V COPA GALEGA DE PROMOCIÓN DE SLÁLOM, MONFORTE: 22/07/2023

Nova cita dos máis pequenos co slálom. Nesta ocasión nas augas do río Cabe, en pleno núcleo urbano de Monforte de Lemos, onde se celebrou a quinta competición da Liga Galega de Promoción de Slálom. 

O Club Deportivo Miño-Teixugos acudiu ao evento con once deportistas que o deron todo para superarse a si mesmos. 

 

En k1 alevín muller, o podio foi totalmente “teixugo”. Leila Álvarez acadou o ouro, a prata foi para Nerea Álvarez e o bronce para Rita Olveira. Nerea Álvarez, ademais, acadou un ouro ao participar na modalidade de canoa. 

 

En k1 infantil muller, Francia Piñeiro estreouse na competición, acadando o oitavo lugar. 

En K1 infantil home, Iván Cruz foi sétimo e Brais Cambra noveno. 

En K1 alevín home, Alejandro Barreiro foi cuarto, a décimas de segundo de subir ao podio, e Leo Álvarez décimo segundo. 

En k1 home benxamín, Roque Olveira foi segundo, acadando, por tanto, a prata; Nicolás Piñeiro tamén subiu ao podio co terceiro mellor tempo e Martín Vicente foi cuarto.

 

 Moi bos resultados para os pequenos “teixugos” con seis medallas e un día de diversión, no que ademais de practicar deporte e superarse a si mesmo, coñeceron Monforte e reforzaron lazos e amizades con nenas e nenos de toda Galicia. 

Na clasificación final por equipos o Deportivo Miño rematou terceiro, por detrás do Tea de Mondariz e do equipo local, o Montaña-Quixós. 

 

XOGOS EUROPEOS, CRACOVIA: 29/06/2023 a 2/07/2023

 Os Xogos Europeos 2023 é a terceira edición dunha especie de pre-olimpíada que se celebra cada catro anos. Nesta ocasión a sede elixida foi Cracovia, onde, entre o 21 de xuño e o 2 de xullo se deron cita uns 7000 deportistas de 48 países. O piragüismo de slálom, ao ser modalidade olímpica, tamén estivo presente, concretamente do 29 de xuño ao 2 de xullo celebráronse as distintas competicións. 

Entre os 12 representantes do equipo nacional atopábase o deportista do Club Deportivo Miño-Os Teixugos Luís Fernández Pereira. 

O deportista de Salceda pertencente ao Deportivo Miño comezou a súa participación o venres 1, buscando unha praza en semifinais de canoa masculino. No primeiro intento Luís fixo unha baixada algo lenta e con toques que o deixaron lonxe de postos de semifinais. Na segunda tentativa mellorou moito o tempo, e aínda que estaba dentro dos mellores, oito segundos de penalización por toques deixárono fóra, a apenas tres postos de conseguilo. Na clasificación final rematou trixésimo terceiro, un posto lonxe das súas aspiracións, pero o slálom é un deporte no que o máis mínimo erro se paga caro. 

Outros dous representantes galegos, do Club Penedo de Tui, estiveron tamén no evento, os dous na modalidade de C1. Ainhoa Lameiro que rematou tamén trixésimo terceira e Daniel Pérez que conseguiu un posto nas semifinais e rematou vixésimo sexto. 

 

ICF RANKING E OPEN DE KAYAK CROSS, EPINAL, FRANCIA: 24 e 25/06/2023

 Na canle de Epinal en Francia celebrouse esta semana unha ICF Ranking a que acudiu Manuel Ochoa do Club deportivo Miño. As ICF Ranking son probas internacionais puntuables para o ranking oficial, pero de participación libre. Esta proba contou coa participación de cento trinta deportistas de doce países diferentes. 

Na proba de slálom, modalidade K1, a máis numerosa con máis de 50 participantes, o tomiñés conseguiu meterse en semifinais sen demasiado problema, aínda que con unha baixada lenta. No domingo superou as semifinais co oitavo mellor tempo, e, xa nas finais, fixo unha baixada espectacular e rapidísima, pero na penúltima porta os xuíces determinaron que non a pasara correctamente e penalizárono con 50 segundos, rematando a proba en undécima posición. 

Na mesma canle, o sábado pola tarde, celebrouse un Open de kayak cross. Nos “time trials” ou contra reloxo Manu Ochoa logrou o mellor tempo de tódolos participantes. Superou sen problemas cuartos de final e semifinais, e, na final, rematou terceiro, por detrás do neocelandés Finn Butcher e do francés Paul Aubertin.

 Esta semana teremos a outro teixugo en probas internacionais. Luís Fernández participará nos xogos europeos que se celebran en Cracovia, Polonia. 

 

3ª COPA GALEGA DE SLÁLOM, OURENSE: 18/06/2023

 

    Esta fin de semana volveu o slálom a Ourense. Xa facía anos que non se vía unha competición de slálom nesta cidade, lonxe quedan aqueles anos en que Velle chegou a acoller ata Copas de España de Promoción. Nesta ocasión a cita coas augas bravas foi na acea de Oira, onde se disputaron a 2ª Copa Galega de Promoción e a 3ª Copa Galega de Slálom, con estas competicións Ourense busca postularse como futura sede dunha canle de augas bravas. 

     A participación foi baixa, o que demostra que o slálom necesita máis campañas institucionais de difusión e promoción. Nunca Galicia tivo tantos deportistas en alto nivel, sen embargo non se ve un relevo xeracional. O Club Deportivo Miño-Teixugos non participou en Promoción ao non ter deportistas da categoría. 

     Na 3ª Copa Galega de Slálom, tres foron os deportistas que acudiron e os seus resultados non puideron ser mellores. Emilio Rodríguez acadou a medalla de ouro na categoría K1 veterano, Brais Castro foi prata en C1 sénior e Laura Alonso conseguiu a medalla de ouro en K1 sénior. 

    Na clasificación final por clubs, o Deportivo Miño-Teixugos, rematou quinto, pese aos bos resultados, pola falta de deportistas que puntúen. Dende o club fan un chamamento a todos aqueles que queiran probar este deporte que non dubiden en poñerse en contacto e anotarse, fan fincapé, tamén, no feito de que este é un deporte moi seguro, que se practica baixo normas estritas de seguridade.

COPA DO MUNDO, PRAGA: 8 a11/06/2023

 

 Do 8 ao 11 de xuño celebrouse na cidade de Praga a segunda Copa do Mundo de Slálom onde se deron cita os mellores deportistas do mundo desta modalidade. A este evento acudiu o primeiro equipo nacional de slálom do que forma parte Luís Fernández. 

O deportista de Salceda, membro do Club Deportivo Miño-Teixugos, despois de superar os durísimos selectivos nacionais, estreouse no circuíto internacional. Xunto co catalá Miquel Travé e o tamén galego Daniel Pérez formou o equipo español de canoa ou C1. 

O venres comezaron as clasificatorias, buscando estar entre os trinta mellores para acadar un lugar nas semifinais. No primeiro intento dous toques deixaron fóra a Luís, a pesares de facer boa baixada; na segunda tentativa non houbo fallos, e, cunha boa carreira acadou a súa praza nas semifinais. 

O sábado disputáronse as semifinais. Luís comezou moi ben a súa baixada, levando tempo de final no primeiro tramo, pero segundo tramo, unha serie de fallos e penalizacións, deixárono lonxe dos postos da final. Rematou esta primeira competición internacional no vixésimo oitavo lugar. 

A súa vindeira cita internacional será no Campionato de Europa a celebrar en Cracovia en dúas semanas. 

 Outros dous galegos acompañaron a Luís a esta Copa do Mundo, os dous do Piragüismo Penedo de Tui. Daniel Pérez en C1 rematou trixésimo quinto e Ainhoa Lameiro tamén en C1 rematou trixésimo sexta.

COPA DO MUNDO, AUGSBURG: 1a 4/06/2023

Do 1 ao 4 de xuño celebrouse la cidade alemá de Augsburg a primeira das copas do mundo de slálom. A Federación Española de Piragüismo enviou ao segundo equipo nacional a disputar as probas. Entre os seus integrantes estaba o tomiñés Manuel Ochoa do Club Deportivo Miño-Teixugos. 

 O día 1 celebráronse as clasificatorias da modalidade de k1 slálom, no seu primeiro intento Manuel fixo unha mala baixada e non deu entrado en semifinais. Tampouco o conseguiu no segundo intento, onde unha penalización de dous segundos por un toque, o deixou fóra. Rematou cuadraxésimo noveno. 

No domingo catro celebrouse a competición de kayak-cross ou slálom extremo, modalidade na que Manu se atopa entre os dez mellores do mundo. Superou sen problemas a contra reloxo. Nas clasificatorias, onde de catro pasan os dous primeiros de cada serie, tíñaa xa practicamente superada, e, a piques de cruzar a meta, envorcou e quedou fóra. Rematou a proba nun máis que meritorio décimo noveno lugar. 

Non foron os resultados esperados polo teixugo, que tiña grandes esperanzas de facer algún podio. Con esta proba Manu xa queda fóra do circuíto oficial internacional, aínda que non descarta acudir a competicións oficiosas pero puntuables para o ranking mundial. 

Outro teixugo, Luis Fernández, acudirá co primeiro equipo nacional a segunda copa do mundo a celebrar en Praga do 4 ao 11 de xuño.

3ª COPA DE ESPAÑA DE SLÁLOM-2ª COPA DE KAYAK CROSS, PAU: 29/4/2023 A 1/5/2023

 A canle de augas bravas da localidade francesa de Pau acolleu esta fin de semana a 3ª Copa de España de Slálom e a 2ª Copa de Kayak Cross. Competicións de gran importancia pois ao longo dos tres días os resultados puntuaban para os selectivos do equipo nacional tanto de slálom como de kaiac cross. Os mellores deportistas españois da modalidade acudiron a cita pola súa gran transcendencia.

 O Club Deportivo Miño-Teixugos acudiu con catro piragüistas que remataron cun balance de catro medallas e dous postos na selección española. 

 Luís Fernández, en C1 sénior, fixo unha soberbia competición. Tanto sábado como domingo fixo unhas baixadas rápidas e sen fallos, que lle valeron a medalla de prata na competición do sábado e o ouro no domingo. Dados os seus grandes resultados na segunda e terceiras copas de España, Luís, a falta de confirmación oficial, formará parte do equipo nacional de slálom na modalidade de canoa.  

Manuel Ochoa, en K1 sénior, non tivo os mellores selectivos este ano. A sorte e as decisións arbitrais parecen non querer acompañar ao teixugo. Tanto na primeira como na segunda competición pasou a finais, e, xa nelas non deu acadado o podio, rematando quinto nos dous días. Nos selectivos, a falta de confirmación oficial, logrou praza no segundo equipo nacional de K1. 

 Emilio Rodríguez, en K1 veterano, tivo unha gran actuación alzándose co ouro nos dous días. 

 Alba Soutelo, en C1 sénior, categoría na que se estrea este ano, fixo dúas boas baixadas pero non deu accedido a finais, rematando duodécima nos dous días. 

 Gran balance para os Teixugos con tres medallas de ouro, unha de prata nesta terceira Copa de España de Slálom. 

 O luns disputouse a 2ª Copa de España de kayak cross. Esta especialidade está collendo cada vez máis relevancia pola súa espectacularidade e polo feito de estrearse como modalidade olímpica en Paris 2024. 

Do Club Deportivo Miño-Teixugos participaron Alba, Manu e Luís. 

 Alba Soutelo fixo un gran papel, superando a contra reloxo e cuartos de final. Rematando nun impresionante quinto lugar. 

Luís Fernández despois de supera a contra reloxo caeu en cuartos de final e acabou noveno.

 Manuel Ochoa fixo o terceiro mellor tempo da contra reloxo, gañou a súa serie de cuartos, pero caeu en semifinais, rematando sétimo. Queda pendente de confirmar se obtivo praza no equipo nacional desta modalidade. 

 Cabe destacar a gran progresión dos deportistas galegos desta modalidade. Resaltar as actuacións de Ainhoa Lameiro e Daniel Pérez do Piragüismo Penedo que acadaron medallas e un posto na selección nacional de C1 e Axel Afonso do Tea de Mondariz que acadou a medalla de bronce na modalidade de K1.