1ª COPA E ESPAÑA, MONDARIZ: 20 - 21/02/2021

Esta fin de semana arrancou a Liga Española de Slálom, despois dun ano de parón por mor da COVID-19. A primeira das competicións, 1ª Copa de España de Slálom, celebrouse na localidade de Mondariz. Durante dúas xornadas, o mellor do panorama nacional nesta modalidade de piragüismo, deuse cita nas augas do río Tea. O evento estivo marcado pola adversa meteoroloxía, pola elevadísima participación, con catorce equipos e máis de 200 deportistas, e polo protocolo do coronavirus, con grandes medidas de seguridade e sen público.

 Esta copa constou de dúas competicións diferenciadas, unha sábado e outra domingo, cunha primeira baixada clasificatoria, na que os dez primeiros pasaban á final. O Club Deportivo Miño acudiu con dez deportistas, cos que deu acadado resultados históricos.

 En canoa sénior Luis Fernández foi gañador absoluto nas dúas xornadas. O deportista de Salceda, impúxose nas clasificatorias e nas respectivas finais, tanto sábado como domingo. Na mesma modalidade Alejandro Ochoa non deu conseguido entrar nas finais rematando décimo sexto nos dous días.

 En caiac sénior, o tomiñés Manuel Ochoa, conseguiu a terceira medalla de ouro para os Teixugos. Nas clasificatorias do sábado, un pequeno fallo e unha penalización de dous segundos, deixárono fóra das finais nun décimo quinto lugar. O domingo, co quinto mellor tempo, entrou en finais, e rematou gañando a proba. Na mesma proba, Alejandro Ochoa, rematou trixésimo quinto e trixésimo oitavo. 

Tamén en caiac sénior, Laura Alonso, quedou nas dúas xornadas ás portas das finais co seu duodécimo lugar. 

En categoría xuvenil feminina, Ainhoa Barreiro e Alba Soutelo tiveron unha moi boa actuación, rozando o podio en varias ocasións. Alba , en caiac, rematou sexta o sábado na final e décimo cuarta o domingo, na modalidade de canoa, rozou medalla nos dous días, rematando cuarta e quinta. Pola súa banda, Ainhoa fixo finais nos dous días en caiac, rematando cuarta e sétima, e en canoa foi décimo cuarta e novena. 

En xuvenil masculino, a modalidade de canoa non tivo participación de teixugos, e en caiac, a mellor actuación foi a de Sergio Rodríguez que entrou en finais nas dúas xornadas, rematando quinto e sexto. O seu compañeiro Alexis Segadaes fixo dúas baixadas correctas, pero non o bastante rápido para facer final, rematando décimo sexto e vixésimo. Na mesma categoría, participaron tamén, Rui Malheiro e Adrián Lluch, os máis novos dos nosos participantes, que se estrearon na Liga absoluta nacional, rematando lonxe dos postos de cabeza.

 A seguinte competición, a 2ª copa de España, terá lugar na canle da Seu D´Urgell os días 6 e 7 de marzo. 

 

1ªCOPA GALEGA, MONDARIZ: 03/01/2021

Este domingo, 3 de xaneiro, tivo lugar en Mondariz Balneario, nas augas do río Tea, a 1ª Copa Galega de Slálom, primeira cita da Liga Galega de Slálom. Organizada polo Club Tea de Mondariz, contou coa participación dos mellores deportistas galegos. 

Os Teixugos acudiron a esta madrugadora cita con dez deportistas, acadando un total de sete medallas, tres de ouro, tres de prata e unha de bronce. 

Na categoría absoluta ou sénior feminina, Ainhoa Barreiro foi a gañadora na modalidade K1 e o segundo posto ou medalla de prata foi para Alba Soutelo, as dúas cun percorrido sen penalizacións. As mesmas deportistas participaron tamén en canoa ou C1, onde Alba volveu facerse cunha nova prata, e Ainhoa foi terceira, a gañadora da categoría foi Ainhoa Lameiro do Penedo.

 En K1 masculino sénior, o teixugo Manuel Ochoa fixo o segundo mellor tempo da final, detrás de Axel Afonso, do Tea Mondariz, acadando a medalla de prata. Na mesma categoría Emilio Rodríguez rematou sétimo. 

En C1 masculino sénior, Brais Castro, acadou o quinto posto. 

Na categoría júnior os nosos padexeiros conseguiron dúas novas medallas de ouro, en C1 Samuel Castro e en K1 Sergio Rodríguez, foron os gañadores das súas respectivas probas. Na mesma categoría, en K1, Alexis Segadaes foi cuarto. 

En K1 cadete, Mateo Álvarez e Adrián Lluch, remataron sexto e sétimo, respectivamente. 

Na clasificación final por equipos, o gañador foi o Piragüismo Penedo, cun total de 256 puntos, seguido do Deportivo Miño-Teixugos con 178. 

O Slálom galego agarda polas próximas competicións, incertas pola COVID-19, e por unha canle de augas bravas que favoreza un adestramento de alto nivel.

Para ver as fotos da xornada , preme AQUÍ 

 

COPA DO MUNDO DE SLÁLOM, PAU: 6 A 8 /11/2020

 

 Do 6 ao 8 de novembro, a canle de augas vivas de Pau, en Francia, acolleu a Copa do Mundo de Slálom. A competición, organizada pola ICF (International Canoe Federation), celebrouse a porta pechada, sen público, por mor da COVID-19. Esta é a última das competicións internacionais de slálom, neste ano tan atípico. 

 

O teixugo Luís Fernández foi convocado pola Federación Española para formar parte do equipo de C1. A súa participación comezou o venres coas clasificatorias, unha percorrido rápido e ben trazado metérono de forma clara en semifinais. As semifinais tiveron lugar o domingo, onde o piragüista de Caldelas fixo unha moi boa baixada, rematando décimo, e entrando en finais. Xa nas finais, Luís foi rápido aínda que con dúas penalizacións, quedando fóra do podio, pero nun impresionante noveno posto. 

 

Outro galego, David Pérez, do Piragüismo Penedo, tamén formou parte do equipo español, rematando décimo sétimo. 

 

Os deportistas do Club Deportivo Miño-Teixugos continuarán preparando a tempada 2021, na que esperan acadar máis éxitos, pero sobre todo desfrutar deste espectacular deporte. 

 

CAMPIONATO GALEGO DE PROMOCIÓN DE SLÁLOM, MONDARIZ: 27/09/2020

A praia do Val, no concello de Mondariz, foi o escenario escollido para celebrar este domingo a última e máis importante das probas da Liga Galega de Promoción de Slálom, o Campionato Galego. Nas augas do río Tea déronse cita os máis pequenos do slálom galego, concretamente nenas e nenos das categorías benxamín, alevín e infantil. 

O Club Deportivo Miño-Teixugos acudiu ao evento con nove deportistas que competiron e gozaron das augas e a marabillosa paisaxe da praia do Val.

 En K1 Muller Benxamín Leila Álvarez foi a gañadora da proba, acadando por tanto a medalla de ouro. Na mesma categoría, a súa irmá Nerea fíxose coa prata ao rematar segunda.

 En K1 Home Benxamín, Alejandro Barreiro , conseguiu a medalla de bronce co seu terceiro posto.

 En K1 Home Alevín, Javier Lluch, cunha baixada impecable e sen penalizacións, foi terceiro, acadando, por tanto, o bronce. Na mesma categoría, Pedro Lomba rematou octavo. 

En K1 Home Infantil, a categoría máis numerosa, Adrián Lluch, rozou o podio coa súa cuarta posición, o seu compañeiro Rui Magalhaes foi quinto, Antón Fernández sétimo e Alexandre González duodécimo.

 En C1 Home Infantil, Adrián Lluch, rematou quinto. 

Catro medallas individuais e o quinto posto na clasificación por equipos, foi o balance final no Campionato Galego de Slálom para os Teixugos. Pero moito máis importante cós resultados, foi que nenos e nenas practicaron deporte con seguridade e ao aire libre e desfrutaron dunha xornada de convivencia e amizade con nenas e nenos de toda Galicia. 

 

CAMPIONATO DE EUROPA, PRAGA: 18 a 20/09/2020

O deportista de Salceda, membro do Club Deportivo Miño, Luís Fernández, foi convocado pola federación española de piragüismo para formar parte do equipo nacional de C1 que acudiu ao Campionato Europeo de Slálom celebrado na cidade de Praga. Esta é a primeira competición relevante que se celebra neste 2020, no que se cancelaron xa as Copas internacionais e as competicións restantes da Liga Española. 

Luís comezou a súa participación o venres 18, na modalidade individual. O circuíto para a proba foi considerado polos participantes como longo e duro. Na súa primeira baixada o teixugo fixo un bo tempo, pero con demasiadas penalizacións por toques nas portas, que o deixaron a un posto de entrar en semifinais. Na segunda baixada, para repesca de semifinais, tampouco Luís foi quen de facer un bo tempo, quedando definitivamente fóra das semifinais, rematando o campionato no posto vixésimo cuarto. 

O domingo, Luís participou na modalidade de equipos ou patrullas, cos outros dous integrantes do equipo de canoa, o catalá Miquel Travé, e, o tamén galego, Daniel Pérez. A baixada foi un tanto accidentada, con algúns fallos, que os deixaron lonxe das medallas, no sétimo lugar. 

Acompañando a Luís no equipo nacional estaban outros dous galegos, Daniel Pérez e Ainhoa Lameiro, do Club Piragüismo PenedoTe Importa. Daniel, tampouco foi quen de acceder a semifinais, mentres que Ainhoa fixo unha boa baixada e si deu acadado semifinais, aínda que non as finais, rematando o campionato décimo sexta.

 Esta participación pon de relevo, unha vez máis, o bo momento do slálom galego, ata non fai moito dominado por deportistas vascos e catalás. 

 

 

 

CAMPIONATO GALEGO DE SLÁLOM, ARBO: 13/09/2020

Despois do parón nas competicións oficiais por mor da COVID-19, este domingo celebrouse nas augas do río Miño, ao seu paso por Arbo, o Campionato Galego de Slálom. A competición caracterizouse pola baixa participación, e sobre todo pola escasísima participación feminina, pero sobre todo polo carácter reivindicativo; coma xa é habitual, piragüistas, clubs e directivos da Federación aproveitaron a ocasión para recordar a necesidade dunha canle de slálom en Galicia. 

O Club Deportivo Miño acudiu ao evento con cinco deportistas, que foron quen de traer un total de oito medallas. 

O mellor da xornada foi sen dúbida Brais Castro que na categoría absoluta de canoa se fixo coa medalla de ouro, proclamándose Campión galego absoluto en C1. 

Samuel Castro tamén en canoa, pero categoría júnior, rematou terceiro, acadando podio coa medalla de bronce. 

Sergio Rodríguez, en caiac, na categoría cadete, rematou primeiro, facéndose por tanto coa medalla de ouro e o campionato galego. 

Ainhoa Barreiro, en caiac cadete, tamén acadou o ouro, e o título de campioa galega cadete, mentres que en C1 rematou segunda. 

Alba Soutelo, en canoa cadete, tamén resultou gañadora, e, polo tanto, tamén campioa galega. Alba participou tamén en caiac, onde acadou a segunda posición. 

Inmellorable balance para o Deportivo Miño con estas oito medallas na Competición máis importante da Liga Galega de Slálom Olímpico. 

Na clasificación final por Clubs, os Teixugos remataron en terceiro lugar. 

Esta será probablemente a derradeira competición de slálom a nivel autonómico e estatal que vexamos este ano, pois a Federación Española tomou a decisión de non celebrar competicións oficiais ata o próximo ano. 

A nivel internacional, o teixugo Luís Pereira atópase neste momentos na cidade de Praga para acudir aos Campionatos Europeos de Slálom, no que tamén estarán os galegos Daniel Pérez e Ainhoa Lameiro do Club Piragüismo Penedo Te Importa. 

 

 

 

2ª COPA DE ESPAÑA, PAU: 7-8/03/2020

Esta fin de semana celebrouse a 2ª Copa de España de Slálom na canle da localidade francesa de Pau. O mellor do slálom acudiu a cita, pois esta competición é o primeiro dos dous selectivos para formar parte dos diferentes equipos nacionais. Este ano, segundo a nova normativa da Federación Española de Piragüismo, cada Copa consta de dúas competicións diferentes, unha celebrada o sábado e a outra o domingo, en ámbalas dúas con clasificatorias e finais. Os circuítos tiñan trazados complicados de gran nivel, que fan máis meritorios aínda os resultados obtidos polo Club Deportivo Miño-Teixugos, que acudiu ao evento con nove deportistas, de diferentes categorías.

 Luís Pereira participou en C1 sénior e tanto sábado como domingo conseguiu entrar en finais. O sábado rematou terceiro e domingo segundo, bronce e prata, polo tanto para Luís, que con este posto ten serias opcións a formar parte tanto do equipo sénior como sub-23. Na mesma categoría, Brais Castro, tamén tivo unha boa actuación facendo finais nas dúas xornadas, rematando sétimo nos dous días, que o deixan lonxe do equipo sénior, pero con posibilidades no equipo sub-23.

Manuel Ochoa, tamén en categoría sénior, pero na modalidade de K1, entrou nas finais tanto sábado como domingo, nas finais do sábado fixo unha boa baixada, rematando terceiro, acadando a medalla de bronce, e nas finais do domingo, fixo unha baixada correcta, pero algo lenta, que o deixaron en octavo lugar. Manuel segue con moitas posibilidades de facer equipo sub-23, e con opcións a equipo sénior.

Emilio Rodríguez, en K1 veteranos, dominou as dúas carreiras, facéndose en ámbolos dous días coas medallas de ouro.

As nosa representantes femininas, Alba e Ainhoa, tiveron unha boa actuación, tendo en conta que este ano van na mesma categoría cas deportistas júnior, dous anos máis vellas ca elas. As dúas piragüistas participaron en K1 e C1 xuvenil. Alba Soutelo estivo impresionante nas clasificatorias, en C1, acadou finais os dous días cun segundo e un cuarto posto, xa en finais, rematou a proba en sétimo lugar o sábado e oitava o domingo. Na modalidade de K1, no sábado non acadou a final, rematando décimo terceira, e no domingo si acadou a final, rematando sexta. Ainhoa Barreiro, pola súa parte, en K1, conseguiu meterse en finais na segunda xornada, rematando décimo quinta o sábado e sétima o domingo. En canoa ou C1, o sábado entrou en finais, rematando décima, e no domingo quedou a un posto de chegar á final, rematando undécima.

 Samuel Castro participou en C1 xuvenil, o sábado meteuse nas finais, finalizando noveno e o domingo non acadou finais, rematando undécimo.

Alexis Segadaes en K1 xuvenil, non foi quen de clasificarse para finais, rematando vixésimo oitavo o sábado e cuadraxésimo segundo o domingo. Na mesma categoría Sergio Rodríguez, na xornada do sábado fixo unha boa baixada que o meteu en finais e rematou a proba co quinto mellor tempo. No domingo non deu acadado as finais, rematando décimo oitavo.

Moi bos resultados para o Deportivo Miño, nesta 2ª Copa de España, da que volven con cinco medallas, nunha competición complicada polo alto nivel de participantes e pola dificultade da canle e dos trazados dos circuítos. A vindeira competición a que deberán facer fronte será a 3ª Copa de España a celebrar na Seu D´Urgell o 21 e 22 de marzo, e de onde saíran xa conformados os distintos equipos nacionais.