SETE MEDALLAS PARA OS TEIXUGOS NA COPA GALEGA DE NOVAS PROMESAS DE SLÁLOM

    Nova competición esta fin de semana correspondente a Liga Galega De Novas Promesas de Slálom, nesta ocasión unha Copa Galega. Recordar que a Liga Galega de Slálom consta de tres niveis, o de promoción para os máis pequenos, a de novas promesas coas categorías infantil e cadete e a liga oficial ou profesional coas categorías sénior e júnior.

     Este domingo o torneo foi en Dumbría, nas augas do río Xallas, a onde o Club Deportivo Miño-Teixugos acudiu cunha representación de once deportistas. 

 

    Na categoría Infantil Feminina, en C1 muller Infantil Nerea Álvarez gañou a proba e Leila Álvarez fíxose coa prata. En K1 podio de teixugas co ouro para Rita Olveira, prata para Leila Álvarez e bronce para Nerea Álvarez; Catalina Sánchez rematou cuarta e Beatriz Sánchez sexta.

     En K1 Infantil Masculino, Lois Montenegro conseguiu o bronce, Izan Vicente foi sexto, Alejandro Barreiro octavo e Leo Álvarez duodécimo. 

    En K1 cadete masculino, bronce para Brais Álvarez e quinto lugar para Iván Cruz. 

    Sete medallas para os teixugos, dúas de ouro, dúas de prata e tres de bronce; pero o máis importante é que participar nestas actividades permítelles a nenas e nenos gozar do deporte nunhas idades en que a actividade física é moi importante, viaxar e coñecer novos lugares, e, facer novos amigos. 

     Na clasificación final por clubs, o Deportivo Miño-Teixugos, rematou terceiro, por detrás do Tea de Mondariz, que gañou a proba, e do Montaña Quixós de Monforte. 

 

SETE MEDALLAS PARA OS TEIXUGOS NO CAMPIONATO GALEGO DE NOVAS PROMESAS DE SLÁLOM

    Este domingo celebrouse no campo de slálom de Covas, Vila Nova de Cerveira, o Campionato Galego de Nova Promesas de Slálom. Deportistas das categorías cadete e infantil demostraron as súas habilidades e nivel deportivo nas augas do río Coura. A competición, organizada polo Club Deportivo Miño-Teixugos, contou con moi boas condicións de caudais de auga. 

    Once foron os deportistas que representaron ao club Tomiñés nesta xornada. 

    Na categoría Infantil Feminina, en C1 muller Infantil Nerea proclamouse campioa galega e a súa irmá Leila subcampioa. 

    En K1 dominio total das teixugas, Rita Olveira campioa galega, Nerea Álvarez subcampioa, medalla de bronce para Catalina Sánchez, cuarto lugar para Leila Álvarez e quinto para Beatriz Sánchez. 

     En K1 Infantil Masculino, Lois Montenegro conseguiu o bronce, Izan Vicente foi sexto, Alejandro Barreiro sétimo e Leo Álvarez undécimo.

     En K1 cadete masculino, bronce para Brais Álvarez e sétimo lugar para Iván Cruz. 

    Dúas campioas galegas, Nerea e Rita, dúas medallas de prata e tres bronces, fan un total de sete podios para os teixugos, un gran resultado para tan importante xornada. 

    Na clasificación final por clubs, o Deportivo Miño-Teixugos, rematou terceiro, por detrás do Tea de Mondariz, que se converteu no novo campión galego da categoría, e do Montaña Quixós de Monforte. 

 

BOA ACTUACIÓN DOS TEIXUGOS LUÍS FERNÁNDEZ E MANU OCHOA NA COPA DE ESPAÑA DE SLÁLOM

 

    Esta fin de semana celebrouse en Orthez(Francia) a 3ª Copa de España de Slálom e 2ª Copa de España de Caiac Cross. Probas de gran importancia porque forman parte dos selectivos para determinar o equipo que representará a España nas competicións internacionais. A proba estivo determinada polas malas condicións meteorolóxicas e unha organización un tanto deficiente, lonxe do que deberían ser unha probas selectivas. 

    Do Club Deportivo Miño-Teixugos participaron Luís Fernández e Manuel Ochoa, centrados máis en acadar unha das prazas no equipo nacional que no medalleiro. 

     Manu comezou a súa participación o sábado nas clasificatorias en K1, pasando sen problema a finais ao rematar cuarto, pola tarde, nas finais, volveu a facer unha gran baixada quedando as portas do podio co cuarto mellor tempo. O domingo tocoulle o turno ao caiac cross, Ochoa gañou con claridade a contra reloxo,pasando a seguinte fase. En cuartos volveu impoñerse sen problema nos enfrontamentos. Nas semifinais tamén gañou a súa serie, pero sufriu unha penalización na saída, que o deixaron fóra da final. Rematou sétimo na fase de enfrontamentos. 

    Luís comezou o sábado en C1 masculino sénior, acadando o pase a finais co cuarto mellor tempo, pola tarde nas finais, seis segundos de penalización deixárono fóra do podio, rematando en noveno posto. O domingo participou en caiac cross, onde nas probas de contra reloxo rematou décimo cuarto, clasificándose para cuartos de final. Nos enfrontamentos entrou terceiro, quedando fóra de semifinais, rematou a competición en décimo segundo lugar. 

    Tanto Luís como Manu demostraron que están na elite do slálom español, aínda que non acadaran podio. Agora quedan pendentes do ditame do equipo técnico da Federación Española de Piragüismo, que seguindo os criterios publicados con antelación, deberán determinar se formarán parte do equipo nacionalesta tempada.

 

O CLUB DEPORTIVO MIÑO-TEIXUGOS GAÑADOR DA 2ª COPA GALEGA DE PROMOCIÓN DE SLÁLOM

    No embalse de Verducido tivo lugar este domingo a 2ª das Copas Galegas de Promoción de Slálom, na que os máis pequenos da comunidade autónoma estiveron medindo as súas habilidades na auga.

     O Club Deportivo Miño-Teixugos participou cun equipo de trece deportistas que tiveron un papel máis que destacado. 

 

    En C1 Infantil Feminino, Nerea Álvarez fixo a mellor manga con diferencia, gañando a proba, a medalla de prata foi para Leila Álvarez. 

    Nerea volveu acadar outro ouro en K1 feminino, nun podio totalmente teixugo, no que Catalina Sánchez rematou segunda e Leila Álvarez terceira. Na mesma categoría Rita Olveira foi cuarta e Beatriz Sánchez, quinta. 

    En K1 feminino benxamín, Iria Álvarez gañou a proba, conseguindo unha nova medalla de ouro. 

    En K1 infantil masculino Lois Montenegro, rematou terceiro, conseguindo o bronce; Izan Vicente foi cuarto, Alejandro Barreiro sétimo e Leo Álvarez octavo. 

    En K1 alevín Roque Olveira gañou a proba facéndose co ouro e Martín Vicente rozou o podio ao rematar cuarto. 

    En K1 benxamín, Brais Vicente tamén se impuxo, acadando un novo ouro para o club. 

    Gran actuación, cun total de nove medallas, para o Deportivo Miño: cinco de ouro, dúas de prata e dúas de bronce. 

    Na puntuación final por equipos os Teixugos foron os gañadores da proba con 259 puntos, o Club Piragüismo Penedo-Te Importa de Tui e o Montaña Quixós de Monforte foron segundos e terceiros respectivamente. 

 

MEDALLA DE PRATA PARA LUÍS FERNÁNDEZ NA 2ª COPA DE ESPAÑA DE SLÁLOM

     Esta fin de semana celebrouse na canle do Parc Olimpic do Segre a 2ª Copa de España de Slálom e a 1ª de Caiac Cross. Solo Luís Fernández e Manuel Ochoa acudiron en representación do Club Deportivo Miño-Teixugos. Para os dous teixugos a competición tiña gran importancia pois forma parte dos selectivos para o equipo nacional que acudirá ás diferentes competicións internacionais. 

    O sábado celebrouse a 1ª Copa de España de Caiac Cross, que comezou con dúas baixadas a contra reloxo, que eran as que puntuaban para os selectivos, seguidas dos enfrontamentos. O domingo foi o día para o slálom coa celebración da 2ª Copa de España, na que os deportistas fixeron unha baixada clasificatoria e os doce primeiros pasaban á final. 

    Luís Fernández comezou o sábado a súa participación en caiac cross, na contra reloxo rematou décimo cuarto, entrando nos enfrontamentos, superou os cuartos de final e caeu nas semifinais. O domingo chegoulle o momento ao slálom, Luís, fixo fronte ás clasificatorias en C1 que superou cun gran tempo, pero con dúas penalizacións nas portas 6 e 7 que o deixaron no sexto lugar. Na final volveu facer unha gran baixada, que só mellorou o catalá Marc Vicente, rematando en segundo lugar, e conseguindo a medalla de prata.  

    Manu Ochoa comezou o sábado coas dúas contra reloxo de caiac cross, e demostrou o seu dominio da modalidade ao gañar as dúas rondas, obtendo a máxima puntuación posible para os selectivos nacionais. Renunciou despois a participar nos enfrontamentos para evitar o desgaste físico e reservarse para o slálom do día seguinte. O domingo en K1 conseguiu entrar nas finais ao rematar sexto nas clasificatorias, e xa na finais, a piques estivo de subir ao podio, rematando cuarto. 

    En quince días, tanto Luís como Manu, volveran a competir en Orthez, na segunda proba dos selectivos para o equipo nacional, loitando por unha praza no equipo español. 

GRANDES RESULTADOS PARA MANU OCHOA E LUÍS FERNÁNDEZ NA COPA PIRINEOS

Ao longo destas dúas últimas fins de semana celebrouse a Copa Internacional do Pirineos, unha competición internacional de slálom, puntuable para o ranking mundial, que se celebra en dúas canles emblemáticas do Pirineo: o Stade d'Eaux Vives de Pau en Francia e o Prac Olimpic do Segre na Seu d'Urgell en España. Este torneo reúnen a deportistas dos cinco continentes, esta edición caracterizouse por unha elevadísima participación, con máis de cincocentos deportistas de vinte e tres países. Cada fin de semana hai unha competición diferente que puntúa por separado no ranking da federación Internacional, o 7 e 8 de marzo en Pau e o 15 e 16 na Seu. A suma de puntos das dúas competicións determina os gañadores absolutos.

Luís Fernández e Manuel Ochoa do Club Deportivo Miño-Teixugos acudiron con vistas a prepararse e mellorar o seu posto no ranking mundial, cara aos selectivos para formar os distintos equipos nacionais.

Na primeira competición en Pau, nin Luís en C1, nin Manu en K1, tiveron unha boa actuación, ámbolos dous fixeron unhas malas clasificatorias, rematando moi lonxe dos doce primeiro postos que permitían un acceso a finais. As cousas foron moito mellor para Ochoa en caiac cross, na contra reloxo acabou sétimo, gañou as loitas de octavos, cuartos e semifinais, chegando a finais, onde rematou segundo por detrás do francés Gael Adisson.

Esta fin de semana, na Seu d´Urgell as cousas foron moito mellor para os dous “teixugos”. Luis estivo brillante cun cuarto posto nas clasificatorias que mellorou nas finais, acadando a prata, solo superado polo catalá Miquel Travé. Manu foi sétimo nas clasificatorias, conseguindo o pase á final, onde un fallo na última das portas o deixaron nun meritorio décimo sétimo lugar. En caiac cross, Manu Ochoa, volveu demostrar o seu dominio da modalidade, gañando a contra reloxo e tódalas series ata chegar á final, onde entrou terceiro.

Na suma final das dúas competicións, Luís quedou décimo cuarto en canoa e Manu trixésimo quinto en caiac e segundo en caiac cross.

 

GRAN COMEZO DE TEMPADA PARA OS MÁIS PEQUENOS DO DEPORTIVO MIÑO-TEIXUGOS

 

    Este domingo celebrouse na praia fluvial do Cordeiro, en Salvaterra, a 1ª Copa Galega de Promoción de Slálom. As augas do río Tea acolleron esta primeira competición da Liga Galega de Promoción, destinada a nenos e nenas de idades comprendidas entre os sete e os trece anos. O Club Deportivo Miño-Teixugos acudiu ao evento con doce pequenos deportistas que gozaron do deporte e a amizade. 

     Na categoría infantil feminina as nosas padexeiras dominaron a competición. En canoa Nerea Álvarez impúxose cun gran tempo e Leila Álvarez foi segunda na súa estrea na modalidade. En caiac o podio foi enteiramente teixugo, Leila gañou o ouro, Nerea a prata e Rita Olveira, na súa primeira competición como infantil, acadou o bronce; Catalina Sánchez foi cuarta e Beatriz Sánchez sétima. 

    Pola súa banda, Iria Álvarez, en k1 benxamín, foi a gañadora da proba. 

    En K1 Infantil masculino Izan Vicente foi quinto, Lois Montenegro sexto ,Alejandro Barreiro oitavo e Leo Álvarez duodécimo. 

    En K1 Alevín, Roque Olveira acadou o ouro ao facer a mellor manga da categoría e Martín Vicente acabou quinto. 

    Na clasificación por equipos o Club Deportivo Miño-Teixugos gañou a proba cun total de 219 puntos, segundo foi o Montaña Quixós de Monforte con 147 e terceiros o Piraguismo Penedo de Tui con 97.