COPA DO MUNDO, CRACOVIA: 17 a 19/06/2022

Do 17 ao 19 de xuño disputouse na cidade polaca de Cracovia unha Copa do Mundo de Slálom. Como parte do equipo nacional, os deportistas do Club Deportivo Miño-Teixugos, Luís Fernández e Manuel Ochoa participaron no evento. 

O salcedán Luís Fernández foi un dos tres representantes españois en canoa ou C1. O venres pola tarde, loitou por acadar un posto nas semifinais, non o conseguiu a primeira, pero si na repesca. Na mañá do domingo fixo unha baixada en semifinais moi boa, pero dous toques nas portas 19 e 20 deixárono ás portas de acadar a final. Rematou a copa do mundo nun meritorio décimo sexto lugar. 

O tomiñés Manuel Ochoa tivo dobre participación en caiac, na modalidade tradicional de K1 e en extremo. Na mañá do venres, en K1, foi quen de meterse nas semifinais na primeira rolda. Ao día seguinte intentou acadar unha das dez prazas de finais, comezando a baixada con moi bo pé, pero un erro nunha das portas e un toque noutra, fixo que perdera uns segundos , quedando lonxe das finais. Rematou a copa na trixésimo cuarta posición. Ese mesmo sábado pola tarde participou na contra-reloxo para poder estar entre os 32 seleccionados para cuartos de final. Conseguiu o sétimo posto, a apenas segundo e medio do primeiro. Na tarde do domingo superou os cuartos de final gañando a súa serie pero non as semifinais. Rematou a copa de slálom extremo décimo terceiro. 

 Tanto Luís como Manu xa están de camiño de Tacen, Eslovenia, onde disputarán a seguinte Copa do Mundo.

2022 ICF CANOE SLALOM WORLD RANKING, AUGSBURG: 4-5/06/2022

Na fin de semana do 4 e 5 de xuño, celebrouse na localidade xermana de Augsburgo unha competición de carácter internacional na que se deu cita a elite do slálom mundial, pois é puntuable para o ranking do mundo de slálom e serviu, ademais, a modo de adestramento, pois os mundiais terán lugar nesta mesma canle a finais de xullo. A selección española acudiu ao completo. 

 Nela estiveron os teixugos Luís Fernández en C1 e Manu Ochoa en K1 e Slálom extremo, como parte desa selección española. 

Luís en C1 tivo unha participación con moi pouca fortuna, pois nos dous intentos de entrar en semifinais, tivo unha penalización de 50 segundos que o deixaron fóra, rematando a competición en cuadraxésimo noveno lugar. 

Sorte parecida correu Manuel en K1, no seu primeiro intento unha penalización de 50 segundos deixárono lonxe de semifinais, na segunda tentativa fixo unha baixada sen fallos, pero demasiado lenta para acadar unha das dez prazas en xogo. Rematou en cuadraxésimo quinto lugar. 

Manuel participou ademais na nova modalidade de slálom extremo. Nas contra reloxos fixo o quinto mellor tempo conseguindo pasar sen problema o filtro para as clasificatorias, pero non tivo tanta sorte na seguinte ronda, quedando fóra de semifinais. Rematou décimo oitavo. 

 Máis sorte tivo a outra galega presente no evento, Ainhoa Lameiro, do Piragüismo Penedo de Tui, conseguiu meterse nas finais de C1, e a piques estivo de subir ao podio ao rematar cuarta. 

2ª COPA GALEGA DE PROMOCIÓN DE SLÁLOM, A FREIXA: 29/05/2022

Este domingo celebrouse na praia da Freixa, en Ponteareas a 2ª Copa Galega de Promoción de slálom. Acudiron ao evento, organizado polo Club Tea, oitenta deportistas das categorías infantil, alevín, benxamín e pre-benxamín. Estas competicións fanse coa fin de promocionar este deporte entre os máis pequenos e consta de dúas baixadas polo circuito, téndose en conta a mellor de cada para a clasificación final. 

 O Club Deportivo Miño-Teixugos acudiu cun total de 12 piragüistas. 

En K1 muller benxamín Rita Oliveira foi terceira, levándose unha medalla de bronce. En K1 muller alevín Nerea Álvarez conseguiu a prata e Leila Álvarez foi quinta. En K1 home pre-benxamín Roque Oliveira foi segundo e Nicolás Piñeiro terceiro, prata e bronce respectivamente. En K1 home benxamín Lois Montenegro foi cuarto, Tiago Rey quinto e Martín Vicente, décimo. En K1 home alevín Iván Cruz foi octavo, Leo Álvarez noveno e Alejandro Barreiro undécimo. En K1 home infantil Pedro Lomba foi sexto. 

Na clasificación final por equipos o gañador foi o Tea de Mondariz, seguido do Quixós de Monforte e en terceiro lugar subiu ao podio o Deportivo Miño-Teixugos. 

 Bo balance para os teixugos co terceiro lugar por equipos e catro medallas, aínda que o que máis importa nestas competicións é o fomento do deporte e a convivencia entre os máis novos.

CAMPIONATO DE EUROPA, LIPTOVSKY MIKULAS(ESLOVAQUIA): 26 A 29/05/2022

Do 26 ao 29 de maio celebrouse en Liptovsky Mikulas (Eslovaquia) o Campionato de Europa de Slálom. España acudiu co seu equipo nacional, do que por primeira vez na historia formaron parte tres galegos, os teixugos Luís Fernández e Manuel Ochoa, e Ainhoa Lameiro do Piragüismo Penedo. 

Os trazados deste campionato foron longos e complicados, ningún dos participantes baixou do minuto e medio, o vento case permanente tampouco axudou, e moitas das grandes figuras do slálom quedaron fóra de semifinais e finais. 

Luís Fernández comezou a súa participación na mañá do venres buscando unha das vinte prazas para semifinais, no primeiro intento fixo unha boa baixada pero tres toques que lle penalizaron seis segundos, deixárono fóra. Na respesca mellorou a baixada anterior, pero non foi suficiente para entrar nas semifinais. Rematou o europeo en vixésimo quinto lugar. No mesmo venres pola tarde, xunto con Miquel Travé e Ander Elosegui, participou na modalidade por equipos de C1, onde fixeron o terceiro mellor percorrido que os levou ao podio onde se colgaron a medalla de bronce. 

Manuel Ochoa comezou a súa primeira competición internacional co equipo sénior K1 na mañá do xoves intentando acadar unha praza nas semifinais. No primeiro intento tivo varios fallos que o deixaron lonxe dos postos de clasificación, non así na repesca, que, cunha boa baixada, conseguiu facerse cunha praza. Nas semifinais celebradas o sábado, Manuel saíu a por todas, pero na porta dúas fóiselle a embarcación e tivo que remontar perdendo varios segundos que o deixaron fóra da final, rematando este europeo no vixésimo sétimo lugar. Pola tarde participou na modalidade de equipos ou patrullas, na que baixou o circuíto cos outros dous integrantes do equipo de K1, Joan Crespo e Miquel Travé. Fixeron unha boa baixada, en 101,16 segundos, pero tres toques nas portas relegáronos ao sétimo lugar, lonxe do podio. 

 Manuel Ochoa tamén formou parte do equipo da nova modalidade olímpica de caiac extremo. Comezou a súa competición na tarde do sábado cunha contra reloxo na que entraban os dezaseis mellores tempos. Fixo unha baixada rápida, sen arriscar para evitar penalizacións, que nesta modalidade te deixan fóra automaticamente, rematando décimo cuarto e meténdose en cuartos de final. En cuartos de final, nunha brillante actuación, deixou atrás aos seus contrincantes, meténdose en semifinais, onde xa non tivo tanta sorte, e quedou fóra de finais. Rematou o evento en octavo lugar. 

Destacar tamén a actuación de Ainhoa Lameiro, do Piragüismo Penedo de Tui, que chegou a finais en C1 feminino, onde fixo unha impresionante baixada, rematando sétima no europeo. 

A vindeira semana, Luís e Manu, xunto ao resto do equipo nacional participarán na “2022 ICF Canoe Slálom Ranking Race” a celebrar sábado e domingo na cidade alemá de Augsburgo, unha competición internacional aberta puntuable para o ranking mundial de slálom.

SELECTIVOS NACIONAIS/COPA PIRINEUS: 01/04/2022 a 08/05/2022

 

Do 30 de abril ao 8 de maio celebráronse os selectivos de slálom para determinar os integrantes dos equipos nacionais sénior, sub-23 e júnior. Este ano a Federación Española de Piragüismo decidiu aproveitar a Pyrenees International Cup ou Copa Pirineus para facer os selectivos. 

A copa Pirineus é unha competición internacional oficiosa, pero puntuable para o ranking mundial de slálom, que se celebra entre dúas sedes: o Parc Olímpic del Segre na Seu d'Urgell (España) o sábado 30 de abril e domingo 1 de maio, e o Parc Aquasports en Pau (Francia) o 8 e 9 de maio. 

Aínda que a participación nesta competición é libre e aberta, só uns poucos padexeiros, previamente seleccionados nas dúas Copas de España, entraban dentro dos selectivos nacionais. O Club Deportivo Miño logrou meter a tres dos seus deportistas: Alba Soutelo que loitaba por unha praza en C1 júnior, Luís Fernández que buscaba praza en C1 sénior e Manuel Ochoa en K1 sénior. Para os selectivos nacionais tivéronse en conta a suma de catro resultados: as clasificatorias do sábado e o resultado final do domingo na Seu, e as clasificatorias do sábado e o resultado final en Pau, eliminándose o peor dos resultados de cada atleta e sumándose os outros tres. 

Manuel Ochoa tivo unha participación brillante. Buscaba unha das dúas prazas en K1 home, pois a terceira xa estaba concedida, por resultados, a Joan Crespo. Nas clasificatorias do sábado en Seu rematou segundo, no domingo a piques estivo de quedar fóra das finais por unha penalización, pero unha reclamación interposta polo técnico da Federación Galega, Manuel Freiría, metérono no último momento na final, onde nunha baixada rapidísima se puxo por diante de todos. En Pau nas clasificatorias foi oitavo na xeral, pero primeiro dos españois, e o domingo entrou nas finais e rematou en sétimo posto e primeiro dos españois. Sumados os puntos dos catro días, Manuel conseguiu a praza para o equipo nacional coa mellor puntuación de tódolos aspirantes. Esta é a primeira vez que un galego consigue entra a formar parte do equipo nacional na modalidade de K1.

 Luís Fernández optaba a unha das tres prazas en C1 sénior. Na Seu D´Urgell rematou as clasificatorias quinto, cuarto dos españois; e o domingo nas finais foi cuarto, terceiro español. Na seguinte ronda, en Pau, Luís estivo impresionante. Nas clasificatorias do sábado foi o mellor español, rematando terceiro; e, no domingo, tamén foi o primeiro dos españois cun quinto lugar. Unha vez eliminado o seu peor resultado, a suma final méteno no equipo nacional, tamén coa mellor puntuación. 

Alba Soutelo, buscaba praza no equipo júnior en C1. Na Seu acadou un oitavo posto o sábado, o domingo, nas finais foi décima. En Pau, nas clasificatorias foi décimo oitava e no domingo non acadou finais, rematando décimo quinta. Con estes resultados nos que tamén entraban as participantes sénior e sub-23, Alba non acadou posto no equipo nacional, pero por moi pouco, xa que buscaba unha praza júnior.

O podio da Copa Pirineus é resultado da suma dos postos finais obtidos en Seu e en Pau, entrando só os deportistas participantes nas dúas competicións. Manuel Ochoa foi o gañador desta edición en K1 home e Luís foi bronce en C1. 

Destacar que estes selectivos nacionais de slálom son históricos para o piragüismo galego, pois ademais de Manu e Luís, Ainhoa Lameiro, a canoísta do Piragüismo Penedo de Tui, acadou posto no equipo nacional C1 sénior e C1 sub-23, e tamén coa mellor puntuación. O seu compañeiro de equipo, Daniel Pérez entrou en C1 sub-23 e a piques estivo de facelo en sénior.Tamén participaron Mario Otero do Tea Mondariz que buscaba un posto en K1 sub-23 e Borja González en C1 sub-23, quedando fóra por moi pouco.

COPA SEGRE, LA SEU D´URGELL, PONTS: 15-16/04/2022

A Segre Cup é unha competición internacional de piragüismo Slalom que se celebra entre dúas sedes: o venres no Parc Olímpic del Segre na Seu d'Urgell, e o sábado Parc de la Roca del Call en Ponts. Os dous en España. Dous días de competición en dúas sedes diferentes. O formato da competición é unha carreira para todos e unha carreira final para os 10 deportistas mellor clasificados nas eliminatorias en cada sede. Para os resultados finais súmanse os postos obtidos en cada serie, o que menos puntos obteña resulta gañador ou gañadora. O grupo de idade é Junior e Senior. 

Nesta edición acudiron catro integrantes do Deportivo Miño, que xunto con outros deportistas galegos, marcaron unha copa Segre de éxitos para Galicia. 

Manu Ochoa entrou nas finais tanto o venres como o sábado. O venres rematou segundo e o sábado terceiro, e cun total de cinco puntos proclamouse vencedor da categoría absoluta masculina en K1, seguido polo francés Romain Bruneau con seis puntos e o castelán leonés Darío Cuesta con nove. 

Sergio Rodríguez, en K1 júnior, tamén acadou finais nos dous días, o venres foi terceiro e o sábado sexto, e cun total de nove puntos subiu ao podio a recoller un bronce, por detrás dos catalás Manel Contreras e Mbelú Ikenna. 

Alba Soutelo deportista especializada en canoa, participou tanto en K1 como en C1 júnior. En K1, a pesares de non ser a súa especialidade, rematou décimo cuarta, mentres que na canoa, entrou nas finais nos dous días, rematando sétima. 

Ainhoa Barreiro en k1 júnior, non foi quen de entrar nas finais, rematando décimo sexta. 

Destacar o gran papel feito polos galegos nesta competición de gran sona, pero fóra da Liga oficial. Ademais das medallas de Manu e Sergio, Daniel Pérez do Penedo acadou prata en C1 sénior e Axel Alfonso do Tea de Mondariz rozou o podio coa súa boa actuación, rematando quinto en K1 sénior.

COPA DE ESPAÑA DE SLÁLOM EXTREMO, LA SEU D´URGELL: 9-10/04/2022

Esta fin de semana celebrouse por primeira vez unha Copa de España de Slálom Extremo. Esta nova e espectacular modalidade de slálom será disciplina olímpica por primeira vez en Paris 2024. Os circuítos de extremo son máis curtos e rápidos que os de slálom normal, os percorridos só se fan en caiac e a saída é dende unha rampla elevada que engade espectacularidade, as portas son menos e cunha zona na que os deportistas deben facer un esquimotaxe. As probas comezan cunha contra reloxo, na que os 16 máis rápidos pasan a cuartos de final. Despois seguen baixadas de catro en catro deportistas nas que dous pasan a seguinte ronda, semifinais, e, finalmente, os catro mellores disputan a final. 

O Club Deportivo Miño-Teixugos acudiu ao evento con seis piragüistas e remataron a Copa cuns grandes resultados. 

Manuel Ochoa, en categoría home sénior, fixo unha competición espectacular, tanto sábado como domingo rematou a contra reloxo co segundo mellor tempo, dominando as carreiras de cuartos e semifinais, nos dous días acadou a final. O sábado rematou terceiro e o domingo segundo. Na mesma categoría, Luís Fernández, tamén superou a contra reloxo nos dous días. O sábado chegou as semifinais e o domingo quedou en cuartos. 

Sergio Rodríguez, en categoría home júnior, tamén salvou a contra reloxo nas dúas xornadas. O sábado gañou cuartos e semifinais, e nunha gran final foi quen de entran na meta en segundo lugar, conseguindo a segunda medalla da xornada para os Teixugos. O domingo deu chegado a semifinais, pero unha penalización deixouno fóra de finais. Na mesma categoría, Adrián LLuch non conseguiu superar a contra reloxo en ningunha das dúas competicións. 

Alba Soutelo, en categoría muller júnior, pasou as contra reloxos os dous días, o sábado conseguiu chegar a semifinais, mentres que o domingo quedou en cuartos. Na mesma categoría, Ainhoa Barreiro, o sábado superou a contra reloxo pero non os cuartos de final, o domingo quedou na proba contra reloxo, quedando décimo sétima a un posto de cuartos. 

Non puido ser mellor a estrea para o Deportivo Miño-Teixugos nesta nova modalidade, superando nove de doce contra reloxos e coas medallas de prata e bronce de Manu e a prata de Sergio, os tres únicos podios acadados por galegos. Na clasificación por equipos o Deportivo Miño foi quinto.

Fotos de Norbert Aguilera