron ouros, 7 pratas e 2 bronces.
Na clasificación por equipos, o Piragüismo Penedo foi o gañador, seguido do Tea de Mondariz e no terceiro lugar os Teixugos.
A vindeira cita co slálom para os teixugos será o 24 e 25 deste mesmo mes na localidade francesa de Orthez onde se celebrará a primeira Copa de España.
Para ver máis fotos preme AQUÍ