BOS RESULTADOS DOS TEIXUGOS CUNHA MEDALLA DE BRONCE NA 1ª COPA DE ESPAÑA DE PROMOCIÓN DE SLÁLOM

     Esta fin de semana celebrouse no Couquiño, en Dumbría, a 1ª Copa de España de Promoción de Slálom, dando comezo as probas da Liga Española de Promoción, na que participan deportistas de toda España das categorías cadete e Infantil. Houbo récord de participación con máis de 200 deportistas de vinte clubs de todo o país. O sábado foron as clasificatorias, os dez mellores de cada categoría pasaron á final A, e o resto á final de consolación, finais que tiveron lugar o domingo. 

    O Club Deportivo Miño-Teixugos, despois de varios anos sen participar por falta de deportistas da categoría, acudiu con sete piragüistas que o deron todo nas augas do río Xallas. 

 

    A mellor actuación foi a de Leila Álvarez que en K1 Infantil , que disputou a final A e rematou terceira acadando a medalla de bronce. Nesa mesma final tamén estiveron Nerea Álvarez que rematou en quinto lugar e as irmás Catalina e Beatriz Sánchez que remataron sétima e oitava, respectivamente.  

    

    En C1 Infantil B, Nerea Álvarez, tamén fixo final A, rematando cuarta. 

    En K1 Home Infantil B, Alejandro Barreiro e Leo Álvarez foron undécimo e décimo cuarto, respectivamente, na final de consolación. Finalmente, Brais Álvarez foi décimo noveno na final B de K1 cadete.     

     A clasificación final por clubs estivo encabezada coma sempre polos equipos vascos e catalás, o Deportivo Miño-Teixugos rematou oitavo. 

 

BO PAPEL DO TEIXUGO MANU OCHOA NO EUROPEO DE CAIAC CROSS

     A tempada internacional de slálom deu comezo esta semana na cidade de Tacen, Eslovenia, co Campionato de Europa de Slálom. Manuel Ochoa, do Club Deportivo Miño-Teixugos, foi convocado como integrante do equipo español de caiac cross. Esta nova modalidade do slálom, que se estrea como olímpica en París este verán, esperta cada vez máis interese tanto entre os deportistas como nos afeccionados.

    O mércores disputáronse as probas contra reloxo para intentar estar entre os dezaseis mellores tempos que pasaban a cuartos de final. Manu fixo unha gran baixada que lle valeu o noveno lugar e o pase a cuartos de final. En cuartos, nos que se enfrontan de catro en catro, Manu tivo un bo comezo pero un erro nunha das portas deixouno fóra das semifinais. 

 

    A seguinte cita internacional será dentro de dúas semanas en Augsburg, Alemaña, onde se celebrará a 1ª Copa do Mundo de Slálom. Nela o Club Deportivo Miño terá dous representantes na selección española, Luís Fernández en canoa e Manu Ochoa en caiac. 

Foto de Marc Etxaniz Pal

 

O CLUB DEPORTIVO MIÑO-TEIXUGOS GAÑADOR DA COPA DAVID CASTRO( 2ª COPA GALEGA DE PROMOCIÓN DE SLÁLOM) EN COVAS

 

As augas do río Coura ao seu paso pola localidade cerveirense de Covas acolleron esta fin de semana dúas competicións da Liga Galega de Slálom. O sábado disputouse a Copa David Castro, a 2ª Copa Galega de Promoción de Slálom, que comprende as categorías benxamín, alevín e infantil. O domingo só as categorías cadete e infantil competiron no Campionato Galego de Novas Promesas.Ámbalas dúas organizadas polo Club Deportivo Miño-Teixugos, que escolleron o magnífico campo de slálom de Azenha de Pagade no veciño Portugal para os dous eventos.  

Na mañá do sábado quince pequenos deportistas do Club Deportivo Miño-Teixugos participaron na Copa David Castro, equivalente a segunda das competicións da Copa Galega de Promoción de Slálom. Nestas categorías o resultado non é o que máis importa, os pequenos deportistas supéranse a si mesmos na loita contra o río e melloran a súa técnica. 

Seis foron as medallas que acadaron os pequenos teixugos e teixugas. Roque Olveira foi ouro en k1 benxamín, na mesma categoría Nicolás Piñeiro acadou o bronce. Lois Montenegro e Rita Olveira conseguiron a prata en K1 alevín masculino e feminino. Outra medalla de bronce máis para Leila Álvarez en K1 infantil e unha de ouro para a máis nova de toda a competición, Iria Álvarez, que a acadou en K1 pre-benxamín. 

Nerea Álvarez quedou cuarta en C1 infantil, sendo a única que dobrou a súa participación. En K1 infantil Alejandro Barreiro foi cuarto, Xurxo Rodríguez sexto e Leo Álvarez sétimo. En K1 Infantil feminino Nerea Álvarez foi quinta, Catalina Sánchez 7 e Beatriz Sánchez oitava. Martín Vicente rematou sétimo en K1 alevín. En K1 benxamín, Brais Vicente conseguiu o quinto lugar e Aarón da Cruz o sétimo. 

Na puntuación final por equipos o Club Deportivo Miño-Teixugos foi declarado gañador con un total de 223 puntos, seguido do Montaña Quixós de Lugo con 192 e o Piragüismo Dumbría con 96. 

O domingo, tamén no campo de slálom de Covas, tivo lugar o Campionato Galego de Novas promesas, que solo contou coa participación de dúas “teixugas” que deixaron o pavillón ben alto. Leila Álvarez acadou a medalla de bronce e Nerea Álvarez foi cuarta na categoría infantil. 

 

O CLUB DEPORTIVO MIÑO-TEIXUGOS GAÑADOR DA 1ª COPA GALEGA DE PROMOCIÓN DE SLÁLOM

Primeira cita do 2024 para os deportistas máis novos do slálom galego este domingo nas augas do río Tea, no lugar de Cordeiro. Nenas e nenos das categorías infantil, alevín, benxamín e pre-benxamín disputaron no campo de slálom de Cordeiro a primeira das competicións da Liga Galega de Promoción de Slálom. 

O Club Deportivo Miño acudiu cun grupo de dezaseis pequenos padexeiros. A pesares de ser un campo cunha certa dificultade, todos se animaron a participar.

 Iria Álvarez en pre-benxamín foi quen de baixar sen “nadar”, e rematou segunda. 

Nerea Álvarez, a nosa única canoísta, foi cuarta en C1 muller infantil. 

Na categoría infantil feminina, pero de caiac(K1), Nerea rematou tamén cuarta, Catalina Sánchez foi sexta, Beatriz Sánchez sétima e Leila Álvarez rematou terceira, acadando, por tanto a medalla de bronce. 

En K1 muller alevín, Rita Olveira conseguiu a medalla de prata ao rematar segunda. 

En K1 home infantil, Xián Pérez rematou décimo, Xurxo Río noveno, Leo Álvarez sétimo, Alejandro Barreiro sexto e Iván Cruz foi terceiro, recollendo por tanto o bronce da categoría. 

En K1 home alevín, Martín Vicente foi sétimo e Lois Montenegro conseguiu a medalla de prata ao rematar segundo. 

En K1 home benxamín, Brais Vicente foi sétimo, Nicolás Piñeiro terceiro e Roque Olveira primeiro, ouro e bronce da categoría para os teixugos. 

Por equipos, o Club Deportivo Miño-Teixugos proclamouse gañador desta 1ª Copa Galega de Promoción de Slálom, cun total de 252 puntos, seguido do Montaña Quixós de Monforte con 214 e o Club Piraguismo Penedo-Teimporta de Tui con 113. 

Podedes ver máis fotos do evento pulsando na imaxe.

 

OS TEIXUGOS LUÍS FERNÁNDEZ E MANU OCHOA NO EQUIPO NACIONAL B

     De venres a sábado celebrouse na canle francesa de Pau, aproveitando a 3ª Copa de España de Slálom e 2ª Copa de Caiac Cross, a 2ª semana de probas selectivas tanto para os xogos olímpicos como para os equipos nacionais. 

 

     Nesta ocasión os dous únicos representantes do Club Deportivo Miño-Teixugos foron Luís Fernández en canoa e Manuel Ochoa en caiac. Ámbolos dous coa mente posta máis nos selectivos que na propia Copa. 

    O salcedán Luís Fernández, en C1, viña cunha puntuación moi baixa dos selectivos da semana anterior, que o deixaron fóra da carreira olímpica, pero conservando posibilidades para o equipo nacional. O venres, na primeira competición, foi terceiro en semifinais e en finais, conseguindo a medalla de bronce. O sábado rematou segundo en semifinais, e nas finais foi quinto. Na suma final de puntos do proceso selectivo, e a falta de confirmación oficial, Luís quedaría fóra do equipo principal pola mínima, entrando no equipo B, co que acudirá as Copas do Mundo de Ivrea e Augsburg. 

 

 O Tomiñés Manu Ochoa, en K1, partía con mellor puntuación da primeira fase de selectivos, e aínda contaba incluso con opcións á praza olímpica. O venres rematou as semifinais cuarto e renunciou a facer as finais, ao non ser selectivas, para conservar forzas para o día seguinte. O sábado foi cuarto en semifinais, e nas finais fixo unha impresionante baixada, co mellor tempo, pero un toque na última porta, deixárono fóra do podio e do equipo nacional A. Ao igual que Luís, si estará no equipo nacional B. 

    O domingo celebrouse a 2ª Copa de España de Caiac Cross, que tamén eran selectivas da modalidade, con dúas probas contra reloxo, nelas Manuel rematou segundo e terceiro. Superou a ronda de semifinais, e nas finais rematou segundo, conseguindo a medalla de prata. 

 

Duras probas selectivas, cun nivel que xa levábamos anos sen ver, a diferencia dun posto a outro mediuse en segundos e incluso en décimas de segundo. Tanto Manuel como Luís loitaron man a man cos mellores do país, e souberon estar a altura, quedando os dous fóra do equipo principal pola mínima, a apenas a un punto de logralo.. Na mesma situación se atopa a canoísta Ainhoa Lameiro do piragüismo Penedo de Tui, terceira integrante galega do segundo equipo.

GRANDES RESULTADOS PARA OS TEIXUGOS NA 2ª COPA DE ESPAÑA DE SLÁLOM

 O venres 29 e o sábado 30 celebrouse na canle de slálom da Seu D´Urgell a 2ª Copa de España de Slálom, competición de gran importancia pois forma parte dos selectivos para o equipo nacional e olímpico. As Copas de España son en realidade dous días con dúas competicións diferentes, cos seus podios e medallas. Semifinais e finais de venres e sábado puntuaban para formar parte do equipo nacional. 

 

O Club Deportivo Miño-Teixugos acudiu con cinco deportistas, entre eles Luís Fernández e Manuel Ochoa con moitas posibilidades de superar os selectivos. Dado o nivel da competición podemos consideran que tiveron unha gran actuación ao acadar dúas medallas de bronce e unha de prata.

O tomiñés Manu Ochoa tivo unha boa actuación na súa axustadísima modalidade de K1 sénior. Rematou terceiro na semifinais do venres, e xa na final obtivo un cuarto posto. O sábado pasou a finais co cuarto mellor tempo, e na final foi terceiro, conseguindo o bronce. 

 

O salcedán Luís Fernández, en C1 sénior, pasou comodamente a finais o venres coa terceira mellor baixada, e na final, aínda que fixo un gran descenso, co segundo mellor tempo, catro segundos de penalización por dous toques deixárono en quinto lugar. Menos sorte tivo o sábado, cando fixo unha baixada perfecta e na penúltima porta, a criterio do equipo arbitral, consideraron que non a pasara correctamente e penalizárono con cincuenta segundos, rematando undécimo. 

 

Nesta mesma categoría, Brais Castro, quedou fóra de finais no venres, rematando duodécimo. O sábado, cunha gran baixada, conseguiu meterse na final, rematando en noveno lugar. 

 

Emilio Rodríguez en K1 veterano, subiu ao podio nos dous días, o venres acadou medalla de bronce e o sábado a de prata. 

 

Laura Alonso, en K1 sénior, o venres quedou fora de semifinais rematando décimo quinta e na xornada de sábado non fixo a súa baixada. 

 

Na próxima semana celebrarase a 3ª Copa de España na localidade francesa de Pau, que tamén será selectiva, e ao remate coñeceremos aos integrantes do equipo olímpico e do equipo nacional de Slálom.

MANU OCHOA GAÑADOR DA COPA PIRINEUS DE KAYAK CROSS

Manuel Ochoa e Luís Fernández,  do Club Deportivo Miño-Teixugos, estiveron participando ao longo destas últimas dúas semanas na Copa Pirineus de Slálom, unha competición internacional puntuable para o ranking mundial. Desde 2010, a Copa Internacional dos Pirineos une dúas sedes emblemáticas de Canoe-Kayak Slalom: a Seu d'Urgell en España e o Stade d'Eaux Vives de Pau en Francia. Este torneo reúnen tanto aos mellores do mundo como a mozos deportistas franceses e españois. Cada fin de semana hai unha competición diferente e ao final súmanse os puntos das dúas para determinar ós gañadores.

 Este ano participaron trescentos deportistas de vinte e tres países diferentes.

 Manu Ochoa tivo doble participación, en slálom e en Kayak Cross.Na modalidade de Kayak Cross, o domingo día 8 quedou segundo na contra reloxo e gañou tódolos enfrontamentos, excepto a final, onde rematou cuarto. En Pau marcou o mellor tempo na contra reloxo, e caeu nas semifinais, rematando quinto. A suma de puntos das dúas xornadas determinaron que foi o mellor, proclamándose gañador desta emblemática competición.

En slálom K1, Manu Ochoa, non tivo unha participación lucida. Na primeira fin de semana fixo unha clasificatoria lenta e con penalizacións quedando para a final B, onde fixo unha baixada impresionante, co mellor tempo de toda a competición, rematando undécimo. En Pau unha serie de fallos e penalizacións deixárono para a final B, onde volveu ter unha mala participación, quedando nos últimos lugares. 

Luís Fernández, en slálom C1, empezou moi ben, na primeira competición, na Seu d'Urgell, gañou as clasificatorias e pasou á final A onde rematou nun impresionante cuarto lugar. Na fin de semana seguinte, en Pau, un encadeado de fallos deixárono para a final B, e tampouco lle foron ben as cousas nela, e cunha penalización de cincuenta segundos quedou moi lonxe da cabeza. 

 

Esta competición foi un adestramento para os selectivos que terán lugar na última semana de marzo na Seu e na primeira de abril en Pau. Tanto Manu como Luís aspiran a un lugar na selección española de slálom.