2º COMPETICIÓN DA LIGA GALEGA DE SLÁLOM-SALVATERRA, 05-03-2016

Na mañá deste sábado tivo lugar a 2ª competición da Liga Galega de Augas Bravas 2016. Celebrouse no río Tea, en Alxén, Salvaterra do Miño, nesta ocasión organizada polo Club Piragüismo Penedo. Participaron unha centena de deportistas das categorías sénior, júnior, cadete e infantil.

O Club Deportivo Miño acudiu con 10 deportistas que fixeron un total de 14 participacións pois algúns deles fixeron dobre participación, baixando en kaiak e canoa.

Andrea González, na categoría sénior, gañou en C1 e quedou segunda en K1. Na mesma categoría Laura Alonso quedou segunda en C1 e terceira en K1. Na categoría júnior, Brais Castro, gañou en C1 e quedou terceiro en K1 e Manuel Ochoa gañou en k1 e quedou segundo en C1. Ariadna Pereira foi prata en K1 Infantil.

Sumando polo tanto tres ouros, catro pratas e dous bronces para os Teixugos. Na puntuación final por equipos os Club Deportivo Miño-Teixugos quedou en primeiro lugar con 172 puntos, seguido polo Club Tea de Mondariz con 167 e terceiro o Club Penedo con 112.

 A seguinte cita será vindeira fin de semana na 1ª Competición da Copa de España que se celebrará na canle da Seu D´Urgell, e que ademais será selectiva para conseguir praza para o equipo nacional. SORTE TEIXUGOS!!!

COPA DAVID CASTRO DE PIRAGÜISMO 28/02/2016

Este domingo celebrouse no río da Pedra, en Tomiño, a Copa David Castro de slálom. Organizada pola Federación Galega de Piragüismo e polo Club Deportivo Miño, esta é primeira das competicións desta tempada da Liga Galega de Promoción de Slálom. Participaron 7 clubs galegos cun total de 78 deportistas das categorías alevín, infantil e benxamín. Os Teixugos remataron cun resultado inmellorable, xa que acadaron 6 medallas de ouro, dúas de prata e dúas de bronce, sendo o club participante que acadou máis podios. Alba Soutelo conseguiu dúas primeiras prazas en K1 e C1 Alevín, Ariadna Pereira tamén con dúas primeiras prazas en K1 e C1 Infantil; e Sergio Martínez tamén primeiro nas dúas modalidades, K1 e C1 Alevín. Samuel Castro e Ainhoa Barreiro foron prata en C1 Alevín e bronce en K1 Alevín nas categorías masculina e feminina respectivamente. Na clasificación final por equipos quedou en primeiro lugar o Club Piragüismo Penedo de Caldelas, segundo o Club Piragüismo Tea de Mondariz e terceiro o Club Deportivo Miño-Teixugos. A seguinte cita co slálom será a 2ª competición da Copa Galega que terá lugar a próxima fin de semana en Salvaterra. FOTOS

VII TAÇA IBÉRICA DE SLALOM

Esta fin de semana tivo lugar en Azenha de Pagade, na localidade lusa de Covas, a VII Taça Ibérica de Slálom, coa que se abre a tempada de piragüismo na modalidade de augas bravas, tanto a nivel autonómico galego como nacional portugués. Nesta xornada de convivencia participaron os clubs galegos e portugueses máis importantes. Durante a tarde do sábado celebráronse as eliminatorias, cun circuíto difícil e de moi alto nivel, polo que moitos deportistas xa quedaron eliminados de finais ao non superar o tempo de corte. Ao longo da mañá do domingo tiveron lugar as finais, cos seguintes gañadores; na modalidade de kaiak ou k1masculino: en Infantil, Eduardo Teixeira do ADA de Amarante; en Cadete, Jorge Quintáns do Club Sensiras de Dumbría; en Júnior, Manuel Ochoa dos Teixugos; en Sénior, Ivan Silva do Augas Bravas Club de Amarante; e en Veterano Aaron Rey do Club Sensiras de Dumbría. Na modalidade de kaiak ou k1 Feminino : en Infantil, Ariadna Pereira dos Teixugos; en Cadete Ainhoa Lameiro do C.P. Penedo de Caldelas; e en Sénior Andrea González dos Teixugos. Na modalidade de canoa ou C1 masculino: en Infantil, Borja Martinez CP Penedo de Tui; en Cadete, Miguel Olaya do CP Penedo; en Júnior, Brais Castro dos Teixugos; e en Sénior José Carvalho do ADA Amarante. E finalmente, na modalidade de canoa ou C1 feminino: en Infantil, Ariadna Pereira dos Teixugos; en Cadete, Ainhoa Lameiro do CP Penedo de Caldelas; e en C1 Sénior Lara Silva do Augas Bravas Club de Amarante. A vista dos resultados as cousas non puideron ir mellor para os Teixugos, o Club Deportivo Miño, rematou con cinco medallas de ouro, curiosamente, non acadou ningunha de prata ou de bronce. Na clasificación final por clubs quedou en primeiro lugar o Augas Bravas Club de Amarante, segundo O Club Deportivo Miño-Teixugos e terceiros o CP Penedo de Caldelas. Destacar destas dúas xornadas o elevado nivel dos deportistas participantes e a impecable organización da mesma.

COMPETICIÓN AMISTOSA EN COVAS- 27-12-2015

Tres clubs, Tea, Darque e Teixugos, celebraron unha competición amistosa este domingo no río Coura, na localidade portuguesa de Covas.
O ambiente foi do máis lúdico e festivo, nenos e nenas de tódalas idades e categorías competiron como preparación para a tempada 2016, que dará comezo o 23 e 24 de xaneiro coa Taça Ibérica de Slálom.

CAMPIONATO DE PROMOCIÓN DE SLÁLOM- SABERO 22 DE AGOSTOS DE 2015

Esta fin de semana tivo lugar na localidade leonesa de Sabero o Campionato de España de Promoción de Slálom. Nestas competicións participan solo deportistas da categoría infantil, nenos e nenas nacidos nos anos 2001 ou 2002. Dentro desta categoría o Club Deportivo Miño Teixugos conta con Ariadna Pereira e Gabriel Alonso. Ambos deportistas participaron nas categoría de canoa e kaiak. Ariadna Pereira estivo rozando o bronce ao acadar dous cuartos postos en K1 e C1 muller infantil B. Pola súa banda Gabriel Alonso rematou décimo noveno en C1 infantil A home e vixésimo en K1 infantil A home.


Pola tarde celebrouse o campionato de España por autonomías na categoría de patrullas. Ariadna Pereira formou parte dun dos equipos da Federación Galega, xunto con Yasmina Díaz do Quixós e Lorena Costa do Dumbría, acadando este equipo unha medalla de bronce en K1 muller.


Na clasificación por equipos o Club Deportivo Miño rematou duodécimo xa que con so dous deportistas non é doado acadar puntos.

 


O domingo todos os Teixugos que acudiran a Sabero para adestrar participaron no Campionato de Slálom de Castilla León, outros equipos españois quedaron tamén nas ribeiras do Esla para participar neste campionato castelán, que non lles puntuou pero que lles valeu como adestramento e para traer algunha que outra medalla, tal e como atestiguan as fotos.
 

CAMPIONATO DE ESPAÑA, ORTHEZ 1 E 2 DE AGOSTO DE 2015

Esta fin de semana celebrouse na localidade francesa de Orthez o Campionato de España de Slálom Olímpico. Esta é a derradeira e máis importante competición da Liga Española de Slálom Olímpico “Manuel Fonseca” . Sábado e domingo fixeron as súas baixadas na canle francesa os mellores piragüistas de augas bravas de España . O club Deportivo Miño-Teixugos acudiu con sete deportistas que fixeron un moi bo papel. Destaca sobre todo a medalla de prata acadada por Manuel Ochoa en K1 xuvenil Masculino. Brais Castro rematou cuarto na mesma categoría e sexto en C1 xuvenil. Laura Alonso e Andrea González empataron no décimo posto en K1 sénior e Laura Soutelo obtivo a mesma posición en K1 xuvenil. Emilio Rodríguez rematou vixésimo primeiro en K1 sénior e Marco Patiño vixésimo terceiro en K1 cadete. Na clasificación por equipos os Teixugos remataron na quinta posición, sendo o club galego mellor clasificado. Con esta competición remata a Liga Española de Slálom Olímpico deste ano, na que cabe destacar o auxe dos representantes galegos nun deporte que tradicionalmente dominaban vascos e cataláns, e iso que Galicia non conta con ningunha canle para a práctica do slálom.

CAMPIONATO GALEGO DE SLÁLOM, PADRÓN 28 XUÑO DE 2015

Este domingo celebrouse en Padrón, nas augas do río Ulla,  o Campionato Galego de Slálom, a competición máis importante da Liga Galega de slálom. Participaron  clubs galegos e portugueses, aínda que estes últimos non contaban para o medalleiro.

A competición tivo lugar ao longo de todo o día. O Club Deportivo Miño- Teixugos participou con 8 piragüistas, moitos dos cales participaron en dúas modalidades ,canoa e  kaiak.

Remataron como campionas galegas Andrea González en K1 sénior, Sara Vázquez en C1 sénior e Marina Ruedas en K1 júnior. Acadaron medallas de prata Laura Soutelo en K1 júnior, Brais Castro en C1 júnior e  Manuel Ochoa en K1 júnior; e foron bronce Sara Vázquez en K1 sénior, Emilio Rodríguez en K1 sénior, Brais Castro en K1 júnior e Laura Alonso en C1 sénior.

Na modalidade de patrullas, tanto o equipo feminino, formado por Laura Alonso, Andrea e Sara, coma o masculino, formado por Brais, Manuel e Emilio, resultaron gañadores, e por tanto, campións galegos.

Na clasificación por equipos o Club Deportivo Miño-Teixugos rematou segundo por detrás do Club Tea de Mondariz.

Máis fotos AQUÍ